Moses okwa li omulumentu omwiifupipiki

EIFUPIPIKO OSHIKE?

Eifupipiko olya kwatela mo okukala kuu na uuntsa. Omwiifupipiki ihi itala ko e vule yalwe. Omuntu kehe inaa gwanenena oku na okukala i ifupipika nokukala wo e shi kutya oku na omangambeko.

MOSES OKU ULIKE NGIINI EIFUPIPIKO?

Moses ine etha ondondo ndjoka a li e na yi mu ningithe a kale e na uuntsa. Olundji ngele omuntu a pewa ondondo yontumba ohu ulike nziya kutya omwiifupipiki nenge omwiinenepeki. Methelemumvo eti-19 omunyoli gwedhina Robert G. Ingersoll okwa nyola a ti: “Aantu oyendji ohaya vulu okwiidhidhimikila omaupyakadhi. Ihe ngele owa hala okutseya lela kutya omuntu okwa tya ngiini, mu pa ondondo yopombanda.” Oku shi talela muuyelele mboka, Moses okwa tula po oshiholelwa sha dhenga mbanda sheifupipiko. Ngiini mbela?

Jehova okwa li e mu pe ondondo yopombanda sho e mu lombwele a kwatele komeho Aaisraeli. Ihe ondondo ndjoka kaya li nando ya ningitha Moses a kale e na uuntsa. Pashiholelwa, dhiladhila owala kunkene a li u ungaunga neifupipiko nepulo edhigu ndyoka a li a pulwa kaakiintu yontumba kombinga yuuthemba wokuthigulula. (Numeri 27:1-11) Epulo ndyoka olya li lya kwata miiti, molwaashoka kalya li owala lya guma aakiintu mboka, ihe nomaluvalo gomonakuyiwa.

Moses okwa li i inyenge ngiini? Mbela okwa li a dhiladhila kutya e li omuleli gwaIsraeli okwa gwana okuninga etokolo moshinima shoka? Mbela okwa li i inekele muunkulungu we wopaunshitwe, miimoniwa yomonkalamwenyo ye nenge montseyo ye yokutseya Jehova nawanawa?

Otashi vulika omuntu ngoka e na uuntsa osho a ninge. Ihe Moses hasho a ningi. Ombiimbeli otayi ti: “Moses okwa tula oshinima shawo koshipala shOMUWA.” (Numeri 27:5) Dhiladhila owala. Nokuli nokonima yoomvula 40 dhokuwilika oshigwana shaIsraeli, Moses ka li i iyinekela mwene, ihe omuJehova. Otu shi wete nawa kutya Moses okwa li omwiifupipiki lela.

Moses ka li ta dhiladhila kutya oye owala a li e na okukala e na ondondo ndjoka. Okwa li a nyanyukwa sho Jehova a pitike Aaisraeli yalwe ya hunganeke wo. (Numeri 11:24-29) Sho hemweno Jetro e mu pe omayele a hogolole aalumentu yamwe ye mu kwathele ya longe po iilonga ye yimwe, Moses okwa li e ga taamba neifupipiko. (Eksodus 18:13-24) Lwopehulilo lyonkalamwenyo ye, nonando natango okwa li e na oonkondo, Moses okwa li a pula Jehova a langeke po gumwe pehala lye. Sho Jehova a hogolola Josua, Moses okwa li a kwathele nomutima aguhe omulumentu ngoka omugundjuka, mokuladhipika aantu ya landule Josua ngoka te ke ya fala sigo omEvi lyEuvaneko. (Numeri 27:15-18; Deuteronomium 31:3-6; 34:7) Moses okwa li a tala ko oshinakugwanithwa shokukwatela Aaisraeli komeho mokulongela Kalunga shi li uuthembahenda lela. Ihe okwa li a pititha komeho uuwanawa wayalwe pehala lyondondo ye.

OTATU ILONGO MO SHIKE?

Inatu hala nando ondondo yetu nenge uunkulungu wopaunshitwe mboka tu na wu tu ningithe tu kale tu na uuntsa. Dhimbulukwa kutya opo tu longe iilonga yaJehova momukalo gu uka, eifupipiko lyetu olya simana noonkondo li vule uunkulungu wetu. (1 Samuel 15:17) Ngele otwi ifupipika shili, otatu ka kambadhala okutula miilonga omayele gOmbiimbeli gopandunge ngoka taga ti: “Inekela OMUWA nomutima gwoye aguhe noino igameka koondunge dhoye mwene.”—Omayeletumbulo 3:5, 6.

Oshiholelwa shaMoses otashi tu longo wo kaatu kale twa lenga unene oondondo dhetu.

Mbela otwa mona uuwanawa mokuholela oshiholelwa shaMoses sheifupipiko? Kapu na omalimbililo kutya otwa mona mo uuwanawa. Ngele otatu ulike eifupipiko lyashili, otatu ka ninga onkalamwenyo yaantu mboka ye tu dhingoloka ompu, nokuulika kutya otu ya hole. Sha simanenena, okuulika kutya otu hole Kalunga noonkondo, ngoka naye mwene hu ulike uukwatya mboka uuwanawa. (Episalomi 18:35, NW) “Kalunga oha tondo aainenepeki, ihe oha sile ohenda aaishonopeki.” (1 Petrus 5:5) Katu na tuu etompelo lya kola lyokuholela eifupipiko lyaMoses!