Moses okwa li omulumentu omunahole

OHOLE OSHIKE?

Ohole oyo okukala wu na ko nasha nayalwe shili. Omuntu omunahole ohu ulike moohapu nomiilonga ye nkene ha kala u uvitile mboka e hole, nokuli nonando otashi mu pula eiyambo.

MOSES OKWA LI U ULIKE NGIINI OHOLE?

Moses okwa li u ulike kutya oku hole Kalunga. Momukalo guni mbela? Otashi vulika to dhimbulukwa oohapu dha 1 Johannes 5:3 ndhoka tadhi ti: “Ohole yokuhola Kalunga oyo okuvulika kiipango ye.” Molwaashoka Moses okwa li e hole Kalunga, okwa vulika kiipango ye. Moses okwa li a vulika mwaashihe shoka Kalunga e mu pula a ninge, okuza ngaa sho a li a pewa oshinakugwanithwa oshinene shokuya koshipala shomunankondo Farao, sigo oosho a pulwa a ninge oshinima shoka sha fa oshipu shokuganeka ondhimbo ye kombanda yEfuta etiligane. Kutya nduno elombwelo olya li epu nenge edhigu, Moses okwa li e li gwanitha po. Ombiimbeli otayi ti: “Moses okwa gwanitha ayihe.”—Eksodus 40:16.

Moses okwa li u ulike kutya oku hole Aaisraeli ooyakwawo. Aaisraeli oya li ye shi kutya Moses ota longithwa kuJehova a wilike oshigwana she, onkee ano, oya li ya yi kuye nomaupyakadhi gawo gi ili nogi ili. Ombiimbeli otayi ti: ‘Moses hela a kuutumbile tu utha iihokolola mokati kaantu, okuza ongula sigo ongulohi.’ (Eksodus 18:13-16) Moses ka li tuu ha kala a vulwa konima yokupulakena oowili noowili komaupyakadhi gAaisraeli! Ihe nonando ongaaka, Moses okwa li ha kala a nyanyukwa oku ya kwathela, molwaashoka okwa li e ya hole.

Kakele kokupulakena komaupyakadhi gawo, Moses okwa li wo ha kwatele mboka e hole momagalikano ge. Okwa li wo ha kwatele mo mboka ye mu ninga nayi. Pashiholelwa, sho omumwayina gwaMoses, Mirjam, a li a ngungutulile Moses, Jehova okwe mu geele nuuvu woshilundu. Pehala lyokukala a nyanyukwa sho omumwayina a geelwa, Moses okwa galikana nziya kuKalunga a ti: “Kalunga, mu aludha!” (Numeri 12:13) Ohole oyo ya li ya ningitha Moses a galikane egalikano ndyoka tali ulike okwaaihola mwene.

OTATU ILONGO MO SHIKE?

Otatu vulu okuholela Moses mokukokeka ohole yomuule yokuhola Kalunga. Ohole ndjoka ohayi tu inyengitha tu vulike “nomwenyo aguhe” kiipango ye. (Aaroma 6:17) Ngele otwa vulika kuJehova nomwenyo aguhe, otatu ka nyanyudha omutima gwe. (Omayeletumbulo 27:11) Otatu ka mona mo wo uuwanawa. Ngele otatu longele Kalunga, molwaashoka tu mu hole shili, itatu ka longa owala shoka shu uka, ihe otatu ke shi ninga wo nenyanyu.—Episalomi 100:2.

Omukalo gumwe moka tatu vulu okuholela Moses omokuulika kutya otu hole yalwe pehala lyokwiihola tse yene. Uuna ookuume nenge yaandjetu taye tu lombwele shoka tayi ipula nasho, ohole ohayi tu inyengitha (1) tu ya pulakene twi itula mo, (2) tu yu uvile uukwawo wanankali, nenge ano tu kale tu uvite nkene yu uvite nosho wo (3) tu ulike kutya otu na ko nasha nayo.

Ngaashi Moses, natse otatu vulu okukwatela mboka tu hole momagalikano getu. Omathimbo gamwe ohatu kala tu uvite nayi sho itaatu vulu oku ya kwathela momaupyakadhi gawo ngoka taye tu lombwele. Otashi vulika nokuli tu tye: “Ohenda shili sho itaandi vulu oku ku kwathela, ihe otandi vulu owala oku ku kwatela momagalikano gandje.” Ihe dhimbulukwa kutya “egalikano lyomuyuuki oli na oonkondo okuninga sha.” (Jakob 5:16) Omagalikano getu otashi vulika gi inyengithe Jehova a kwathele omuntu ngoka, shoka tashi vulika ando inee shi ninga, ando owa li inoo galikana. Oshike nduno tatu vulu okuningila mboka tu hole shi vulithe oku ya kwatela momagalikano getu?a

Mbela ito shi zimine kutya otatu vulu okwiilonga oshindji kuMoses? Nonando okwa li omuntu ngaashi tse, okwe tu tulila po oshiholelwa sha dhenga mbanda sheitaalo, sheifupipiko noshohole. Shi thike ngaa mpoka tatu holele oshiholelwa she thiluthilu, opo ngaa pu thike tatu mono mo uuwanawa nosho wo yalwe.—Aaroma 15:4.