Moses omulumentu ngoka a li e na eitaalo

EITAALO OSHIKE?

PaMbiimbeli “eitaalo” olyo “einekelo lya kola miinima mbyoka twe yi tegamena naambyoka itaatu vulu oku yi mona ngashingeyi.” Ngoka i itaala muKalunga oku na einekelo kutya Kalunga omauvaneko Ge agehe ote ke ga gwanitha.

MOSES OKWA LI U ULIKE NGIINI KUTYA OKU NA EITAALO?

Moses okwa li ha ningi omatokolo ngoka tagu ulike kutya okwi itaala momauvaneko gaKalunga. (Genesis 22:15-18) Okwa li e na ompito okukala nonkalamwenyo ombwanawa yuuzeko muEgipiti, ihe okwa li e yi thigi po e ta “hogolola okuhepekwa pamwe naantu yaKalunga ye ina zimina uutoye wuulunde wokathimbo kowala.” (Aahebeli 11:25) Mbela etokolo ndyoka okwa li e li ninga inaa dhiladhila nawa, e te ki ipa uusama konima yethimbo? Aawe, molwaashoka Ombiimbeli otayi ti kutya Moses ‘okwa li e na omukumo ongaangoka a mono Kalunga, nando iha monika.’ (Aahebeli 11:27) Moses ka li nando i ipa uusama omolwomatokolo ngoka a li a ningi ga kankamena keitaalo lye momauvaneko gaKalunga.

Moses okwa li a kwathele yalwe ya koleke eitaalo lyawo muKalunga. Pashiholelwa, natu tale kwaashoka sha li sha ningwa po sho Aaisraeli ya li ye wete taya thitikininwa pokati ketangakwiita lyaFarao nEfuta etiligane. Aaisraeli oya li ya kugile Jehova ekwatho nosho wo Moses, molwaashoka oya li ye wete oshiponga oshinene tashi ya adha. Moses okwa li te ki inyenga ngiini?

Otashi vulika Moses ka li e shi kutya Kalunga oku li pokutopola Efuta etiligane pokati, opo Aaisraeli ya vule okupita po. Ihe nonando ongaaka, Moses okwa li e na einekelo kutya Kalunga ota ka ninga po sha, opo a gamene oshigwana She. Moses okwa li a hala Aaisraeli ooyakwawo ya kale ye na einekelo lya fa lye. Eksodus 14:13 ota ti: “Moses okwa yamukula a ti: ‘Inamu tila! Ikoleleleni ne mu tale ehupitho ndyoka OMUWA te mú hupitha nalyo nena ndjika.’” Mbela Moses okwa li ngaa a tompola okukwathela Aaisraeli ooyakwawo ya kale ye na eitaalo lya kola? Eeno, molwaashoka Ombiimbeli otayi ti kutya “eitaalo olyo lya kumike Aaisraeli, ya vule okutaaguluka Efuta etiligane ya fa taa ende puukukutu,” ihe haMoses awike. (Aahebeli 11:29) Moses haye owala a mona uuwanawa meitaalo lye, ihe naayehe mboka ya li yi ilongo sha mulyo.

OTATU ILONGO MO SHIKE?

Otatu vulu okuholela Moses mokuninga omatokolo ngoka tagu ulike kutya otwi inekela momauvaneko gaKalunga. Pashiholelwa, Kalunga oku uvaneka okusila oshimpwiyu oompumbwe dhetu ngele otwa pititha komeho oku mu longela. (Mateus 6:33) Oshoshili kutya otashi vulika tu kale tu wete oshidhigu okukala itaatu pititha iinima yopamaliko komeho, molwaashoka oyo tayi lalakanenwa kaantu oyendji kunena. Ihe otatu vulu okukala nuushili kutya ngele otwa ningi ngaashi tatu vulu tu kaleke onkalamwenyo yetu yanathangwa nokugandja eitulomo kokulongela Jehova, ote ke tu pa kehe shoka twa pumbwa. Ote tu shilipaleke ta ti: “Itandi ku etha nando; itandi ku thigi po.”—Aahebeli 13:5.

Ohatu kambadhala wo okukwathela yalwe ya koleke eitaalo lyawo. Pashiholelwa, aavali aanandunge oya mona kutya oye na ompito ombwanawa okukwathela oyana ya koleke eitaalo lyawo muKalunga. Sho oyana taya koko, oya pumbwa okutseya kutya Kalunga oko e li nokwe ya pa omithikampango kombinga yaashoka shu uka naashoka sha puka. Oshikwawo, oye na wo oku ya kwathela ya kale ya tompwa kutya okulandula omithikampango dhe oko omukalo shili gwa dhenga mbanda. (Jesaja 48:17, 18) Aavali ohaya pe oyana omagano omawanawa sho haye ya kwathele ya kale yi “itaala kutya Kalunga oko e li nota futu ayehe mboka taye mu kongo.”—Aahebeli 11:6.