Oshihwa sha hwama

Moses okwa kala muMidian omimvo 40. Okwa hokana e ta mono aanona. Esiku limwe manga ta tonatele oonzi dhe popepi nondundu Sinai, okwa mono oshinima oshikumithi. Okwa mono oshihwa sheno sha hwama, ihe kasha li tashi pi po. Moses sho a hedha popepi nasho e shi tale nawa, oku uvu ewi tali zi musho tali ti: ‘Moses! Ino hedha ko huka. Hula ko oongaku dhoye, oshoka owa thikama pehala eyapuki.’ Jehova oye a li ta popi naye okupitila momuyengeli.

Moses okwa li a tila, onkene okwi isiikile koshipala. Oku uvu ewi lya ti: ‘Onda mono nkene Aaisraeli taya hepekwa. Otandi ke ya mangulula miikaha yAaegipiti noku ya fala kevi ewanawa. Ongoye to ka tembudha mo aantu yandje muEgipiti.’ Mbela shoka kasha li nando sha kumitha Moses?

Moses okwa pula a ti: ‘Aantu ngele taya pula ndje kutya olye a tumu ndje, nandi ya lombwele te ti ngiini?’ Kalunga okwa yamukula a ti: ‘Ya lombwela to ti kutya Jehova Kalunga kaAbraham, Kalunga kaIsak naKalunga kaJakob, oye a tumu ndje kune.’ Moses okwa ti: ‘Ongiini ngele itaya pulakene ndje?’ Jehova okwa shilipaleke Moses kutya ote ke mu kwathela. Okwa lombwele Moses u umbile ondhimbo ye pevi. Ondhimbo oya shituka eyoka. Moses sho a kwata eyoka ndyoka komushila, olya shituka ishewe ondhimbo. Jehova okwa ti: ‘Ngele owa longo oshikumithalonga shino, otashi ku ulika kutya ongame nde ku tumu.’

Moses okwa ti: ‘Kandi shi okupopya.’ Jehova okwe mu uvanekele a ti: ‘Otandi ke ku lombwela shoka to ka popya, notandi ke ku tumina omumwanyoko Aaron e ku kwathele.’ Moses sho a mono kutya Jehova oku li pamwe naye, okwa kutha omukadhi noyanamati e taya yi kuEgipiti.