Oonzapo dhaJehova odhi itaala ngaa muJesus?

OKWIITAALA MUJESUS OKWA SIMANENENA

Anthony: Ongiini Tim. Onda nyanyukwa oku ku mona ishewe.

Tim: Nangame onda nyanyukwa oku ku mona.

Anthony: Onde ku etela iifo iipe, Oshungolangelo no-Awake! Ondi wete kutya oto ka nyanyukilwa shili oku yi lesha.

Tim: Tangi. Natango onda nyanyukwa sho we ya nena molwaashoka onda hala oku ku pula oshinima shimwe.

Anthony: Oshi li nawa, oshike shono wa hala okupula?

Tim: Esiku limwe, onda li tandi popi nomuniilonga omukwetu. Onde mu lombwele kombinga yuumbo mbwiyaka wa pele ndje nokombinga yiinima iihokithi mbyoka yi li mo. Ihe okwa ti kutya inandi wu lesha molwaashoka Oonzapo dhaJehova inadhi itaala muJesus. Oshili ngaa? Onda lombwele omuniilonga omukwetu kutya otandi ya ndi ku pule ngele we ya.

Anthony: Onda nyanyukwa shili sho wa pula ndje. Onawa naanaa sho otse yene wa pula. Openi ishewe to vulu okumona uuyelele kutya omuntu okwiitala mushike ngele haye mwene to pula?

Tim: Shono osho nee nda dhiladhila.

Anthony: Uushili owo kutya, Oonzapo dhaJehova odhi itaala shili muJesus. Nokuli, otu wete kutya okukala neitaalo muJesus okwa simanenena opo omuntu a ka mone ehupitho.

Tim: Osho ngaa ando nda kala ndi shi, ihe sho omuniilonga omukwetu a ti kutya inamu itaala muJesus, osha ningitha ndje ndi kale nda hala okuuva nawa. Ondi wete kutya katu na esiku twe shi kundathanene.    

Anthony: Nandi ku ulukile oovelise dhimwe mOmbiimbeli ndhoka tadhi ulike kutya osha simana shi thike peni okwiitaala muJesus? Oovelise ndhika odho Oonzapo dhaJehova hadhi longitha olwindji muukalele wadho.

Tim: OK.

Anthony: Otu shi okutameka noohapu dhaJesus mwene ndhoka dhi li muJohannes 14:6. Oohapu ndhika odhi li oshitopolwa shoonkundathana ndhoka Jesus a li a ningi nagumwe gwomaayapostoli ye. Otadhi ti: “Jesus okwe mu lombwele: ‘Ongame ondjila noshili nomwenyo. Kape na ngoka ta vulu okuya kuTate, okuninga ta pitile mungame.’” Pavelise ndjoka, omomukalo gumwe guni tatu vulu okuya kuTate?

Tim: Okupitila muJesus.

Anthony: Osho naanaa. NOonzapo dhaJehova osho lela dhi itaala. Nandi ku pule: Shi ikolelela kwaashi wu shi kombinga yiitegelelwa yaKalunga, uuna omuntu ta galikana, oku na okugalikana medhina lyalye?

Tim: Omedhina lyaJesus.

Anthony: Osho lela. Nomolwaasho aluhe tandi galikana ohandi shi ningi medhina lyaJesus. Osha faathana wo nomagalikano agehe haga galikanwa kOonzapo dhaJehova.

Tim: Hambaa.

Anthony: Enyolo lilwe tatu vulu okutala kulyo oJohannes 3:16. Ovelise ndjoka oya simanenena nomolwaashoka hayi ithanwa Evaangeli paufupi. Edhiladhilo olyo kutya ngele owu kuthe kehe shimwe shoka sha li sha nyolwa kombinga yonkalamwenyo yaJesus yokombanda yevi nosho wo uukalele we e to shi ningi ovelise yimwe, otashi ka ngongwa kovelise ndjoka. Pamwe owa hala okulesha enyolo ndika?

Tim: Ee. Otali ti: “Oshoka osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.”

Anthony: Tangi. Ovelise ndjika owe yi uva nale?

Tim: Eeno, onde yi uva lwiikando oyindji, nohandi yi mono ya nyolwa komandhindhiliko nokomapulakata.

Anthony: Ovelise yi shiwike apuhe. Moku yi konakona nuukeka, ndhindhilika shoka Jesus a ti. Okwa ti kutya ohole yaKalunga oyo hayi shi ningi tashi wapa opo aantu ya mone omwenyo gwaaluhe, ihe ongele owala twa ningi shike?

Tim: Ongele tu na eitaalo.

Anthony: Eeno. Oku shi popya kondandalunde, okukala neitaalo mOmwana awike, Jesus Kristus. Nedhiladhilo kutya eitaalo ndyoka ohali tu palele ondjila yoku ka mona omwenyo gwaaluhe, olya popiwa pepandja 2 lyoshifo shoka nde ku etele. Shi na ko nasha nelalakano lyOshungolangelo, osha ti kutya mokati kiinima yilwe, oshifo “otashi humitha komeho eitaalo mokwiitaala Jesus Kristus ngoka a si, opo tu vule okumona omwenyo gwaaluhe nota pangele ngashingeyi e li Omukwaniilwa gwUukwaniilwa waKalunga.”    

Tim: Owu wete ko nduno. Moshifo sheni omo naanaa mwa nyolwa kutya Oonzapo dhaJehova odhi itaala muJesus.

Anthony: Osho naanaa.

Tim: Ano nani, omolwashike aantu haya ti kutya inamu itaala muJesus?

Anthony: Otashi vulika pu na omatompelo ogendji kutya omolwashike aantu haya ti ngaaka. Poompito dhimwe, aantu ohaye shi ti molwaashoka oyu uva yalwe taye shi popi. Nenge tashi vulika ya longwa edhiladhilo ndika lya puka kaasita yawo.

Tim: Otandi dhiladhila kutya, pamwe aantu yamwe ohaya ti kutya inamu itaala muJesus molwaashoka ohamu iyi ithana Oonzapo dhaJehova, ihe kadhi shi Oonzapo dhaJesus.

Anthony: Ndyoka otali vulu wo okukala olyo etompelo limwe.

Tim: Omolwashike hamu popi unene kombinga yaJehova?

“ONGAME ONDE YA TSEYITHILE EDHINA LYOYE”

Anthony: Omolwoshinima shimwe, otwi itaala kutya osha simana okulongitha edhina lyaKalunga, Jehova, ngaashi owala Omwana, Jesus a li a ningi. Tala kwaashoka Jesus a li a ti kuHe megalikano. Osha nyolwa muJohannes 17:26. Kwathela ndje wu leshe ovelise ndjoka.

Tim: Eewa. “Ongame onde ya tseyithile edhina lyoye notandi ka tsikila oku shi ninga, opo ohole ndjoka u hole ndje nayo yi kale muyo, nangame ndi kale muyo.”

Anthony: Tangi. Ndhindhilika kutya Jesus okwa ti kutya okwa tseyitha edhina lyaKalunga. Mbela sho to tala omolwashike e shi ningile?

Tim: Hmm. Kandi shi wo.

Anthony: Pamwe otatu vulu okutala kenyolo lilwe ndyoka tali tu pe uuyelele mwaashika. Onda dhiladhila kombinga yIilonga 2:21. Otayi ti: “Kehe ngoka ti ithana edhina lyOmuwa, ota hupithwa.” Ngashingeyi ondi na uushili kutya oto ka zimina kutya ngele okwiithana edhina lyaJehova oku li oshitegelelwa opo omuntu a ka hupithwe, Jesus oku na okukala a li e shi oshitegelelwa shika.

Tim: Eeno, osho lela.

Anthony: Onkee ano, okuhupithwa kwaalanduli yaJesus oko etompelo limwe sha li sha simana kuye ya tseye edhina lyaKalunga noku li longitha. Noku li wo etompelo limwe lya simanenena kutya omolwashike hatu popi kombinga yaJehova olwindji. Otu wete kutya osha simana okulombwela yalwe edhina lyaKalunga nokukwathela yalwe yi ithane edhina ndyoka.    

Tim: Ihe nokuli ngele aantu kaye shi edhina lyaKalunga nenge ihaaye li longitha shu ukilila, oye shi owala kutya otaya popi lye uuna taya popi Kalunga.

Anthony: Shoka otashi vulu okukala shoshili. Nokuli nando osho, sho Kalunga e tu lombwela edhina lye, okwe shi ningi oshipu kutse tu hedhe popepi naye.

Tim: Owa hala okutya ngiini?

Anthony: Shi dhiladhila momukalo ngu: Katwa li twa pumbwa okutseya edhina lyaMoses. Otwa li tatu vulu okukala owala twe mu tseya e li omulumentu ngoka a li a topola Efuta etiligane nenge omulumentu ngoka a li a pewa Iipango Omulongo. Sha faathana naNoowa, omolwashike tu shi edhina lye? Okwa li ta vulu owala okupopiwa e li omulumentu ngoka a li a tungu onguluwato nokwa hupitha uukwanegumbo we nosho wo iinamwenyo. Nokuli naJesus okwa li ta vulu okutseyika e li gumwe ngoka a li a zi megulu nokwa si omolwoondjo dhetu. Hasho mbela?

Tim: Osho ndi wete.

Anthony: Ihe Kalunga okwa li a shilipaleke kutya otwa tseya omadhina gaantu mboka. Kapu na sha shilwe hashi ningitha omuntu a kale gwolela kungoye kaashi shi edhina lye. Nokuli nando inatu mona nale Moses, Noowa, nenge Jesus, okutseya owala omadhina gawo okwa ningitha aalumentu mbaka ya kale yolela kutse.

Tim: Oto popi oshili, inandi shi dhiladhila nando onale momukalo ngoka!

Anthony: Ndyoka olyo etompelo limwe Oonzapo dhaJehova hadhi longitha edhina lyaKalunga olwindji. Otwa hala okukwathela aantu ya kale ye na eitaalo muJehova Kalunga e li omuntu gwolela ngoka taya vulu okuhedha popepi naye. Nopethimbo opo tuu mpoka, ohatu tsu omuthindo konkandangala ndjoka Jesus ha dhana mokuhupithwa kwetu. Itatu vulu okulesha enyolo limwe lyahugunina ndyoka tali tu kwathele moshinima shika?

Tim: Eewa, oshi li nawa.

Anthony: Petameko otwa li twa lesha Johannes 14:6. Dhimbulukwa, Jesus okwa ti kutya oye “ondjila noshili nomwenyo.” Natu shune koovelise dhopetameko tu tale oohapu dhe ndhoka dhi li muJohannes 14:1. Kwathela ndje wu leshe shoka Jesus a ti moshitopolwa shahugunina shovelise ndjoka?

Tim: Eewa. Otayi ti: “Itaaleni Kalunga ne mu itaale ndje wo.”

Anthony: Tangi. Mbela sho to tala eitaalo lyashili oli ikolela owala mokwiitaala mugumwe?

Tim: Ahawe. Jesus okwa ti otwa pumbwa okukala neitaalo mwaayehe.

Anthony: Owu li mondjila. Nondi na uushili kutya oto shi zimine kutya inashi gwana owala okutya otu na eitaalo muKalunga nomuJesus. Otwa pumbwa shili okukala noonkalamwenyo ndhoka tadhi ulike kutya otu na eitaalo muyo.

Tim: Osho lela.

Anthony: Ihe mbela ongiini omuntu hu ulike kutya oku na shili eitaalo muKalunga nosho wo muJesus? Ondi wete kutya otatu vulu okukundathana epulo ndyoka esiku lilwe.a

Tim: Otandi ke shi nyanyukilwa.