Ootatekulululwa mboka ya sa oye na etegameno lini?

OMATHIMBO opo ga piti, oshinenenima shoonkundana tashi hokitha osha li sha holoka moshifokundaneki shaKorea The Chosun Ilbo. Osha li shi na epulo tali ti: “‘Shim Cheong ngoka a longa iilonga iiwanawa,’ ngoka a li kee shi sha kombinga yaJesus mbela okwa ya moheli?”

Oshinenenima osha li oshihokithi molwaashoka Shim Cheong okwa li omukiintu omugundjuka omunahole mehokololo lyopamudhigululwakalo lyaKorea ngoka a li a yamba po onkalamwenyo ye opo a kwathele he ngoka a li omuposi. Momukokomoko gwomimvo, oyendji oya kala noku mu tanga omolwoshinima shoka. Nokuli, muKorea, Shim Cheong okwa kala a talwa ko e li oshiholelwa oshiwanawa shokakadhona okadhiginini.

Koyendji, edhiladhilo kutya omuntu a tya ngawo ota ka geelwa momulilo gwoheli molwaashoka owala kaa li Omukriste a ninginithwa, olya li tali monika kaali li nawa, notali uvitha nayi nokuli. Ihe nokuli, ehokololo ndyoka oli na okukala lya li li shiwike nale manga etumwalaka kombinga yaKristus lya li inaali thika momukunda gwawo.

Moshifokundaneki shoka omwa li wo mu na omapulapulo gomusita. Okwa li a pulwa ngele mboka ya sa inaaya mona ompito yi ilonge kombinga yaJesus oya tokolelwa omulilo gwoheli. Okwa yamukula a ti ngiini? “Katu shi wo. Ihe otatu mbeleke owala kutya Kalunga oku na okukala e nine sha oshiwanawa aantu mboka.”

SHOKA OMUNTU E NA OKUNINGA OPO A KA HUPITHWE

O-The New Catholic Encyclopedia oya ti: “Eninginitho olya pumbiwa omolwehupitho. Ngaashi Kristus mwene e shi popi, omuntu ngele ita valwa momeya nomOmbepo Ondjapuki, ita wapa okuya mUukwaniilwa waKalunga.(Jn 3.5).” Omolwoshinima shika, aantu yamwe oyi itaala kutya mboka ya sa inaaya ninginithwa ohayu umbilwa momulilo gwoheli nenge ya hepekwe momukalo gulwe.

Ihe nonando oongawo, opu na oyendji mboka hayi ipula shi na ko nasha neitaalo ndyoka kutya olya nika uugoya. Aantu omamiliyona oya sa kaaye na owino yasha yetumwalaka lyOmbiimbeli. Mbela oyi ilongela okuhepekwa momulilo sigo aluhe? Ombiimbeli otayi ti ngiini moshinima shono?

ETEGAMENO NDYOKA LYU UVANEKWA MOMBIIMBELI

Ombiimbeli otayi shi ulike sha yela kutya Kalunga ihe ekelehi aantu mboka ya li kaaye na ontseyo yasha yiitegelelwa ye. Iilonga 17:30 otayi tu shilipaleke tayi ti: “Kalunga okwa li i idhidhimikile nale aantu pomathimbo ngeyaka, sho ya li yaa na owino.” Etegameno lini Ombiimbeli yi nine aantu mboka ya sa inaaya mona ompito yokwiilonga kombinga yaKalunga?

Eyamukulo otali adhika mwaashoka Jesus a li a lombwele gumwe gwomaakolokoshi ngoka a sile pooha dhe. Omulumentu okwa ti kuJesus: “Dhimbulukwa ndje, ngele wa thiki [mUukwaniilwa woye, NW.]” Jesus okwe mu yamukula ngiini? ‘Ongame tandi ku lombwele nena tuu ndjika, oto ka kala pamwe nangame mOparadisa.’ — Lukas 23:39-43.

Mbela Jesus okwa li tu uvaneke kutya omulumentu ngoka okwa li ta ka ya megulu? Aawe. Omulumentu ngoka ka li ‘a valululwa’ momeya nomombepo, oshinima shoka osho sha li oshitegelelwa shokuya mUukwaniilwa womegulu. (Johannes 3:3-6) Pehala lyaashono, Jesus okwa li tu uvaneke kutya omukolokoshi ngoka okwa li ta ka kala natango nomwenyo, moParadisa. Molwaashoka okwa li Omujuda, omulumentu nguka oku na okukala a li e shi sha kombinga yoParadisa ndjoka ya li kombanda yevi, ano oshikunino shaEden shoka sha hokololwa membo lyotango lyOmbiimbeli. (Genesis 2:8) Euvaneko lyaJesus olya li lye mu pe eshilipaleko lyetegameno lyeyumuko lyoku ka kala mOparadisa ngele ye etululwa kombanda yevi.

Nokuli, Ombiimbeli oyu uvaneka ‘eyumuko lyaantu ayehe kuusi, aawanawa naawinayi.’ (Iilonga 24:15) ‘Aawinayi’ oyo mboka inaaya gwanitha po omithikampango dhuuyuuki dhaKalunga molwaashoka kaaya li ye na owino kombinga yaKalunga. Jesus ota ka yumudha omukolokoshi ngoka a li a popi naye, mwa kwatelwa aantu omamiliyona, tashi vulika omabiliyona, mboka ya sa kaaye na owino yasha. Opo nduno, otaya ka longwa iitegelelwa yaKalunga moParadisa kombanda yevi, notaya ka kala ye na ompito yokuulika kutya oye hole Kalunga mokuvulika kiipango ye.

AAWINAYI OTAYA KA YUMUDHWA UUNAKE?

Uuna aawinayi ya yumudhwa, mbela otaya ka pangulwa shi ikolelela komapuko ngoka ya ninga nale? Hasho nando. Aaroma 6:7 otaya ti: “Omuntu ngele okwa sa, nena okwa mangululwa moonkondo dhuulunde.” Aawinayi otaya ka kala ya futila po oondjo dhawo sho ya si. Onkee ano, otaya ka pangulwa shi ikolelela kwaashoka taya ka ninga ngele ya yumuka, ihe hakwaashoka ya ninga sho kaaya li ye na owino yasha manga inaaya sa. Ongiini taya ka mona uuwanawa?

Konima yeyumuko, aawinayi otaya ka mona ompito yi ilonge oompango dhaKalunga, ndhoka tadhi ka hololwa sho omambo gopathaneko taga ka pandjwa. Opo ihe otaya ka pangulwa, ‘ngaashi ye shi ilongela,’ sha hala okutya, okutalika ngele oya vulika koompango dhaKalunga nenge hasho. (Ehololo 20:12, 13) Koyendji mboka aawinayi, ndjika itayi ka kala ompito ontiyali, ihe ompito yawo yotango lelalela yokumona omwenyo gwaaluhe kombanda yevi mokwiilonga nosho wo mokulonga ehalo lyaKalunga.

Elongo ndika lyOmbiimbeli olya kwathela oyendji ya kale ishewe ye na eitaalo muKalunga. Yeong Sug okwa li gumwe gwomuyo. Okwa li a putudhwa e li Omukatoolikeelela. Iilyo yuukwanegumbo we oya li aasita. Molwaashoka okwa li a hala okuninga omwiikaleli, okwa yi hoka haku kala aaikaleli yaKatoolika. Konima yethimbo, okwa zi ko molwaashono okwa li u uvithwa nayi kwaashoka tashi ningwa mo. Shimwe ishewe, ka li a taamba ko elongo lyoheli molwaashono okwa li u uvite kutya okuhepeka aantu momulilo gwoheli inaku uka nokaku li pahole.

Opo ihe, gumwe gwomOonzapo dhaJehova okwa li u ulukile Yeong Sug oohapu ndhika okuza mOmbiimbeli, tadhi ti: “Aanamwenyo otaa tseya kutya oye na okusa, Ihe aasi itaa tseya sha nando, nokaa na we ondjambi yasha.” (Omuuvithi 9:5) Onzapo oya li ye mu kwathele a dhimbulule kutya oohekulululwa mboka ya sa itaya hepekwa momulilo gwoheli. Pehala lyaashono, oya kotha meso, ya tegelela eyumuko.

Mokutseya kutya aantu oyendji inaya uva sha nando onale oshili okuza mOmbiimbeli, Yeong Sug okwa taamba ko nomutima aguhe oohapu dhaJesus ndhoka dhi li muMateus 24:14 tadhi ti: ‘Onkundana ndjika ombwanawa yUukwaniilwa otayi ku uvithilwa uuyuni awuhe yi ningile iigwana ayihe onzapo; notaku ya ihe ehulilo.’ (NW) Ngashingeyi oha kutha ombinga mokuuvitha onkundana ombwanawa nosho wo mokulombwela yalwe kombinga yeitaalo lye lyi ikolelela kOmbiimbeli.

“KALUNGA AANTU AYEHE OHE YA TALA YE THIKE PAMWE”

Ombiimbeli otayi tu lombwele tayi ti: “Kalunga aantu ayehe ohe ya tala ye thike pamwe. Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.” (Iilonga 10:34, 35) Shika oshi li uuyuuki wa gwanenena mboka atuheni twa tegelela Kalunga a kale e wu na, ngoka ‘e hole uuyuuki nuunoshili.’ — Episalomi 33:5.