OMAPULO GOPAMBIIMBELI TAGA YAMUKULWA
Mbela opulanete yetu oyi li po nelalakano?
Evi olya li lya nuninwa okukala ehala ewanawa lyaantu
Opulanete yetu oyo opalela okukala iinima yi na omwenyo. Oyi na omeya ga gwana, ngoka ga simanenena mokukaleka po omwenyo. Okweendama kwevi, okudhingoloka kwalyo nosho wo edhingolokondjila lyalyo oyi li naanaa nawa opo efuta kaali ninge iikangwa nenge omeya galyo ga fuluke. Lyo ewangandjombepo lyevi nosho wo oonkondo dhalyo dhomangeneta ohali dhi gamene koonte dha nika oshiponga. Elongelokumwe lyiimeno niinamwenyo otali kumitha. Onkee ano, aantu oyendji oya thika pehulithodhiladhilo kutya opulanete yetu oya ningwa nelalakano. — Lesha Jesaja 45:18.
Ihe otashi vulika wu kale wu na omaipulo kutya ‘Mbela okumona iihuna nosho wo okwaanuuyuuki oku li oshitopolwa shelalakano ndyoka?’ — Lesha Deuteronomium 32:4, 5.
Mbela elalakano lyevi oli na ngaa esiku nali ka gwanithwe?
Evi olya li lya ningwa li kale egumbo ewanawa lyaantu ya simanekathana noye hole Omushiti gwawo. Kungawo, onkalamwenyo yaantu oyi na elalakano li vule lyiimeno nenge lyiinamwenyo. Otatu vulu okuuva ko Omushiti gwetu nokukala twa hokwa ohole nuuyuuki we nokukala tu yi na. — Lesha Omuuvithi 12:13; Mika 6:8; Episalomi 33:5.
Omushiti gwetu ota vulu okugwanitha po ashihe shoka a lalakanena. Onkee ano, otatu vulu okukala tu na uushili kutya ota ka hulitha po okumona iihuna nokwaanuuyuuki nokuninga opulanete yetu yi kale ehala lyaantu ewanawa nolya gwanenena. — Lesha Episalomi 37:11, 29; Jesaja 55:11.