Nkene to vulu okukala ishewe nekwatathano ewanawa naJehova

OMUMVO kehe, oonzi odhindji dhaJehova ohadhi galulilwa megongalo. Dhiladhila owala ‘kenyanyu’ enene ndyoka hali kala megulu uuna oonzi ndhoka dha galukile kuJehova! (Luk. 15:7, 10) Ngele owa galulilwa megongalo, oto vulu okukala nuushili kutya Jesus, aayengeli nosho wo Jehova oya nyanyukwa sho wa galukile moshili. Ihe sho to longo nuudhiginini wu kale ishewe wu na ekwatathano naJehova, otashi vulika wu taalele omashongo. Gamwe gomomashongo ngoka ogeni, noshike tashi vulu oku ku kwathela?

OMASHONGO GENI TASHI VULIKA WU TAALELE?

Aamwatate naamwameme oyendji ohaya kala taya kondjo nokukala ya teka omukumo konima ngele ya galulilwa megongalo. Otashi vulika wu uvite ngaashi omukwaniilwa David a li u uvite. Nonando okwa li a dhiminwa po omayono ge, okwa li a popi a ti: “Onda ningina moondjo.” (Eps. 40:12; 65:3) Konima ngele omuntu a galukile kuJehova, otashi vulika a kale ta kondjo nokukala e uvite e na ondjo nenge a sa ohoni uule womimvo. Omumwameme Isabelle,a ngoka a kala a kondwa uule womimvo 20, okwa ti: “Ohashi kala oshidhigu kungame okwiitaala kutya Jehova okwa dhimina ndje po.” Ngele owa kala wa teka omukumo, otashi vulika ekwatathano lyoye naJehova li nkundipale ishewe. (Omayel. 24:10) Ino etha shoka shi ku ningilwe.

Yamwe ohaya kala ya teka omukumo ngele taya dhiladhila kwaashihe shoka ye na okuninga, opo ya kale ishewe ye na ekwatathano ewanawa naJehova. Konima sho omumwatate Antoine a galulilwa megongalo, okwa ti: “Onda li ndi uvite nda dhimbwa kehe shimwe kombinga yonkalamwenyo yandje manga inaandi kondwa.” Molwaashoka yamwe osho haya kala ye uvite ngawo, ohaya kakadhala okukutha ombinga pakuudha momaipyakidhilo gopaKriste.

Natu shi thaneke ngeyi: Omuntu ngoka egumbo lye lya hanagulwa po koshikungulu otashi vulika a kale a teka omukumo ngele ta dhiladhila kwaashihe shoka e na okuninga e li tungulule. Sha faathana, ngele ekwatathano lyoye naJehova olya teka po sho wa yono sha kwata miiti, otashi vulika wu kale wu uvite kutya otashi ka pula oonkambadhala odhindji noonkondo wu kale ishewe wu na ekwatathano ewanawa naye. Ihe opu na ekwatho.

Jehova ote tu hiya ta ti: “Ileni, tu kandule po uupyakadhi mboka wu li pokati ketu.” (NW) (Jes. 1:18) Owa ninga nale oonkambadhala wu “kandule po uupyakadhi” mboka. Jehova oku ku hole omolwoonkambadhala ndhoka wa ninga. Dhiladhila kwaashika: Molwaashoka owa galukile kuJehova, ota vulu okulongitha oshiholelwa shoye a ulike kutya Satana omufundja. — Omayel. 27:11.

Sho wa galukile kuJehova, kungawo owa hedha popepi naye, nokwa uvaneka kutya ota ka hedha wo popepi nangoye. (Jak. 4:8) Oshi li oshinima oshiwanawa uuna yalwe ya mono kutya owa galukila megongalo, ihe opu na wo oshinima shilwe shoka wu na okuninga. Owa pumbwa okutsikila okukoleka ohole yoye yokuhola Tate naKuume koye, Jehova. Ongiini to vulu oku shi ninga?

ITULILA PO OMALALAKANO NGOKA TO VULU OKWAADHA

Kambadhala okwiitulila po omalalakano ngoka to vulu okwaadha. Otashi vulika natango wu na ontseyo kombinga yaJehova nomauvaneko ge gonakuyiwa. Ihe ngashingeyi owa pumbwa wo okukala wu na ondjigilile yokuninga iinima mbyoka wa li ho ningi nale, ngaashi okuuvitha onkundana ombwanawa, okuya kokugongala nokweendathana nooitaali ooyakweni. Natu ka tale komalalakano taga landula, ngoka to vulu okwiitulila po.

Kala ho galikana kuJehova. Oku shi kutya okukala kwoye wu uvite wu na ondjo otaku vulu oku shi ninga oshidhigu wu mu galikane. (Rom. 8:26) Nonando ongawo, ‘dhiginina okugalikana’ Jehova noku mu lombwela kutya owa halelela okupanga uukuume naye. (Rom. 12:12) Andrej ota ti: “Onda li handi kala ndi uvite ndi na ondjo nonda sa ohoni. Ihe uuna nda galikana, onda li handi kala ndi uvite hwepo, nondi na ombili yopamadhiladhilo.” Ngele ku shi shoka wu na okugalikana kombinga yasho, oto vulu okutala komagalikano gomukwaniilwa David, ngoka taga adhika mEpisalomi 51 no 65.

Konakona Ombiimbeli pandjigilile. Shoka otashi ka koleka eitaalo lyoye nosho wo ohole yoye yokuhola Jehova. (Eps. 19:7-11) Omumwatate Felipe okwa ti: “Molwaashoka kanda li ndi na ondjigilile yokulesha nokukonakona Ombiimbeli, eitaalo lyandje olya nkundipala nonda yono kuJehova. Kanda li nda hala okweendulula epuko ndyoka, onkene onda tokola ndi kale aluhe handi konakona Ombiimbeli paumwene.” Nangoye oto vulu okuninga sha faathana. Ngele ku shi kutya iinima yini wu na okukonakona kombinga yayo, oto vulu okupula ekwatho kukuume koye ngoka a pyokoka pambepo.

Panga ishewe uukuume naamwatate naamwameme. Yamwe mboka ya galulilwa megongalo ohaya kala tayi ipula kutya aantu megongalo otaye ke ya tala ko nayi. Larissa okwa zimine a ti: “Onda li handi kala nda sa ohoni noonkondo. Onda li wo ndi uvite ndu uvitha nayi aamwatate naamwameme megongalo nonda kala ndi uvite ngawo uule wethimbo.” Kala nuushili kutya aakuluntugongalo nayalwe oya hala oku ku kwathela wu kale ishewe wu na ekwatathano ewanawa naJehova. (Tala oshimpungu, “Oshike aakuluntugongalo taya vulu okuninga?”) Oya nyanyukwa sho wa galukila kuJehova, noya hala wu shi endithe nawa. — Omayel. 17:17.

Oshike tashi vulu oku ku kwathela wu kale ishewe wu na ekwatathano ewanawa nayalwe megongalo? Kala ho yi kokugongala pandjigilile nokulonga pamwe nayo muukalele. Shoka otashi vulu ngiini oku ku kwathela? Felix okwa ti: “Egongalo alihe olya li lya halelela ndi galukile kuJehova. Onda li ndi uvite ndi holike. Aamwatate naamwameme oya kwathele ndje ndi kale ndi uvite ndi li oshitopolwa shegongalo, ndi kale ndi uvite nda dhiminwa po nokaandi kale tandi ipula unene nepuko ndyoka nda ninga.” — Tala oshimpungu, “Oshike to vulu okuninga?”

INO SA UUNYE!

Satana ota ka tsikila okutula “omandangalati” mondjila yoye, opo kuu pondole okukala ishewe wu na uukuume wa kola naJehova. (Luk. 4:13) Kala aluhe we mu ilongekidhila, mokukala wu na eitaalo lya kola.

Shi na ko nasha noonzi dhe, Jehovah okwa uvaneka a ti: “Otandi ka konga ndhoka dha kana nokugalula ndhoka dha puka, otandi ka manga ndhoka dha teka nokupanga ndhoka tadhi alukwa.” (Hes. 34:16) Jehova okwa kwathela ooitaali oyendji mboka ya li monkalo ya fa yoye ya kale ishewe ye na ekwatathano ewanawa naye. Kala nuushili kutya okwa hala oku ku kwathela wu tsikile okukala wu na uukuume wa kola naye.

Oshike aakuluntugongalo taya vulu okuninga?

Aakuluntugongalo ohaya dhana onkandangala ya simana ngele tashi ya pokukwathela aauvithi mboka ya galulilwa megongalo ya kale ishewe ye na ekwatathano ewanawa naJehova. Ndhindhilika nkene taya vulu oku ya kwathela.

Ya shilipaleka. Omuyapostoli Paulus okwa li e shi kutya omuntu ngoka i iyela ombedhi otashi vulika a kale a ‘thindilwa pevi koluhodhi.’ (2 Kor. 2:7) Omathimbo gamwe otashi vulika a kale e uvite e na ondjo nokwa teka omukumo. Paulus okwa li a lombwele egongalo lyokuKorinto, a ti: ‘Mu dhiminii po noku mu hekeleka.’ Mboka ya galulilwa megongalo oya pumbwa okushilipalekwa kutya Jehova nosho wo ooitaali ooyakwawo oye ya hole noonkondo. Ngele aakuluntugongalo oya kala haye ya pandula noku ya kwathela, otashi vulu oku ya kwathela kaaya kale ya teka omukumo.

Galikana pamwe nayo. “Egalikano lyomuyuuki oli na oonkondo okuninga sha.” (Jak. 5:16) Larissa, ngoka a popiwa metetekelo, okwa ti: “Onda li nda lombwele aakuluntugongalo kombinga yomalimbililo gandje nosho wo shoka nda tila. Oya li ya galikana shi na ko nasha nangame, shono sha kwathele ndje ndi mone kutya inaya geela ndje. Oya li ya hala okukwathela ndje ndi kale ishewe ndi na ekwatathano ewanawa naJehova.” Theo okwa ti: “Omagalikano gaakuluntugongalo oga shilipaleke ndje kutya Jehova oku hole ndje noonkondo noha kala e wete iilonga yandje iiwanawa, ihe haambyoka iiwinayi ashike.”

Panga uukuume nayo. Mboka ya galulilwa megongalo oya pumbwa ookuume. Justin, ngoka e li omukuluntugongalo, okwa ti: “Kala ho ya hiya mu longe pamwe muukalele, naashoka sha simanenena, kala ho ke ya talela po komagumbo gawo. Omukuluntugongalo gwedhina Henry, okwa ti:“ Okupanga uukuume nayo okwa simana.” Omukuluntugongalo gulwe okwa ti: “Uuna yalwe megongalo ya mono aakuluntugongalo taya panga uukuume naamboka ya galulilwa megongalo, nayo otaya ka kambadhala okuninga sha faathana.”

Ya kwathela ya mone nkene ye na okukonakona Ombiimbeli paumwene. Kuume ngoka a pyokoka pambepo ota vulu okukwathela gumwe ngoka a galulilwa megongalo a kale e na ondjigilile yokukonakona Ombiimbeli paumwene. Omukuluntugongalo gwedhina Darko, okwa ti: “Ondi hole oku ya lombwela kombinga yomaliko gomOohapu dhaKalunga ngoka nda mona sho nda li tandi ningi ekonakonombiimbeli lyopaumwene noku ya ulukila nkene hashi etele ndje enyanyu. Ohandi ningi wo omalongekidho ndi konakone pamwe nayo uuyelele wontumba.” Omukuluntugongalo gulwe gwedhina Clayton, okwa ti: “Ohandi ya ladhipike ya konakone mOmbiimbeli kombinga yaapiya yaJehova mboka ya pita moonkalo dha fa dhawo.”

Kala omusita omuwanawa. Mboka ya galulilwa megongalo oya mona kutya aakuluntugongalo oye li aapanguli. Ihe ngashingeyi oya pumbwa okumona kutya omu li wo aasita. (Jer. 23:4) Kala ho ya pulakene neitulomo noku ya pandula. Kala ho popi nayo pandjigilile. Ndhindhilika shoka omukuluntugongalo gwedhina Marcus ha ningi uuna ta ningi omatalelopo guusita. Okwa ti: “Ohatu ya leshele enyolo tali tsu omukumo, hatu ya pandula noku ya shilipaleka kutya Jehova oku ya uvitile etumba sho ya longa nuudhiginini ya galukile kuye. Pehulilo lyetalelopo kehe, ohatu thigi twa kundathana kutya uunake ishewe tatu ya oku ya talela po.”

a Omadhina gamwe moshitopolwa shika oga lunduluka.