Ilonga okugalikana kuJehova tashi zi komutima

1-2. (a) Oshike tashi vulu oku twi imba tu lombwele Jehova nkene tu uvite lela? (b) Otu shi shi ngiini kutya Jehova oha pulakene komagalikano getu nomutima aguhe?

MBELA owe shi ndhindhilika kutya olundji oho galikana kuJehova kombinga yoshinima sha faathana lwiikando, noiho mu lombwele nkene wu uvite lela? Ngele osho, hangoye awike ho ningi ngawo. Molwaashoka atuheni ohatu kala twi ipyakidhila, otashi vulika tu kale hatu galikana meendelelo nopwaa na okugandja eitulomo komagalikano getu. Nenge otashi vulika hatu shi mono oshidhigu okulombwela Jehova nkene tu uvite lela, molwaashoka otu uvite kutya inatu gwana okupopya naye.

² Ombiimbeli otayi tu shilipaleke kutya shoka sha simana kuJehova kashi shi okugalikana kuye omagalikano omaleeleka, ihe okugalikana kuye neifupipiko tashi zi komutima. Oha uvu “omagalikano gaafupi.” (Eps. 10:​17) Oha pulakene nohole kukehe shimwe tatu mu lombwele, molwaashoka oku na ko nasha natse lela. — Eps. 139:​1-⁠3.

3. Oshike tatu ka kundathana moshitopolwa shika?

³ Otashi vulika twi ipule kutya: Omolwashike tatu vulu okugalikana kuJehova tu na einekelo kutya ote ke tu pulakena? Ongiini tatu vulu okugalikana momukalo ngoka tagu tu hedhitha popepi naJehova? Ongiini okutedhatedha komagalikano ngoka ge li mOmbiimbeli, taku vulu oku tu kwathela tu hwepopaleke omagalikano getu? Noshike tatu vulu okuninga ngele katu shi nkene tu na okulombwela Jehova nkene tu uvite lela? Natu ka taleni omayamukulo gomapulo ngoka.

GALIKANA KUJEHOVA WU NA EINEKELO

4. Oshike tashi vulu oku tu kwathela tu galikane kuJehova tu na einekelo kutya ote ke tu pulakena? (Episalomi 119:​145)

⁴ Ngele otwe shi uvu ko kutya Jehova oku li kuume omudhiginini ngoka a hala tu pondole, otatu ka kala twa manguluka okugalikana kuye tu na einekelo kutya ote ke tu pulakena. Omunyoli gwEpisalomi 119 okwa li a kambadhala okukala e na ekwatathano ewanawa lya tya ngawo naJehova. Okwa li e na uupyakadhi monkalamwenyo ye. Okwa li a lundilwa kaalumentu aakengeleli. (Eps. 119:​23, 69, 78) Okwa li wo e na okuungaunga nokwaagwanenena kwe. (Eps. 119:⁠5) Nonando ongawo, ka li a tila okulombwela Jehova omaiyuvo ge tashi zi komutima. — Lesha Episalomi 119:​145.

5. Omolwashike kaatu na okweetha omaiyuvo omawinayi ge twi imbe tu galikane kuJehova? Shi thaneka.

⁵ Jehova ota hiya nokuli naamboka ya ninga omapuko ga kwata miiti ya galikane kuye. (Jes. 55:​6, 7) Onkene katu na okweetha omaiyuvo omawinayi ge twi imbe tu galikane. Natu shi thaneke ngeyi: Omuhingindhila oku shi kutya ota vulu okukwatathana naamboka taya wilike oondhila, ngele okwa pumbwa ekwatho. Ihe mbela omuhingindhila ita ka kwatathana nayo molwaashoka a sa ohoni sho a kana, nenge molwaashoka a ninga epuko? Hasho nando! Momukalo gwa faathana, ngele omathimbo gamwe ohatu kala tu uvite twa kana nenge ngele otwa yona, otatu vulu okugalikana kuJehova tu na einekelo kutya ote ke tu pulakena. — Eps. 119:​25, 176.

NKENE TATU VULU OKUGALIKANA MOMUKALO NGOKA TAGU TU HEDHITHA POPEPI NAJEHOVA

6-7. Ongiini okudhiladhila komaukwatya gaJehova taku vulu oku tu kwathela tu lombwele Jehova nkene tu uvite lela? Gandja oshiholelwa. (Tala wo enyolo lyopevi.)

⁶ Ngele otwa popi naJehova twa manguluka, noku mu lombwela kombinga yomadhiladhilo getu gomeni nomaiyuvo getu gomuule, omagalikano getu ohaga kala ge na lela eityo. Oshike nduno tu na okuninga, opo tu galikane momukalo ngono?

⁷ Dhiladhila komaukwatya gaJehova.a Ngele otwa kala hatu dhiladhila komaukwatya ge, otatu ka vula oku mu lombwela kombinga yomadhiladhilo getu twa manguluka. (Eps. 145:​8, 9, 18) Tala koshiholelwa shaKristine, omumwameme ngoka e na he ngoka a li e hole elongithonkondo. Ota ti: “Kasha li oshipu kungame okupopya naJehova e li Tate. Onda li ndi uvite kutya okwaagwanenena kwandje otaku ke mu ningitha a kale kee hole ndje we.” Mbela uukwatya wuni waJehova wa li we mu kwathele? Ota ti: “Ohole yaJehova ihaayi lunduluka ohayi ningitha ndje ndi kale ndi uvite nda gamenwa. Ondi shi kutya ota kala aluhe pamwe nangame. Nonando ondi ninge omapuko, ota kala e hole ndje nota ka kwathela ndje. Shoka ohashi kwathele ndje ndi mu lombwele shoka hashi nyanyudha ndje lela nosho wo shoka hashi uvitha ndje nayi noonkondo.”

8-9. Uuwanawa wuni hawu zi mokudhiladhila kombinga yaashoka to ka popya manga inoo galikana? Shi thaneka.

⁸ Dhiladhila kwaashoka to ka popya. Manga inoo galikana, otashi vulika wi ipule omapulo gontumba. Pashiholelwa: ‘Mbela otandi ungaunga nuupyakadhi wontumba ngashingeyi? Opu na gumwe ngoka nda pumbwa okudhimina po? Mbela onda taalela eshongo epe nonda pumbwa ekwatho lyaJehova, opo ndi li sinde?’ (2 Aak. 19:​15-19) Otatu vulu wo okulandula oshiholelwa shoka Jesus a tula po, mokudhiladhila kombinga yaashoka tatu vulu okupula Jehova kombinga yedhina lye, yUukwaniilwa we nosho wo yehalo lye. — Mat. 6:​9, 10.

⁹ Sho omumwameme gwedhina Aliska a uvu kutya omusamane gwe oku na okankela yokuuluyi ndjoka tayi mu fala meso, osha li oshidhigu kuye okugalikana. Ota ti: “Onda li nda gwililwa po noonkondo, nonda li handi shi mono oshidhigu okudhiladhila nawa uuna tandi galikana.” Oshike she mu kwathela? Ota ti: ‘Manga inaandi galikana, ohandi kutha ominute omishona ndi tule omadhiladhilo gandje pehala, naashoka osha kwathela ndje ndi shilipaleke kutya omagalikano gandje itaga gandja owala eitulomo kungame.’ Omukalo ngoka ogwa kwathela ndje ndi kale nda ngungumana, nokukala ndi na omadhiladhilo ge li pehala sho tandi galikana.

10. Omolwashike tu na okukambadhala okugalikana uule wethimbo? (Tala wo omathano.)

¹⁰ Galikana uule wethimbo. Nonando omagalikano omahupi ohaga kala ge na eityo, ohashi kala unene oshipu kutse okulombwela Jehova omadhiladhilo getu gomeni, uuna tatu galikana uule wethimbo.b Omusamane gwAliska, Elijah, ota ti: “Ohandi kambadhala okugalikana lwiikando momukokomoko gwesiku, nonda hedha popepi naJehova shi vulithe nale sho handi galikana uule wethimbo.” Jehova iha kala a tegelela ndi mane okugalikana nziya, onkene ohandi kutha ethimbo lyandje. Kambadhala okuninga ngeyi: Konga ethimbo nehala ndyoka tali ku pitike wu galikane, tashi vulika nokuli wu shi ninge muule, oshoka kapu na omapiyagano. Shi ninga wo omukalondjigilile okugalikana uule wethimbo.

TEDHATEDHA KOMAGALIKANO NGOKA GE LI MOMBIIMBELI, OPO GE KU KWATHELE WU HWEPOPALEKE OMAGALIKANO GOYE

11. Ohatu mono mo ngiini uuwanawa mokudhiladhila komagalikano ga za komutima ngoka ge li mOmbiimbeli? (Tala wo oshimpungu “Mbela owu uvite ngaashi ya li ye uvite?”)

¹¹ Otashi vulika wu mone mo uuwanawa mokudhiladhila kombinga yomagalikano nomaimbilo omayapuki, nenge momapisalomi ngoka ge li mOmbiimbeli. Sho to konakona nkene aapiya yaKalunga ya li ye mu lombwele omadhiladhilo gawo gomuule, otashi ke kwi inyengitha wu lombwele Jehova shoka shi li momutima gwoye. Otashi vulika wo wu ka mone omautumbulilo omape gokutanga Jehova, ngoka to vulu okukwatela momagalikano goye. Notashi vulika wu ka mone omagalikano ngoka taga tsu kumwe nonkalo yoye.

12. Omapulo geni tatu vulu okwiipula sho tatu lesha kombinga yegalikano lyontumba ndyoka li li mOmbimbeli?

¹² Sho to lesha kombinga yegalikano lyontumba ndyoka li li mOmbimbeli, ipula ngeyi: ‘Olye a popya oohapu ndhika nokwa li monkalo yini? Mbela nangame ondi li monkalo ya fa ye? Oshike tandi vulu okwiilonga kegalikano ndino?’ Nonando otashi vulika wa pumbwa okuninga omapekapeko ga gwedhwa po, opo wu mone omayamukulo gomapulo ngoka, oto ka mona mo uuwanawa. Natu taleni kiiholelwa yimwe po.

13. Oshiholelwa shini shegalikano tatu vulu okwiilonga kuHanna? (1 Samuel 1:​10, 11) (Tala wo ethano.)

¹³ Lesha 1 Samuel 1:​10, 11. Sho Hanna a popi oohapu ndhika, okwa li a taalela uupyakadhi uyali uunene. Ka li ha mono aanona, nomukulukadhi omukwawo gwomusamane gwe okwa li he mu hindi. (1 Sam. 1:​4-⁠7) Ngele owa taalela uupyakadhi mboka hawu ningitha onkalamwenyo yi kale ondhigu kungoye, oshike to vulu okwiilonga koshiholelwa shaHanna? Okwa li a mono epepelelo sho a kala ha galikana uule wethimbo nokulombwela Jehova kombinga yuudhigu we. (1 Sam. 1:​12, 18) Natse otatu vulu okumona epepelelo uuna twa ‘fala uudhigu [wetu] kOmuwa.’ — Eps. 55:⁠22.

14. (a) Oshike ishewe tatu vulu okwiilonga koshiholelwa shaHanna? (b) Ongiini tatu vulu okukaleka omagalikano getu ge na eityo mokutedhatedha kOmanyolo? (Tala enyolo lyopevi.)

¹⁴ Konima yomimvo omishona sho omwanamati Samuel a valwa, Hanna okwa li e mu fala kOmuyambi Omunene Eli. (1 Sam. 1:​24-28) Okupitila megalikano lya za komutima, Hanna okwa li a popi a tompwa kutya Jehova oha gamene noha sile oshimpwiyu aapiya ye aadhiginini.c (1 Sam. 2:​1, 8, 9) Otashi vulika uupyakadhi we kegumbo inaawu za po, ihe Hanna okwa li a gandja eitulomo kunkene Jehova e mu yambeka. Oshiilongomwa oshini kutse? Otatu ka vula okwiidhidhimikila uupyakadhi mboka tu li muwo, ngele otwa gandja eitulomo kunkene Jehova a kala noku tu yambidhidha sigo oompaka.

15. Uuna twa taalela okwaanuuyuuki, oshike tatu vulu okwiilonga kegalikano lyomuhunganeki Jeremia? (Jeremia 12:⁠1)

¹⁵ Lesha Jeremia 12:⁠1. Pompito yimwe monkalamwenyo ye, omuhunganeki Jeremia okwa li a teka omukumo sho e wete aakolokoshi taye shi enditha nawa. Okwa li wo a teka omukumo omolwomukalo moka Aaisraeli ya li haya ungaunga naye. (Jer. 20:​7, 8) Ohatu kala tu uvite ko omaiyuvo ge uuna twa mono nkene aantu mboka kaaye shi aanashili taya humu komeho, nenge uuna tatu shekwa. Nonando Jeremia okwa li a holola nkene e uvite, ka li a lundile Jehova kutya ke shi omuyuuki. Naasho a mono nkene Jehova ta pe oshigwana she oshitangalali uutekuvuliko, einekelo lye muuyuuki we olina okukala lya li lya kolo shi vulithe nale. (Jer. 32:​19) Natse otatu vulu wo okulombwela Jehova megalikano kombinga yomaiyuvo getu, tu na einekelo kutya pethimbo lye lyu uka, ota ka ninga po sha kombinga yokwaanuuyuuki hoka hatu taalele kunena.

16. Ngele ohatu kala tu uvite twa ngambekwa mwaashoka tatu vulu okuninga, oshike tatu vulu okwiilonga kOmulevi ngoka a li muupongekwa? (Episalomi 42:​1-⁠4) (Tala wo omathano.)

¹⁶ Lesha Episalomi 42:​1-⁠4. Eimbilo ndika olya nyolwa kOmulevi ngoka a li muupongekwa, noka li ta vulu okweendathana nooitaali ooyakwawo. Episalomi lye otali holola nkene a li e uvite. Otatu vulu okuuva ko nkene a li e uvite, ngele ihatu vulu okuza mo momagumbo getu, nenge ngele otwa tulwa mondholongo omolweitaalo lyetu. Omathimbo gamwe otashi vulika tu kale tu li nawa, omanga omathimbo gamwe otwa teka omukumo. Kutya nduno otu uvite ngiini, otwa pumbwa okulombwela Jehova megalikano kombinga yomaiyuvo getu. Shika otashi vulu oku tu kwathela tu konakone omadhiladhilo getu notu kale tu na etaloko ewanawa lyiinima. Pashiholelwa, Omulevi okwa li a ndhindhilike kutya oku na oompito odhindji dhokutanga Jehova. (Eps. 42:⁠5) Okwa li wo a dhiladhila kunkene Jehova a li te mu sile oshimpwiyu. (Eps. 42:⁠8) Okugalikana kuJehova twa mana mo otaku vulu oku tu kwathela tu uve ko omaiyuvo getu, tu kale tu na ombili ishewe, notu kale tu na oonkondo dhokwiidhidhimika.

17. (a) Oshike tatu vulu okwiilonga kegalikano lyomuhunganeki Jona? (Jona 2:​1, 2) (b) Ongiini omautumbulilo gamwe okuza mOmapisalomi taga vulu oku tu kwathela uuna twa taalela omaupyakadhi? (Tala wo enyolo lyopevi.)

¹⁷ Lesha Jona 2:​1, 2. Omuhunganeki Jona okwa li a galikana egalikano ndika sho a li mela lyohi onene. Nonando ka li a vulika kuJehova, Jona okwa li e na einekelo kutya Kalunga ota ka uva ewi lye. Megalikano lye, Jona okwa li a longitha omautumbulilo ogendji ngoka taga adhika mOmapisalomi.d Otashi vulika a li e shi nawa Omapisalomi ngoka. Sho a dhiladhila kombinga yago, okwa li e uvite a shilipalekwa kutya Jehova ote ke mu kwathela. Sha faathana, ngele otwa kambadhala okwiilonga momutse oovelise dhimwe dhOmbiimbeli, otashi vulika tu ke dhi dhimbulukwe, notadhi ke tu hekeleka uuna tatu galikana kuJehova sho tu li muudhigu.

TSIKILA OKUHEDHA POPEPI NAJEHOVA OKUPITILA MEGALIKANO

18-19. Ngele omathimbo gamwe ihatu kala tu shi shoka tu na okulombwela Jehova uuna tatu galikana, eshilipaleko lini tatu adha mAaroma 8:​26, 27? Gandja oshiholelwa.

¹⁸ Lesha Aaroma 8:​26, 27. Omathimbo nomathimbo otashi vulika tu kale twa gwililwa po kiimpwiyu noihatu kala tu shi nkene tu na okulombwela Jehova nkene tu uvite. Ihe otu na ekwatho. Momathimbo ga tya ngawo, ombepo Ondjapuki yaKalunga ohayi tu “galikanene”. Ngiini mbela? Okupitila mombepo ye, Jehova okwa ningitha omagalikano ogendji ga nyolwe mOohapu dhe. Uuna itaatu vulu okupopya nkene tu uvite lela, Jehova otashi vulika a taambe ko omautumbulilo gontumba taga adhika momagalikano ngoka, ge li onga iinima mbyoka twa hala okugalikana kombinga yawo, notashi vulika e ga yamukule.

¹⁹ Oshinima shoka osha li sha kwathele omumwameme gwokoRusia, gwedhina Yelena. Okwa li a kwatwa po molwokugalikana nokulesha Ombiimbeli. Yelena okwa li a gwililwa po nokwa li he shi mono oshidhigu okugalikana. Okwa ti: “Onda li handi dhimbulukwa kutya uuna ndi uvite nda gwililwa po noka ndi shi shoka ndi na okugalikana kombinga yasho, Jehova ota ka taamba ko omagalikano ga nwethwa mo gaapiya yaKalunga yomonakuziwa . . . ge li onga iinima mbyoka nda hala okugalikana kombinga yawo. . . . Shoka osha li hashi hekeleke ndje unene sho nda li monkalo ndjoka ondhigu noonkondo.”

20. Ongiini tatu vulu okulongekidha omadhiladhilo getu manga inaatu galikana, uuna twa gwililwa po?

²⁰ Uuna twa gwililwa po, otashi vulika shi kale oshidhigu okugandja eitulomo sho tatu galikana. Opo tu longekidhe omadhiladhilo getu, otatu vulu okupulakena komawi ga kwatwa gOmapisalomi. Otatu vulu wo okumbumbulila Jehova omaiyuvo getu moku ga nyola, ngaashi Omukwaniilwa David a li a ningi. (Eps. 18; 34; 142, enyolo lyopombanda.) Odhoshili kutya kapu naanaa oompango dhankene tu na okwiilongekidha manga inaatu galikana. (Eps. 141:⁠2) Ninga shoka shi li hwepo kungoye.

21. Omolwashike tatu vulu okugalikana nomutima gwetu aguhe?

²¹ Ohashi hekeleke omitima dhetu okukala tu shi kutya Jehova oku uvite ko omaiyuvo getu nokuli manga inaatu popya sha. (Eps. 139:⁠4) Nonando ongawo, ohashi mu nyanyudha okuuva sho tatu mu lombwele nkene tu uvite nonokutya otwe mu inekela shi thike peni. Onkee ano, ino kakadhala okugalikana kuHo gwomegulu. Longitha omagalikano ngoka taga adhika mOmbiimbeli ge ku kwathele wu galikane kuJehova. Galikana nomutima gwoye aguhe. Mu lombwela kombinga yaashoka hashi ku uvitha nayi naashoka hashi ku nyanyudha. E li kuume koye kashili, Jehova ota kala aluhe noku ku kwathela!