Dhimbulukwa okukwatela yalwe momagalikano goye

1. Otu shi shi ngiini kutya omagalikano getu oga simana kuJehova?

EGALIKANO oli li elongekidho ewanawa lela. Dhiladhila kwaashika: Jehova okwa gandja iinakugwanithwa yontumba kaayengeli. (Eps. 91:11) Okwa pa wo Omwana iinakugwanithwa ya simana noonkondo. (Mat. 28:18) Ihe mbela, okwa pa gulwe oshinakugwanithwa shokupulakena komagalikano getu? Aawe, shono oshinima Jehova oye awike a hogolola okuninga. Jehova, ‘omuuvi gwomagalikano,’ oha pulakene kutse ye mwene. — Eps. 65:2.

2. Omuyapostoli Paulus okwa tula po oshiholelwa shini shi na ko nasha nokukwatela yalwe momagalikano getu?

² Nonando otatu vulu okugalikana kuJehova tse yene kombinga yiimpwiyu yetu, otwa pumbwa wo okukwatela yalwe momagalikano getu. Shoka osho omuyapostoli Paulus a li a ningi. Pashiholelwa, okwa li a nyolele egongalo lyomuEfeso, a ti: “Ngame otandi tsikile oku mú kwatela momagalikano gandje.” Paulus okwa li wo ha kwatele yalwe momagalikano ge pauhandimwe. Pashiholelwa, okwa li a lombwele Timoteus, a ti: “Otandi pandula Kalunga, . . . noihandi dhimbwa oku ku kwatela momaindilo gandje omutenya nuusiku.” (2 Tim. 1:3) Paulus okwa li e na iimpwiyu ye mwene mbyoka e na okugalikana kombinga yawo. (2 Kor. 11:23; 12:7, 8) Nonando ongawo, okwa li a kutha ethimbo a kwatele yalwe momagalikano ge.

3. Omolwashike tashi vulika tu dhimbwe okukwatela yalwe momagalikano getu?

³ Omathimbo gamwe otashi vulika tu dhimbwe okukwatela yalwe momagalikano getu. Omolwashike mbela? Omumwameme omuKriste gwedhina Sabrina,a ota gandja etompelo limwe kutya omolwashike? Ota ti: “Ohatu kala twi ipyakidhila unene. Otashi vulika tu kale tatu gandja unene eitulomo kuupyakadhi wetu, e tatu kala owala tatu galikana kombinga yoompumbwe dhetu yene.” Mbela owa ndhindhilika oshinima shono mungoye? Ngele osho, oshitopolwa shika otashi vulu oku ku kwathela. (1) otashi ka yelitha kutya omolwashike sha simana okukwatela yalwe momagalikano getu (2) otashi ka gandja omaetopo kutya ongiini tatu vulu okuninga ngawo.

OMOLWASHIKE WU NA OKUKWATELA YALWE MOMAGALIKANO GOYE?

4-5. Ongiini okukwatela yalwe momagalikano getu taku vulu okukala ‘ku na oonkondo dhokuninga sha’? (Jakob 5:16)

⁴ Okukwatela yalwe momagalikano getu ‘oku na oonkondo dhokuninga sha’ (Lesha Jakob 5:16.) Mbela okukwatela yalwe momagalikano getu otaku vulu ngaa shili okulundulula onkalo yontumba? Eeno, otaku vulu. Jesus, okwa li e shi kutya masiku Petrus ote ke mu idhimbika, nonando ongawo, okwa ti kuye: “Onde ku galikanena nda mana mo, opo eitaalo lyoye lyaa nkundipale.” (Luk. 22:32) Paulus okwa li wo e shi kutya egalikano otali vulu okweeta po elunduluko. Sho a li a tulwa mondholongo muRoma kaashi li pauyuuki, okwa nyolele Filemon, a ti: “Ondi na einekelo kutya omolwomagalikano geni, otandi ka galulilwa kune.” (Filem. 22) Naashoka osho sha ningwa, ano Paulus okwa li a mangululwa nokwa li a vulu ishewe okuuvitha.

⁵ Shino inashi hala nduno okutya, otatu ka thiminika Jehova a ninge kehe shimwe shoka tatu mu pula megalikano. Oha kala e wete iimpwiyu mbyoka aapiya ye ye na, nomathimbo gamwe oha hogolola oku ya kwathela. Okukala tu shi oshinima shoka, otashi ke tu kwathela tu galikane kuJehova twa mana mo kombinga yoshinima kehe nokweethela iinima momake ge. — Eps. 37:5, tala Aakorinto aatiyali 1:11.

6. Ongiini okukwatela yalwe momagalikano getu taku vulu okuguma omukalo moka hatu kala tu ya uvitile? (1 Petrus 3:8)

⁶ Okukwatela yalwe momagalikano getu ohaku tu kwathele tu kale tu na “ohenda.” (Lesha 1 Petrus 3:8.) Okukala wu na ohenda otashi ti kutya okukala wu shi kombinga yuupyakadhi womuntu nokukala wu na ehalo lyoku mu kwathela. (Mark. 1:40, 41) Omukuluntugongalo gwedhina Michael, ota ti: “Uuna tandi galikana kombinga yomaupyakadhi gayalwe, ohandi tseya nawa kombinga yaashoka taya kondjo nasho, naashoka ohashi ningitha ndje ndi kale ndi ya hole shi vulithe nale. Ohandi kala ndi uvite ndi li popepi nayo, nonando otashi vulika ya kale kaaye shi shi.” Omukuluntugongalo gwedhina Richard ota yelitha kombinga yuuwanawa wumwe ishewe. Ota ti: “Uuna twa kwatele gumwe momagalikano getu, ohatu kala twa hala okuninga sha tu mu kwathele.” Okwa gwedha ko a ti: “ Uuna twa gandja ekwatho tali longo kugumwe ngoka twa kwatela momagalikano getu, ohashi kala sha fa tatu kwathele mokuyamukula sho twe mu kwatela megalikano lyetu.”

7. Ongiini okukwatela yalwe momagalikano getu haku tu kwathele tu kale tu na etaloko lyuupyakadhi wetu li li pandjele? (Aafilippi 2:3, 4) (Tala wo omathano.)

⁷ Okukwatela yalwe momagalikano getu ohaku tu kwathele kaatu kale owala tatwi ipula nuupyakadhi wetu. (Lesha Aafilippi 2:3, 4.) Kehe gumwe gwomutse ota kondjo nuudhigu wontumba, molwaashoka otu li muuyuni mboka tawu pangelwa kOndiyapoli. (1 Joh. 5:19; Eh. 12:12) Ngele otwe shi ningi omukalondjigilile gwokukwathela yalwe momagalikano getu, ohashi tu dhimbulukitha kutya ‘ooitaali ooyakwetu yomuuyuni auhe otaa pitile momahepeko ogo tuu ngoka.’ (1 Pet. 5:9) Omumwameme omukokolindjila, gwedhina Katherine, ota ti: “Okukwatela yalwe momagalikano gandje, ohashi dhimbulukitha ndje kutya yalwe nayo oya taalela omashongo. Shoka ohashi kwathele ndje kaandi kale tandi gandja unene eitulomo kuupyakadhi wandje mwene.”

OYA PUMBWA OMAGALIKANO GETU

8. Gandja iiholelwa yaamboka tatu vulu okukwatela momagalikano getu.

⁸ Oolye tatu vulu okukwatela momagalikano getu? Otatu vulu okukwatela momagalikano getu oongundu dhaantu. Pashiholelwa, aantu mboka ye na uuwehame wontumba, aagundjuka mboka ya taalela omasheko nomathiminiko koomakula kosikola nosho wo mboka ya taalela omashongo omolwuukokele. Oyendji yomooitaali ooyakwetu otayi idhidhimikile omapataneko okuza kaakwanezimo, nenge kaakwanepangelo. (Mat. 10:18, 36; Iil. 12:5) Yamwe yomaamwatate oya thiga po omagumbo gawo omolwomakuyunguto mopolotika. Yamwe oye li iihakanwa yiiponga yopaunshitwe. Otashi vulika tu kale kaatu shi aamwatate naamwameme mboka nawa. Ihe uuna tatu ya kwatele momagalikano getu, ohatu ulike kutya ohatu vulika koshipango shaJesus tu ‘kale tu holathane.’ — Joh. 13:34.

9. Omolwashike tu na okukwatela momagalikano getu mboka taya kwatele komeho mehangano lyaJehova nosho wo aakulukadhi yawo?

⁹ Otatu vulu wo okukwatela momagalikano getu mboka taya kwatele komeho mehangano lyaJehova. Aantu mboka oya kwatela mo Iilyo yOlutuwiliki naakwatheli yawo, Ookomitiye dhiitayimbelewa, aatonateli kiitayimbelewa, aatonatelishikandjo, aakuluntugongalo nosho wo aayakuligongalo. Oyendji yomaamwatate mbaka otaya ungaunga niimpwiyu yawo, sho taya ningi omaiyambo ye tu kwathele. (2 Kor. 12:15) Pashiholelwa, omutonatelishikandjo gwedhina Mark, ota ti: “Limwe lyomomashongo gandje omanene olyo okukala ndi li kokule naavali yandje mboka aakokele. Ayehe oye na uukolele tawu nyangwanyangwa. Nonando omumwayinakadhona gwandje nomusamane gwe ohaye ya sile oshimpwiyu, ohashi uvitha ndje nayi sho ihaandi vulu okuninga oshindji ndi ya kwathele.” Kutya nduno otu shi iimpwiyu mbyoka aamwatate mbaka haya longo nuudhiginini ye na nenge hasho, otwa pumbwa oku ya kwatela momagalikano getu. (1 Tes. 5:12, 13) Otatu vulu wo okukwatela momagalikano getu aakulukadhi yaamwatate mbaka, oshoka ohaya yambidhidha nuudhiginini aasamane yawo, naashoka ohashi ya kwathele ya tsikile nokugwanitha po iinakugwanithwa yawo.

10-11. Mbela Jehova oha pulakene ngaa komagalikano getu, nonando inatu tumbula kondandalunde omadhina gaamwatate naamwameme? Shi yelitha.

¹⁰ Ngaashi twe shi kundathana, olundji ohatu kwatele momagalikano getu oongundu dhaamwatate naamwameme. Pashiholelwa, nopwaa na okutumbula edhina lyomuntu gwontumba kondandalunde, ohatu galikana kuJehova a kwathele mboka ye li moondholongo, nenge a hekeleke mboka ya silwa aantu mboka ye hole. Omukuluntugongalo gwedhina Donald, ota ti: “Otu na aamwatate naamwameme oyendji mboka ye na omaudhigu ogendji, nomathimbo gamwe ohatu galikana membwalangandjo, opo tu kwatele mo ayehe mboka taya mono iihuna.”

¹¹ Mbela Jehova oha pulakene komagalikano ga tya ngawo? Eeno! Ihatu kala naanaa tu shi shoka ooitaali ooyakwetu ayehe ya pumbwa kondandalunde. Onkene osha simana okugalikana membwalangandjo kombinga yaamwatate naamwameme. (Joh. 17:20; Ef. 6:18) Omagalikano ngoka ohaga gandja uumbangi kutya otu ‘hole ooitaali ooyakwetu.’ — 1 Pet. 2:17.

UUNA TATU KWATELE YALWE MOMAGALIKANO GETU PAUHANDIMWE

12. Ongiini okukala hatu konenene taku vulu oku tu kwathela tu kale hatu galikana kondandalunde?

¹² Kala ho konenene. Kakele owala kokukwatela oongundu dhaamwatate naamwameme momagalikano getu, otwa pumbwa wo okukwatela momagalikano getu oohandimwe tatu ya tumbula komadhina. Mbela megongalo lyeni omu na gumwe ngoka ta kondjo nomukithi gwa kalelela? Mbela owu shi omugundjuka gwontumba ngoka a gwilililwa po, tashi vulika molwomashongo ngoka ha taalele kosikola? Mbela owu shi omuvali ngoka ta putudha omwana oye awike, ta nyengwa ‘oku mu putudha noku mu dheula metsokumwe newiliko lyaJehova’? (Ef. 6:4) Ngele owa kala ho konenene, oto ka kala wu na ko nasha unene nayalwe, shoka tashi ka koleka ehalo lyoye lyoku ya kwatela momagalikano goye.b — Rom. 12:15.

13. Ongiini tatu vulu okukwatela momagalikano getu aantu mboka kaatu shi nawa?

¹³ Kwatela yalwe momagalikano goye to ya tumbula komadhina. Otatu vulu oku shi ningila nokuli naamboka inaatu tsakanena nayo nando onale. Pashiholelwa, dhiladhila kombinga yaamwatate naamwameme mboka ye li mondholongo momahala ngaashi Krimea, Eritrea, Rusia nomoSingapore. Kepandja lyetu lyo-jw.org, oto vulu okwaadha ko omadhina gaamboka ye li mondholongo.c Omutonatelishikandjo gwedhina Brian, ota ti: “Onda mona kutya okunyola edhina lyomwiitaali omukwetu ngoka e li mondholongo noku li tumbula muule, ohashi kwathele ndje ndi mu dhimbulukwe noku mu kwatela momagalikano gandje gopaumwene.”

14-15. Ongiini tatu vulu okupula Jehova ekwatho lyokondandalunde?

¹⁴ Pula ekwatho lyokondandalunde. Michael, ngoka a popiwa metetekelo ota gandja eetopo ndika: “Uuna tandi lesha omahokololo gaamboka ye li mondholongo ko-jw.org, ohandi kambadhala okudhiladhila kutya andola ongame nda li monkalo yawo, ando ondi uvite ngiini. Ondi shi kutya otandi ka kala tandi ipula nomukulukadhi gwandje, notandi ka kala nda hala okushilipaleka kutya ota ka silwa oshimpwiyu. Onkene shono ohashi kwathele ndje ndi kwatele mo oshinima shontumba kondandalunde, momagalikano gandje gaamwatate mboka ya hokana ye li moondholongo.” — Heb. 13:3.

¹⁵ Uuna hatu dhiladhila kutya onkalo yakehe esiku yaamwatate mboka ye li mondholongo oyi li ngiini, ohashi tu kwathele tu konge omikalo dhimwe, opo tu galikane kondandalunde. Pashiholelwa, otatu vulu okugalikana opo aatonateli yondholongo ya ungaunge nohenda nayo nosho wo mboka ye na oonkondopangelo ya pitike aamwatate ya longele Jehova ya manguluka. (1 Tim. 2:1, 2) Otatu vulu okugalikana opo egongalo lyomoshitopolwa lyi ilonge uulaadhi kiiholelwa yaamwatate aadhiginini mboka ye li mondholongo, nenge opo mboka kaaye shi ooitaali ya mone eihumbato ewanawa lyaamwatate mboka ye li mondholongo nokupulakena ketumwalaka lyetu. (1 Pet. 2:12) Otatu vulu okuninga sha faathana, uuna tatu kwatele momagalikano getu aamwatate naamwameme mboka tayi idhidhimikile omashongo gamwe gi ili. Ngele otwa kala hatu konenene, hatu kwatele yalwe momagalikano getu tatu ya tumbula komadhina, nokupula ekwatho lyokondandalunde, kungawo otatu ulike kutya otatu ‘gwedha ko kohole yetu yokuholathana’. — 1 Tes. 3:12.

OKUKALA TU NA ONDJELE MOMAGALIKANO GETU

16. Ongiini tatu vulu okukala tu na ondjele momagalikano getu? (Mateus 6:8)

¹⁶ Ngaashi twe shi mono, omagalikano getu ohaga vulu okweeta po elunduluko monkalo yontumba. Ihe otwa pumbwa okukala tu na ondjele. Uuna tatu galikana, itatu lombwele Jehova kombinga yoshinima shoka kee shi nale, noinatu pumbwa oku mu pa omayele gankene e na okuungaunga nonkalo yontumba. Jehova oku shi shoka aapiya ye ya pumbwa nokuli manga inaaye shi tseya, nenge inaatu shi tseya. (Lesha Mateus 6:8.) Omolwashike nduno tu na okukwatela yalwe momagalikano getu? Kakele owala komatompelo ngoka ge etwa mo moshitopolwa shika, aantu mboka ye na ko nasha nayalwe osho haya ningi ngaaka. Ohole ohayi twi inyengitha tu kwatele yalwe momagalikano getu. Na Jehova oha kala a nyanyukwa okumona sho aapiya ye ta ya ulike ohole ye.

17-18. Okukwatelwa ooitaali ooyakwetu momagalikano getu otatu vulu oku ku yelekanitha nashike?

¹⁷ Nonando omagalikano getu oga monike ga fa itaaga eta po elunduluko lyasha monkalo yontumba, ohaga ulike kutya otu hole aamwatate naamwameme, na Jehova ohe shi ndhindhilike. Natu shi thaneke ngeyi? Dhiladhila kaaihokani mboka ye na aanona yaali, okamati nokakadhona. Okamati oke li mombete taka ehama. Okakadhona oki indile he taka ti: “Alikana tate ninga po sha wu kwathele okamwayinamati kandje. Oshoka otaka ehama lela!” He ota ningi po sha nale kombinga yonkalo ndjoka, oshoka oku hole okamwanamati note ka sile nawa oshimpwiyu. Nonando ongawo, tate omuvali okwa nyanyukwa lela sho e wete okamwanakadhona hoka okashona ke na ko nasha lela nokamwayinamati, naasho ka pula he a kwathele okamwayinamati.

¹⁸ Momukalo gwa faathana, Jehova ohe tu ladhipike tu ninge sha faathana, ano tu kale tu na ko nasha nayakwetu noku ya kwatela momagalikano getu. Uuna tatu ningi ngawo, omagalikano getu ohaga ulike kutya katu na ko nasha owala noompumbwe dhetu, ihe otu na ko wo nasha nayakwetu, na Jehova oha gandja eitulomo kwaashoka. (2 Tes. 1:3; Heb. 6:10) Shimwe ishewe, ngaashi twe shi kundathana, poompito dhimwe, omagalikano getu otaga vulu okweeta po elunduluko monkalo yontumba. Onkee ano natu ningeni ngaashi tatu vulu tu kale hatu dhimbulukwa okukwatela yalwe momagalikano getu.