Omuti ngele gwa kewa po otagu vulu ngaa okututuma?

OMUTI gwolumono gwe endeka otashi vulika gu kale itaagu monika lela nawa, ngele owe gu yelekanitha nomuti gwomusendeli gwokuLibanona. Ihe omuti gwolumono ohagu vulu okukala nomwenyo nomoonkalo oondhigu. Omiti dhimwe dhoomono ohadhi vulu okukala nomwenyo uule woomvula 1 000 lwaampo. Omidhi dhadho ohadhi mene dha ya mevi muule. Ohadhi vulu okututuma nokuli nando ekota lyadho oli kewe po thiluthilu, shampa owala omidhi dhadho dhi na omwenyo.

Job, omulumentu omutilikalunga, okwa li e na einekelo kutya nokuli nando ona se, ota ka kala ishewe e na omwenyo. (Job 14:13-15) Okwa li a longitha oshiholelwa shomuti, opo u ulike kutya okwi inekela kutya Kalunga oku na oonkondo dhoku mu yumudha kuusi. Okwa ti: “Nomuti wo ogu na etegameno: ngele tagu kewa po, otagu tsapuka ishewe.” Otashi vulika Job a li ta popi kombinga yomuti gwolumono. Konima yoluteni oshithindi sholumono ohashi tsapuka ishewe “iitayi iipe,” ngele osha lokwa. —  Job 14:7-9.

Ngaashi naanaa mwene gwoshikunino ha kala a halelela okumona omuti gwe gwolumono ngoka gwa li gwa kewa po tagu tutuma, Jehova Kalunga naye oku na ehalo lyokuyumudha aapiya ye nosho wo yalwe mboka ya sa. (Mat. 22:31, 32; Joh. 5:28, 29; Iil. 24:15) Dhiladhila owala enyanyu mpoka tali ka kala li thike sho tatu ka hambelela aaholike yetu mboka ya sa sho taya ka yumuka.