Olye ta ka hupitha aakwashigwana? — Ombiimbeli otayi ti ngiini?

Oonkundana okuza kIigwana ya Hangana odha ti:

• Okuza mo 7-23 Kotoba 2023, omahilathano ngoka ga tukuka pokati kaGasa naIsraeli, oga etitha eso lyaantu ye vulithe 6 400 naantu ya konda po 15 200 oya ehamekwa. Oyendji yomaantu mboka aakwashigwana. Shimwe ishewe, onkalo ndjoka oya thiminika aantu omayovi omathele ya thige po omagumbo gawo.

• Sho kwa ka thikwa mo 24 Septemba 2023, aakwashigwana ye li 9 701 oya dhipagelwa miita mbyoka yi li pokati kaRusia naUkraine, yo 17 748 oya ehamekelwa mo.

Mbela Ombiimbeli otayi gandja etegameno lini kwaamboka ya mona iihuna omolwiita?

Omolwashike tu na okukala netegameno?

Ombiimbeli oya hunganeka kutya Kalunga ota ka “hulitha po omalugodhi kombanda yevi alihe.” (Episalomi 46:9) Ota ka longitha epangelo lye lyomegulu, nenge tu tye uukwaniilwa we, a pingene po omapangelo agehe gopantu. (Daniel 2:44) Uukwaniilwa waKalunga owo owala tawu ka etela aantu ayehe epepelelo.

Tala shoka Jesus Kristus, omukwaniilwa gUukwaniilwa waKalunga, ta ka ninga:

• “Ota hupitha ohepele ngo te mu lilile, omuthiminikwa ngo kee na ngo te mu kwatha. Ota sile oshimbembe nohepele olukeno note ya hupitha meso. Ote ya hupitha methiminiko nomepiyagano.” — Episalomi 72:12-14.

Okupitila mUukwaniilwa we, Kalunga ota ka kutha po omahepeko nosho wo okumona iihuna hoka kwa etithwa kiita nokuukolokoshi.

• “Oye ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.” — Ehololo 21:4.

Masiku Uukwaniilwa waKalunga otawu ka eta omalunduluko omanene kombanda yevi. Ombiimbeli oya hunganeka kutya otatu ka uva “iita nosho wo oonkundana kombinga yiita,” oshinima shoka tu wete tashi ningwa kunena. (Mateus 24:6) Iiningwanima mbika nosho wo yilwe otayi ulike kutya otu li ‘momasiku gahugunina’ gomapangelo gopantu. — 2 Timoteus 3:1, OB-1954.