Iita nosho wo elunduluko lyonkalo yombepo, oya ningitha iikulya yi kale ya pumba muuyuni awuhe — Ombiimbeli otayi ti ngiini?

Iita moUkraine nosho wo elunduluko lyonkalo yombepo, otayi tsikile okungambeka iikulya kaayi andjaganekwe muuyuni. Shika osha guma unene iilongo mbyoka inaayi putuka, moka oyendji haye shi mono oshidhigu okumona iikulya.

• Momasiku 17 Juli 2023, amushangandjayi gwIigwana ya Hangana, António Guterres, okwa ti: “Omaipumomumwe, elunduluko lyonkalo yombepo, ondando yolusheno niikwawo yilwe, oya ya moshipala oonkambadhala dhokuninga iikulya noku yi andjaganeka.”

• Momasiku 23 Juli 2023, oshikundaneki shedhina Atalayar.com, osha ti: “Ookapyoko oya tengeneke kutya sho Rusia i ikutha mo meuvathanotsokumwe lyokutuma iikwamuma, osha nayipaleke onkalo muuyuni yi na ko nasha niikulya, nosha etitha elondo lyoondando dhiikulya miilongo mbyoka inaayi putuka, unene tuu muAfrika lyomUumbangalantu nosho wo mUuzilo woPokati.”

Tala shoka Ombiimbeli tayi ti kombinga yondjala noyonakuyiwa.

Ombiimbeli oya hunganeka kutya otaku ka kala ondjala

• Jesus okwa hunganeka a ti: “Iigwana otayi ka kondjithathana, niilongo otayi ka ponokelathana, notaku ka kala ondjala.” — Mateus 24:7.

• EmboMbiimbeli lyEhololo olya popya aakayili yuukambe yane yopathaneko. Gumwe gwomuyo ota thaneke iita. Okwa landulwa komukayili omukwawo ngoka ta thaneke ondjala yekomba, ano ethimbo ndyoka iikulya tayi ka kala ya pumba noyi na ondilo. “Onda tala nonda mono ko okakambe okaluudhe. Omukayili gwako okwa li e na oshiviha moshikaha she. Ngame ondu uvu ewi . . . lya ti: ‘Okatungwa kiilyawala oke thike pondjambi yomesiku [nosho] wo uutungwa utatu womahangu.” — Ehololo 6:5, 6.

Omahunganeko gOmbiimbeli kombinga yondjala, otaga gwanithwa po ngashingeyi methimbo ndika Ombiimbeli tayi li ithana ‘omasiku gahugunina.’ (2 Timoteus 3:1) Opo wu ilonge oshindji kombinga ‘yomasiku gahugunina’ nosho wo yaakayili yuukambe yane, mboka ya popiwa mEhololo, tala okavidio Uuyuni owa lunduluka okuza mo 1914 ngoye lesha wo oshitopolwa “Aakayili yuukambe yane oolye?”

Nkene Ombiimbeli tayi vulu oku ku kwathela

• MOmbiimbeli omu na omayele taga longo, ngoka taga vulu oku tu kwathela tu ungaunge noonkalo oondhigu, mwa kwatelwa oondando dhiikulya tadhi londo nenge nokuli ondjala. Tala iiholelwa yimwe moshitopolwa “How to Live on Less.”

• Ombiimbeli oye tu pa wo etegameno ndyoka kutya oonkalo otadhi ka lundulukila kuuwanawa. Oya uvaneka kombinga yethimbo uuna kevi taku ka kala “eloolo lyiilya” nakehe gumwe ota ka kala e na iikulya oyindji. (Episalomi 72:16) Opo wu ilonge oshindji kombinga yetegameno ndika lyonakuyiwa nosho wo kutya omolwashike wu na oku li inekela, lesha oshitopolwa “A Real Hope for a Better Tomorrow.”