Wupulula

15 Kaahoona wirimu eneneeryo ekina, etokotoko ni yootikhiniha: Ankeelo athanu napiili ni ipahu thanu napiili. Iha ti sookuchula, ntakhara moorweela wa seiha tenamalihiwaaya esara ya Muluku.

2 Kaahoona echu ntoko ephareya ya eviitru yaakanyeriwe ni mooro, nave yaale anamvootha mwaaxinama awoopiha, eruku awe ni nuumuru na nsina nawe yeemenle muxerexere wa ephareya ya eviitru, yaapharenle achakare a Muluku. 3 Awo yaaniipa ncipo na Mose, namuteko a Muluku, ni ncipo na Mwaasaana Eepucepuche, eriki:

“Mitokotoko ni sootikhiniha ti miteko sanyu, Yehova Muluku, Aikuru Soothene. Sawookololowa ni seeparipari ti iphiro sanyu, Mwene oohimala. 4 Taani chiryene oni ahiwooveeni nyuwo, Yehova, ni ohicicimiha nsina nanyu? Tiwi nyuwo muri oororomeleya. Maloko oothene anamurwa nave anamoolapaani nyuwo, woona wi othoriha wanyu wawookololowa wohuupululiwa.”

5 Evinre yeela, kaahoona wi nipuro naweela na muxakala wa onamoona naahuleya wirimu, 6 nave ankeelo athanu napiili yaarino ipahu thanu napiili yaakhuma o nipuro naweela, ewanre soowara sa eliinyu saphaama ni sawaarya, nave yiimakenle vachirima vaya ikuwo sa ooru. 7 Emoha wa ikumi seihe xexe yaahaannya ankeelo yaale athanu napiili itixela sa ooru thanu napiili, isaren’yemo esara ya Muluku, yoowo onakhala okhala wookhala. 8 Nipuro naweela naasareya mwiixi wa nthowa na ncicimiho na Muluku, ni wa nthowa na owerya wawe, nave haavo aawerya ovolowa o nipuro naweela ophiyerya imanle ipahu thanu napiili sa ankeelo athanu napiili.