Ochuneya Waya Ohoolela Wa Achu Atokweene

ONAVOLOWELA EHEENI OHOOLELA WA ACHU ATOKWEENE?

Anamwane annachuna ohooleliwa ni okhaviheryiwa ni achu atokweene. Ntoko mulipa ooyara, nyuwaano mwa mmoha munaphwanela omuhoolela mwaninyu ni omukhaviherya. Nto achu akina atokweene ananwerya waakhaviherya ni waalaka anamwane anyu.

NTAKHARA HEENI OHOOLELA WA ACHU ATOKWEENE TI WOOCHUNEYA?

Mu ilapo sincipale, maponkwe ni anahano anamaliha elukuluku vakhaani ni achu atokweene. Muthokororye ela:

• Anamwane anamaliha mahiku aya mancipale oxikola, weiwo ariwo anaxikola ancipale opwahana ahusiha ni achu atokweene.

• Emanle ohuserya, vaavaa anamwane anakookelaaya owaani, anakhala meekhaaya nthowa nawi asitiithi ari omutekoni.

• Yootholathola emoha yohooniherya wi o Estatu Unitu, anamwane arino iyaakha thanu nararu ni khumi napiili annamaliha iwora thanu nammoha ethataka ni ikhankoonya nihiku ti nihiku.a

Liivuru Hold On to Your Kids (Mwaakhaviherye Anamwane anyu) oriye: “Amiravo ni asimwali annachariha miruku, meerelo ni ohoolela ohiya wa asimama aya, asipapa aya, maprosoore aya naari muchu mukina ori mutokweene nto sa . . . asinthamwene aya a iyaakha imohamoha.”

MUKHALELO WA OVAHA OHOOLELA

Mmaliheke elukuluku ni anamwane anyu

NLAKIHERYO NA MPIIPILIYA: “Omukhovelelihe mwaana meecelo oophwanelela, nari uuluvanle harwa ahiya.”—Masiposipo 22:6.

Wiiliwiili anamwane annachuna ohoolela nnikhaviheryo na asitiithi aya. Mweeparipari alipa oohuserya aaloca wi anamwane arino iyaakha khumi, awo annachuna miruku sa asitiithi aya ohiya sa amiravo akina. Laurence Steinberg oorepa mu liivuru You and Your Adolescent: “Alipa ooyara mutitelele waavyakiha anamwane ophiyerya winnuwa. Amiravo annachuna osuwela yeeyo munuupuwelaanyu ni owiriyana echu munalocaanyu, naamwi wiiliwiili eheemereryaka ichu soothene munalocaanyu.”

Woona wi anamwane anyu annachuna ohoolela wanyu, mpake yeeyo munaweryaanyu wi mwaakhaviherye. Mmaliheke elukuluku ni anamwane anyu nave mwaaleeleke moonelo anyu, ichu soochuneya, ni saweereya sa okumi anyu.

Mvahe nikhaviheryo.

NLAKIHERYO NA MPIIPILIYA: “Oneeca ni achu a miruku, owo tho tamiruku.”—Masiposipo 13:20.

Muchu taani munamuupuwelaanyu aahaala omukhaviherya ni omuhoolela mwaninyu? Apwanne mwanwerya omwaavya muchu si yoowo wi amaliheke elukuluku ni mwaninyu? Ela henataphulela wi muchu yoowo onahaala owaakhaani murici anyu ntoko mulipa ooyara. Muchu yoowo awunnuwelavo munamuroromelaanyu onanwerya omukhaviherya mwaninyu ohiya omuhooxa. Mpiipiliyani, Timoteo—naamwi unnunwe—aahikhaviheryeya moorweela wa onthamwene areiyeno ni murummwa Paulo, nave Paulo aahiphura tho onthamwene areiyeno ni Timoteo.—Filipi 2:20, 22.

Olelo, anamwane hanakhala ni asivovo, asitiiyu, asititiya, nthowa nawi awo anakhala makupa makina a elapo. Waakhanle wi yoheereya ni nyuwaano, mweererye omvaha ekari mwaninyu ohuserya moorweela wa achu atokweene yaawo arino meecelo aphaama mwaachunaanyu omoonano mwaninyu.