Liivuru Aka A Myaha Sa Piipiliya

Mapacereryo

OLA liivuru aka a myaha seeparipari. Sinakumihiwa mu liivuru mutokotoko a elapo, Piipiliya. Sinathoriha sa elapo opacerya vavaa Muluku aapacenryiiye opatuxa, ophiyerya m’mahiku ahu ala. Sinnalocatho seiyo Muluku onalakaniiye weera muhoolo.

Liivuru ola onnoovahaani eyuupuwelo ya sa mummo Piipiliya okhalenliiye. Onnaloca sa achu a mPiipiliya nave sa yeeyo awo yeenraaya. Onnathonyeryatho yoowehererya yotikiniha ya okumi woohimala, mu elapo yaparadaiso, yoowo Muluku onaavahiiye achu.

Mu liivuru ola orimo myaha 116. Iho ikaiwe mmakupa mathanu nararu. Epaaxina emoha, omapachereryo a makupa ari oothene, enaloca mmasu avakhaani yeeyo enaphwanyeya mummo. Myaha iho sinathorihiwa mocharana ni mummo saweereya iho seerelenyaaya. Ela enahaala wokhaviheryaani osuwela tiliini ichu seerenyaaya mu ovuwa mopharihana ni saweereya sikina.

Myaha iho inathorihiwa mmalocelo ookhweya. Ancipale a nyuwo anamwane, munanwerya walakhanyaka mekheinyu. Nyuwo asitiithi, munahaala woona wii anamwanaanyu asikaani anahaala osiveliwa vancipale wii muwalakhanyeryeke myaha sene seiya wiili-wiili. Munahaala woona wii liivuru ola okhalano ichu sincipale soohakalaliha, okhala wa amiravo nari wa asiitokwene.

Omakuchuwelo wa mwaha ori woothene onnathonyeriwavo soorepa sa Piipiliya. Ninnoochenyeryaani waalakhanya makupa yaala a Piipiliya, yaawo ari mathipelo a myaha sene seiya. Vachuli va omaliha waalakhanya mwaha ori woothene, onnachuneya tho ovarerya makoho a mwaheene yoole, anaphwanyeya omakuchuwelo wa Mwaha 116, nave mweererye wuupuwelela sa waakhula.