MWAHA 8
Anakuru Veelaponi
MUCHU oorekama vancipale ntoko nipatho na empa yoorekama oophwannyeeni nyuwo, mano mwii moone mwawiihai yeeyo? Aahala okhala nakuru! Khalai, waahikhalavo chiri anakuru veelaponi. Piipiliya onathoonyerya wii asitithyaaya yaari angelo a wirimu. Nyenya mano sii iweryeye mwawiihaii?
Muupuwele wii mungelo oonanara, Satana, aamwaakanyerya. Aahiphiyerya weererya oweeriha angelo a Muluku wii ekhale oonanara. Akina a yaawo yaahipacerya omwiiwelela Satana. Yaahihiya muteko yoowo Muluku aariiyeno ntakhara a yaawo wirimu. Yaahikhuruwela veelaponi yavathi nave yaahiipakela miili yoomuchu. Mano moosuwela nthowa nene?
Piipiliya onii waari nthowa nawii anamwane a Muluku yaawo yaawoonne athiyana ooreera veelaponi nave yaahichuna okhalakano. Va nthowa nenla, yaahirwa veelaponi yavathi nave yaahaathela. Piipiliya onii eyo yaari yoochekeya, nthowa nawii Muluku aapanke angelo wii ekhaleke wirimu.
Vavaa angelo ni asaaraya yaayanraaya anamwane, awo yaari oohiyana. Wuupaceryani, akhweya hiyooneya ohiyana wayaxa. Nyenya yanapwahiheryaru winnuwa ni okhala akuruxa, ophiyerya ekhanleene anakuru.
Anakurwene yaawo yaari oonanara. Nave wookhala wii yaari atokotoko ni akuru, yaanahoxa akina. Yaaneererya owaakeleliha oothene okhala oonanara ntoko yaawo.
Henoke aari akhwiiyeene, nave aahikhalavotho muchu mukina aphaama veelaponi. Iichaniwa Noowa. Owo elukuluku yoothene eera yeeyo Muluku aachuniiye.
Nihiku nikina, Muluku aahimulela Noowa wii elukuluku yaaphiya yawii Owo aatoloxe oonanara oothene. Nyenya, Muluku aahala omvuluxa Noowa, echoko awe ni inama sincipale. Hinkoni noone mummo Muluku eerenliiye eyo.
Mapacereryo 6:1-8; Yuda 6.