Omwaryeya mu Elapo Yoohooneya ya Minepa

Soopatuxiwa soothene soomunepani ipatuxiwe ti Yehova saari saphaama. Ovinyerya vaavaa, munkeelo mmoha ahikhala oonanara. Ola ti Satana Musaserya. Satana aachuna wi achu veelaponi yavathi, emukokhoreleke yoowo omuhiya Yehova. Yeeren’ye ti ela:

Mu emaca ya Eeteni, waahikhalamo miri mincipale saavaha sawiima soosiva. Yehova aaloca wa Aatamu ni mwaariye, Haava, wi elyeeke mohuukhuwa. Nyenya waakhalamo mwiri mmoha yoowo Muluku aalonceiye wi hiyaaphwanela olya. Muluku aaloca wi yalya yaamukhwa chiri.—Mapacereryo [Genesis] 2:9, 16, 17.

Nihiku nikina, vaavaa Haava aareiye meekheiye enowa yaahiloca ni yoowo. Hiyaari enowa chiryene yeeyo yaaloca, aari Satana Musaserya, iiserinhe okhala ntoko enowa yaaloca. Satana ahiloca wa Haava wi, owo alya yawiima yoowateeliwa, Haava ahaala okhala amiruku ntoko Muluku. Ahiloca tho wi owo, hooye, haakakhwile. Masu oothene ala yaari awootha. Nari hiihaa, Haava aamweemererya Satana, nave alya yawiima eyo. Voocharela vaya, amvaha Aatamu vakhaani nave tho Aatamu alya.—Mapacereryo 3:1-6.

Ovinyerya va yaweereyeene yeela yeeparipari hiyo noosuwela wi Satana ti mwiicani nave tho awootha. Satana ahimuleela Haava wi, owo aahimwiwelela Muluku, hakhwaru. Ela yaari yawootha mweeparipari Haava ookhwa, nave tho Aatamu ookhwa. Satana hakhwile mu elukulukweene yeele, naamwi onaya okhwa muhoolo nthowa na ocheka wawe. Mu elukuluku yeela yavakhaani owo mukumi, nave onnapwahiherya wahuweliha achu mu elapo yavathi. Satana nivano ori awootha nave onnaavyavya wi achu oothene ehiweleleke malamulo a Muluku.—Yohane 8:44.

Omwaryeya wa Ankeelo Akina

Voocharelavaya ankeelo akina yaahikhala tho oonanara. Ankeelo yaala yahaavarerya athiyana ooreera veelaponi yavathi nave yaanachuna okonihana ni yaawo. Ophiyerya orwa veelaponi yavathi ewanre mwiili woomuchu woolopwana. Hiihaa yaahikuxerya athiyana awo. Ela yaari yoovaanyihana ni yoochuna ya Muluku.—Mapacereryo 6:1, 2; Yuda 6.

Yeeyo tho yaahiruha makachamiho mancipale wa achu. Asaaraya ankeelo awo yaahaayara anamwane, nyenya anamwane ala hiyaari anamwane aphaameene. Yaathatuwa ekala anakuru awoopiha ni oowali. Moovira wa elukuluku, elapo yavathi yaasareya owali, Yehova aahuumelela waatoloxa achu oonanara moorweela wa maahi mancipale. Achu yaavulunwe wa maahi mancipale, aari Noowa ekhaikhai ni echoko awe pahiru.—Mapacereryo 6:4, 11; 7:23.

Nyenya ankeelo oonanara awo yahikookela o elapo yoohooneya ya minepa; awo hiyakhwile. Nyenya yaawo aalakiwa. Hiyeemereryiwe okookela o echoko ya Muluku ya ankeelo ekhaikhai. Ohiya yeeyo, Yehova heemerenrye tho wi yaawo yiiwarihele mwiili woomuchu. Nave muhoolo awo anahaala okhwa va othorihiwa otokotoko.—2 Petro 2:4; Yuda 6.

Wiikariwa wa Satana Wirimu

Omapacereryo wa iyaakha nsana nahu nla, waakhalawo ekhoco wirimu. Liivuru a mPiipiliyani, Yawupulula onnathoriha yeeyo yeeren’ye: “Nave wirimu wákhala’wo ekhocho. Mikayeli [Yesu Kiristu aveihiwe wukhwani] ni angelo awe [aphaama] owanano ekhocho ni enowa etokwene [Satana]; enowa etokwenetho ni angelo aya [oonanara] yáwana ekhocho; nave heyákhanletho ikuru, nave henaphwanyiwetho nipuro naya wirimu. Nave yárihiwa vathi enowa etokwenesha eyo, enowa yawuluvala eyo, yaweriwa musaserya ni Satana, yeyo enawoka elapo yothene; yárihiwa vathi velaponi, ni angelo aya ene [oonanara] yárihiwano vamoha.”

Mano yaaruhale yookhumelelavo taani? Yaweereya ennathoriha eriki: “Va nthowa nenla, theyani, irimu nyu, ni nyenyu munakhala mummo.” Ankeelo aphaama yaanaphwanela ohakalala nthowa nawi Satana ni Ankeelo, nari minepa, soonanara, hiyaaphwanyeya tho wirimu. Mano hanka vooloca sa achu a elapo yavathi? Piipiliya onii: “Ochilu wa moko ni enia, nthara musaserya ókhuruwela wa nyuwo, ókhalano wícha mtokotoko, onasuweliye wi emuhalenle mahiku avakhani.”—Yawupulula 12:7-9, 12.

Ahe, Satana ni asinthamwenaawe oonanara annaawoka achu veelaponi yavathi nave annaaruhela soohooxa sincipale. Ankeelo yaawo oonanara aniichaniwa masololo. Awo amwiicani a Muluku. Oothene yaawo ti oonanara.

[Eruku va epaaxina 8]

Vaavaa Satana aapharihenleiye muteko enowa wi eloce ni Haava, owo ahiphitaana ni Satana mu ommwaryeela Muluku

[Eruku va epaaxina 9]

Ankeelo oonanara yaahirwa veelaponi ya vathi wi ekonihane ni athiyana

[Eruku va epaaxina 10]

Satana ni ankeelo awe oonanara ahiikariwa wirimu