MWAHA 32
Ipahu 10
NKOONANI iruku iha. Eri yoothene enathonyerya epahu emoha-emoha yeeyo Yehova aaruhenliiye va aYiikuputu. Va yoopacerya munnawerya omoona Aaroni amanaka ni ekopo Mmuhiceni wa Niilu. Maahi a mmuhiceni yaahithatuwa nikhami. Ihopa saahikhwa nave muhichoowo waanankha moonanara.
Vachuli vaya, Yehova aaheriha okhumelela wa anaphulu mu Niilu. Awo yaasareya voothevene—mwawooxerya iphaawu, mwawuupela iphaawu, mu kaamani—voothevene. Vaavaa anaphulu awo yaakhwilaaya, asinaYiikuputu yaahiwuukela, nave wahikhalavo wunkha woonanaraxa.
Ovinyerya vaavaa, Aaroni aahimana vachayani ni ekopo, nave nchupi naahithatuwa aparara. Ti asiicu akhaani oovava ooluma. Aparara yaari epahu yaneeraru va Yiikuputu.
Ipahu sikina saahoonxe asinaYiikuputu, oohii aIsarayeli. Yaneexexe yaari epahu ya ikulihe sitokotoko saavolonwe mu ipa soothene sa asinaYiikuputu. Epahu yaneethanu yaavinyenrye inama. Imope sincipale, ipucepuche ni ipuri sa asinaYiikuputu saahikhwa.
Votcharelavo, Moose ni Aaroni yaahikuxa ecuurwa evonyerya musulu. Eyo yaahaaruuhela ithuku achu ni inama sene. Yaari epahu yaneethanu nammoha.
Vanonto, Moose aahichukhulela ntata nawe musulu, nave Yehova aahirumiha itari ni maralala. Yaari maralala oopwaha oothene yaawo yaakhanlevo mu Yiikuputu.
Epahu yaneethanu nararu yaari ya muloko mutokotoko wa nasope. Hiwaantonko okhalavo nasope awihiihaa. Aahikhuura soothene saahiiwe oonanarihiwa ti maralala.
Epahu yaneethanu naxexe yaari ya epiphi. Va mahiku mararu, elapo yaahikhala mweepiphini, nyenya aIsarayeli yaahikhalano omwaleya.
Vookuchula vaya, Muluku aahilamula wii achwaawe emiserye nikhami na mwaasana a puri nari a epucepuche va mikhorani vaya. Vanonto mungelo a Yehova aahivira mu Yiikuputu. Vawoona nikhami nlo, haamwiiphale ori oothene mu empa eyo. Nyenya, mu ipa soothene soohikhala n’nikhami mmikhorani, mungelo a Muluku owo ahimwiipha mwaana ori oothene oopacerya oyariwa a muchu ni a anama. Ela yaari epahu yaneekhumi.
Vachuli va yookuchula ela, Farawo aahaaruma aIsarayeli orowa. Achu a Muluku yaari eiryeheryenryeene, nave yaahikhuma ohiyu yoowo mu Yiikuputu.
Mukwaha ikapitulu 7 ophiyerya 12.