MWAHA 31
Moose Ni Aaroni Wa Farawo
AKOOKENLEENI o Yiikuputu, Moose aahilocha wa munneeni Aaroni sa sotikiniha iho. Nave vaavaa eeli awo yaathoonyenryaaya sotikiniha iho wa aIsarayeli, ala yaaheemererya wii Yehova aari ni yaawo.
Vano Moose ni Aaroni yaahiya oloca ni Farawo. Yaahi wa yoowo: ‘Yehova, Muluku a Isarayeli onii: “Weemererye achwaaka wii erowe, mmukwaha wa mahiku mararu, wii yakilapele mutakhwani.” ’ Nyenya, Farawo aahaakhula: ‘Nkina muroromela Yehova. Nave nkiweemererya Isarayeli orowa.’
Farawo aahinanariwa nthowa nawii achu yaacuna wiicuuwaka vamutekoni wii emulapeleke Yehova. Hiihaa, aahaalamulela opharaka muteko vancipalexa. AIsarayeli yaahimukhupanya Moose nthowa na ohooxiwa waya, nave Moose aahithanana. Nyenya Yehova aahi wa yaawo: ‘Kinahaala omulamulela Farawo oweemererya achwaaka orowaka.’
Moose ni Aaroni yaahilochanotho Farawo. Ekwaha ela, yaaheerano yotikiniha. Aaroni aahirihela ekopo awe vachayani, nave eyo yaahithatuwa enowa etokotoko. Nyenya alipa a miruku a Farawo yaahiweryatho weerano emoha-moha. Vanonto, enowa ya Aaroni yaahimirya inowa sa alipa a miruku awo. Nari hiihaa, Farawo haaweemerenrye aIsarayeli orowaka.
Yaahiphiya vano elukuluku yawii Yehova amuhusihe Farawo. Mano moosuwela wii eenre mwawiihai? Owo aahiruuha ipahu 10, nari masoso matokotoko va aYiikuputu.
Vachuli va ipahu sincipale, Farawo aahimwiichana Moose nave aahi: ‘Weemexe epahu ela, nave kinahaala waaruma, aIsarayeli orowaka.’ Nyenya, vaavaa epahu yaamanlaaya, Farawo aahitoroka mawuupuwelo. Haachunne waataphula achwaawo. Vokucula vaya, vachuli va epahu ya neekhumi, Farawo aahaaruma aIsarayeli orowaka.
Mano moosuwela wii ipahu 10 iho saari eheeni? Khunulani epaaxina wii moone.
Mukwaha 4:27-31; 5:1-23; 6:1-13, 26-30; 7:1-13.