Mose Aamulapela Yehova

Oyikuputu, emusi ya Yakopo yaasuweliwe ntoko Aisarayeli. Yakopo ni Yosefe emanle okhwa, Farawo muvyaani aapacerya olamulela. Owo aanoova wi Aisarayeli yaahaala waapwaha Ayikuputu. Farawo aanaalapiha Aisarayeli ntoko akapuro. Owo aanaalamula wuupa icurwa ni olima mmacani. Nyenya vaavaa Ayikuputu yaalapihaaya muteko woovila, Aisarayeli yaanacereryeya. Farawo hasiveliwe ni yaweereya yeeyo, aahilamulela wi makwiya oothene aasilopwana a Aisarayeli yiiphiweke erikimuyariwa. Weyaano onnaanyiherya mukhalelo Aisarayeli yaaryaaya awoova?

Muthiyana Muisarayeli awiichaniwa Yokepeti aamuyara mwaana ooreera a mwaamulopwana. Wi amukhapelele mwanawe, owo aamuhela mmucanka nave aya amukuha mukhice wa Muhice Nilu. Murokora a Mose awiichaniwa Miriya, aakhala vakhiviru wi oone tiheeni yaahaala weereya.

Mwaana amwaamuthiyana a Farawo aaya orapa mmuhice nave aahoona mucanka. Aakunxeiye, aamphwanyamo mwaana inlaka, owo aamoriwa ikharari. Miriya aamukoha: ‘Kimwaavye muthiyana wi amwaamwiheke mwaana ola?’ Vaavaa mwaana amwaamuthiyana a Farawo eemerenryeiye, Miriya aawiichana amannya, Yokepeti. Mwaana a mwaamuthiyana a Farawo aahaaleela ariki: ‘Mmukuxe mwaana ola ni mmwaamwiheke mwa nsina naka. Miyaano kinamoolivaani.’

Vaavaa mwaana unnunweiye, Yokepeti aamukeriha wa mwaana amwaamuthiyana a Farawo, aamuchuwa nsina nawe Mose nave aampaka okhala mwanawe. Mose aaphuiwale ntoko mwaana a mwene nave aanwerya okhalano echu yoothene aachuneiye. Nyenya Mose haamucuwanle Yehova. Owo aanasuwela wi aari Muisarayeli ohiya Muyikuputu. Nave aathanla omurumeela Yehova.

Arino iyaakha 40, Mose aalakelela waakhaviherya achu awe. Vaavaa aamoonneiye Muyikuputu ammanaka kapuro Muisarayeli, Mose aammana Muyikuputu ole nave owo aakhwa. Mose aamvitha veehaavani. Vaavaa Farawo iiwaleiye, aanachuna omwiipha Mose. Nyenya Mose aachawela elapo ya Mitiya nave Yehova aanamukhapelela.