MWAHA 29
Nthowa Nene Moose Aachanweiye
NKOONANI mota Moose onacawiiye o Yiikuputu. Mano munnawoona alopwanawo anamwiikara? Mano moosuwela nthowa anachunelaaya omwiipha Moose? Hinkoni noone naariki niphwanye nthowa nene.
Moose aaphuiwe mpa mwa Farawo, mulipa olamulela a o Yiikuputu. Aahinnuwa nave akhala amirukuxa. Moose aanasuwela wii haari musinaYiikuputu, nyenya wii makholwaawe yaari akapuro aIsarayeli.
Nihiku nikina, vaavaa aariiye ni iyaakha 40, Moose aahithanla oya owoona achwaawe mummo yaakhalelaaya. Yaakhapeleliwa mwawoopiha. Owo aahimoona musinaYiikuputu ammanaka kapuro muIsarayeli. Moose aahiwehaweha moorukurerya, nave, voohimona ori oothene, aahimmana musinaYiikuputu owo, nave ola aahikhwa. Moose aahivitha murucuuwo veehaavani.
Oxaakaaya, Moose aahiyatho waaxekurya achwaawe. Uupuwela wii anwerya wakhavihera, wii ehikhaletho akapuro. Nyenya aahiwoona aIsarayeli eeli ewanaka, vawihiihaa wii aahi wa yoowo aacekenle: ‘Mano ntakhara heeni onammanaawe munnaa?’
Mulopwanoowo aahi: ‘Mano taani oopanke weyo okhala oolamulelaahu ni oothorihaahu? Onahaala okiipha ntoko mummo omwiiphalaawe musinaYiikuputu ole?’
Moose aahoova. Aahoona wii yaahisuweliwa yeeyo eenriiye wa musinaYiikuputu owo. Farawo aahiphiyerya osuwela sa eyo nave aahilamula wii Moose aiphiwe. Va nthowa nenla Moose aahicawa mu Yiikuputu.
Akhumme mu Yiikuputu, Moose aahirowa ociiwene, o elapo ya o Mitiyani. Weiwo aahisuwela echoko ya Yetero nave aahimuthela mmoha a anamwanaawe, awiichaniwa Zipora. Moose aahikhala mukukhula nave aahithokororya ipucepuche sa Yetero. Aahikhala iyaakha 40 mu elapo ya o Mitiyani. Aahiphiyerya iyaakha 80. Nihiku nikina, akukhulaka ipucepuche sa Yetero, yaaheereya echu yeeyo yaatoronke okumi woothene wa Moose. Khunulani epaaxina wii moone ti heeni yeerenyee.
Mukwaha 2:11-25; Saweriwa Tarummwa 7:22-29.