MWAHA 30
Ephovo Yoovarela
MOOSE aahiya o mwakoni wa Horebu, waavya nikuwa noolyihavo ipucepuche. Weiwo aahoona ephovo evarelaka, nyenya ehivyaaka!
‘Ti yootikiniha,’ aahuupuwela Moose. ‘Kinaya koone eyo vakhiviru.’ Aachamelakavo, yaahikhuma masu vaphovoni vaa eriki: ‘Ohaachamelevoxa. Orule isapatho, ntakhara nipuro nla va ti naweela.’ Aari Muluku aaloca orweela mwa mungelo, va nthowa nenla, Moose aahikhuneela ethoyi.
Vano Muluku aahi: ‘Kohoona ohooxiwa wa achwaaka mu Yiikuputu. Kinaya owoopola, nave kinooruma weyo waakumihawo achwaaka.’ Yehova aahala wakuxerya achwaawe wiilaponi yooreera ya Kaanani.
Nyenya Moose aahi: ‘Nkaamuchweenevo. Kinii kiwerye hai weerano eyo? AIsarayeli anahaala wii: “Mano taani oorummee?” Kinahaala wiihainto vano?’
‘Waaleele wii,’ aahaakhula Muluku. ‘“YEHOVA, Muluku a Aaparahamu, Muluku a Isaaki ni Muluku a Yaakopo ookiruma miyo wa nyuwo.”’ Nave Yehova aahiitho: ‘Nla ti nsina naka nawiikhalelaru.’
‘Naanyiherye wii haneemererya kiloncheene wii mookiruma,’ aahaakhula Moose.
‘Mano tiheeni oryaaweno mmatatani?’ aahikoha Muluku.
Moose aahaakhula: ‘Ekopo.’
‘Orihele vachayani,’ aahi Muluku. Mwa weerano hiiha, ekopo eyo yaahithatuwa enowa. Yehova aahimooniha vano Moose yootikiniha ekina. Aahi: ‘Ovoleihe ntata naa mpuwa mwa soowara.’ Moose aaheerano eyo, nave vaavaa aakuminhiiyemo, nlo naari noochweelela ntoko mucarapo! Ntata naari ntoko nri ni erecha yawiicaniwa marecha. Ovinyerya vaavaa, Yehova ahimvaha Moose ikuru sa yotikiniha yaneeraru. Vano aahi: ‘Vawoona sotikiniha seiya, aIsarayeli anahaala weemererya wa weyo.’
Moose aahirowa owaani nave aahi wa Yetero: ‘Keemereryeeni okooka wii kawoone anaaka o Yiikuputu.’ Hiihaa, Yetero aahilaanyanano Moose, nave owo aahikookela o Yiikuputu.
Mukwaha 3:1-22; 4:1-20.