MWAHA 28
Ovuluwa Wa Mwanoowo Moose
NKAMOONEENI mwanoowo onanlaa nave apharelaka ekatha ya mwali owo. Owo ti Moose. Mano moosuwela wii mwali ooreeroowo taani? Ti mwaana a mwene o Yiikuputu, Farawo.
Amannya a Moose yaahimvitha ophiyerya akhwaninheene miyeeri miraru sa oyariwa, nthowa nawii haachunne wii aiphiwe ti asinaYiikuputu. Nyenya, okhala wii Moose anwerya ophwanyiwa, aahipaka hiihaa wii amvuluxe.
Aahikuxa nikali nave arehererya wii maahi ehivolowekemo. Vano, aahimukuhamo Moose nave akuha nikali nlo vaceereni m’Muhicheni wa Niilu. Murokorawe a Moose Miriamu, aahikhala amuwehereryaka vakhiviru.
Mwaana mwamuthiyana a Farawo aahikhuruwela omuhicheni iwo wii arape. Mwawaakuveya, aahoona nikali. Aahimwiichana mmoha a oomurumeelaawe ii: ‘Hawe wakuxe nikali nle.’ Vaavaa mwaana mwamuthiyana a mwene owo aakhununliiye nikali nlo, aahimoona mwaana ooreeroowo! Moose mwamukhani owo aamunla, nave mwaana mwamuthiyana a mwene owo aahimoriwano ikharari. Haacunne wii owo aiphiwe.
Vaavanto aahikhumelela Miriamu. Munnawerya omoona verukuni va. Miriamu aahimukoha mwaana mwamuthiyana a Farawo ii: ‘Mano munnacuna wii kookuxeryeeni muthiyana mmoha muIsarayeli wii awaamwiheryeeni mwanoowo?’
‘Kinnacuna,’ aahi mwaana mwamuthiyana a mwene owo.
Miriamu aahitchimaka mwawaakuveya oya waathoriherya eyo amannya. Vaavaa amannya a Moose yaaphiyalaaya wa mwaana mwamuthiyana a mwene owo, aahi: ‘Mukuxe mwanoowo nave okithokoryeryele, nave miyo kinahaala wolivela.’
Mwawihiihaa, amannya a Moose yaahimuthokororya mwanayeenexa. Vachuli vaya, Moose ainunweene, yaahimveleela wa mwaana mwamuthiyana a Farawo, yoowo aaphunwe ntoko mwanaweenexa. Saari hiihaa mummo Moose aaphuweliwiiye mpa mwa Farawo.
Mukwaha 2:1-10.