MWAHA 27
Mwene Oonanara Murima Onnalamulela Mu Yiikuputu
ALOPWANA munawoonaanyu va anaalamulela achu ophara muteko. Nkamooneni ole onammanaa mmoha a anamuteko awo! Ophara muteko awo ti a echoko ya Yaakopo, awiichaniwa aIsarayeli. Nave awo anaalamulela ophara muteko ti asinaYiikuputu. AIsarayeli yaahikhala akapuro asinaYiikuputu. Mano seerenye mwawiihai?
Mu iyaakha sincipale, echoko etokotoko ya Yaakopo yaahikhala mmureceleni mu Yiikuputu. Yoosefe, mulopwana oocuneya vancipale mu aYiikuputu vachuli va Farawo, mwene, aanaathokororya awo. Nyenya Yoosefe aahikhwa. Nave Farawo ahihano yoowo ahaachuna aIsarayeli, aahikhala mwene a o Yiikuputu.
Farawo oonanara murima ola aahaapaka aIsarayeli okhala akapuro. Aahiwiiyaatherya awo alopwana oonanara ni owali. Ala yaahaalamulela aIsarayeli oteka ipooma ntakhara a Farawo. Nyenya, aIsarayeli yaahaacereryeya mu walikhanyerya waya. Nave, vanonto asinaYiikuputu yaahikhala ni woova wii aIsarayeli yaahaala waaca ni okhala akuru.
Mano moosuwela yeeyo Farawo eenriiye? Aahilocha wa athiyana yaawo yaakhaviherya asimayi aIsarayeli oyara, ariki: ‘Nyuwo muwiipheke anamwane oothene asiilopwana enii eyariweke.’ Nyenya, athiyanaawo yaari ooreera mirima nave hiyaawiiphale anamwanaawo.
Va nthowa nenla, Farawo aahaalamulela achwaawe oothene wii: ‘Wiipheeni anamwane aasilopwana aIsarayeli. Nyenya anamwane aasithiyana aahiyeeni ni okumi.’ Ti echu yawoopiha mwawiihainki? Hinkoni noone sa mummo mwaana mmoha mwaamulopwana aavuluwenliiye.
Mukwaha 1:6-22.