MWAHA 33
Olapuwa Va Eniya Yooxeerya
NKOONANI yeeyo enneereya va! Vaa orivo Moose ni ekopo yookololeliwe mu Eniya Yooxeerya. Vamoha ni owo orivo aIsarayeli avulunwe. Nyenya Farawo ni alipa akhochwaawe oothene emiryiwaka mu’niya. Mano eyo yeerenyee mwawiihai?
Noohuserya wii Farawo aahaaruma aIsarayeli orowa, vachuli va epahu yaneekhumi ya Muluku va asinaYiikuputu. Yaahikhuma 600,000 alopwana aIsarayeli, ni athiyana ni anamwane. Yaahirowatho achu akina ancipale, yaamuroromela Yehova. Oothenaawo yaahiikuxerya ipucepuche saya, ipuri saya ni imope saya.
Ehichimunle, aIsarayeli yaahaaveka wa asinaYiikuputu soowara, ni sooreerihela sa mivira ni sa eparata. AsinaYiikuputu yaahikhala ni woova vancipale nthowa na epahu yookuculeele. Yaahaavaha aIsarayeli yeeyo yaavenkaaya.
Vachuli va mahiku awii makavi, aIsarayeli yaahiphiya va Eniya Yooxeerya. Vaavaa yaahiicuuwa. Vaavanto, Farawo ni achwaawe yaahikhupanya okhala yaarummeene aIsarayeli orowa. Yaahi: ‘Akapuro anrimeela!’
Hiihaanto, Farawo aahitorokatho mawuupuwelo. Aahirehererya mwawaakuveya ekaaro awe yakhocho ni alipa akhochwaawe. Awo yaahaacimakela aIsarayeli ni ikaaro savameekhaaya 600 ni ikina soothene sa mu Yiikuputu.
AIsarayeli voomoona Farawo ni alipa akhochwaawe, yaahoova. Hiwaarivo ephiro yawii ecawe. Makupa a wu, waariwo Eniya Yooxeerya, nave o makupa makina waarwawo asinaYiikuputu. Nyenya, Yehova aahikuha neeku veeri va achwaawe ni asinaYiikuputu. Hiihaanto, ala hiyaawerya owoona aIsarayeli wii yaavinyerye.
Vanonto Yehova aahi wa Moose wii ookololele ekopo mu Eniya Yooxeerya. Vaavaa eenriiyeno eyo, Yehova aahiruuha echeku etokotoko ya weiwo onakhuma nsuwa. Maahi a eniya yaahikawanyeya nave yaaheemela mmakupa ari oothene.
Vanonto, aIsarayeli yaahilapuwa eniya vachaya yawuuma. Waahiviravo iwora wii masana masananeene achu evire moovuluwa ni inama saya soothene. Vookuchula vaya, asinaYiikuputu yaahiwerya owoonatho aIsarayeli. Akapuro aya yaamucawa! Yaahivolowanto mu’niya, waacimakela.
Vaavaa yeenraaya eyo, Muluku aaheriha wi marota a ikaaro ekhuleye. AsinaYiikuputu yaahoova vancipale nave yaakhuwela: ‘Yehova onnaawanela ekhoco aIsarayeli moovanyihana ni hiyo. Hinkoni nivinyevo va!’ Nyenya, waari mooxeleliwa.
Waarinto vaavaa Yehova aamurummiiye Moose wookololela ekopo mu Eniya Yooxeerya, ntoko munoonelaanyu veerukuni va. Vaavaa Moose eenriiye eyo ixiri sa maahi saahikookelana nave saahaakhunela asinaYiikuputu ni ikaaro saya. Alipa akhoco oothene yaari evolonweene mpuwa mwa eniya waacimakela aIsarayeli. Haavovo musinaYiikuputu ori oothene moharu aavulunwee!
Achu a Muluku yaahakalanle mwawiihainki ni ovuluwa wu! Alopwana yaahiipa mathamalelo wa Yehova eriki: ‘Yehova oolapiha moochichimiheya. Ohaavonyerya mu’niya akavalo ni awaawelaaya.’ Miriamu, murokorawe a Moose, aamukuxa mukaripo awe, nave athiyana oothene yaaheerano emoha-moha. Nave, yiinaka ni ohakalala, yaahiipatho: ‘Yehova oolapiha moochichimiheya. Ohaavonyerya mu’niya akavalo ni awaawelaaya.’
Mukwaha ikapitulu 12 ophiyerya 15.