MWAHA 83
Ixiri Sa Yerusalemu
NKOONANI waaca wa muteko onaphariwa va. Onathoonyerya aIsarayeli eweiweene otekatho ixiri sa Yerusalemu. Iyaakha 152 muchuli, vavaa Mwene Nabukodonosor aampahunliiye Yerusalemu, owo aahikumula ixiri nave aaheeyela mikhora sa epooma eyo. AIsarayeli hiyaatenke ixiri iho mwawaakuveya, vavaa yaakonkaaya okhumela o Paapulu.
Mano munnoona wii achwaawo yisoona mwawiihai, okhalaka m’epoomani eyo woohikhala ni ixiri? Hiyaisoona okhala ookhapeleleya. Amwiicani yaanwerya waaroxa mohikachamiheya. Nyenyanto, mulopwana ola Nehemiya aahaakhaviherya otekatho ixiri iho. Mano moosuwela wii Nehemiya aari taani?
Nehemiya aari muIsarayeli yoowo arwenle o epoomani ya Susani, weiwo aakhaliiyewo Mordekai ni Estere. Nehemiya aahiphara muteko onchachoni na mwene, vawihiihaa onnaweryeyavo okhala aari nthamwene a Mordekai ni a Mwene Mwamuthiyana Estere. Nyenya Piipiliya hanaloca wii Nehemiya aahimpharela muteko iyawe a Estere, Mwene Asuwero. Owo aampharenle muteko mwene oocharelavo owo, Artaxerxes.
Uupuwelani wii Artaxerxes aari mwene aphaama yoowo aamvamhe Estra ikhorowa soothene seiye wii akuxerye o Yerusalemu, wii areerihele empa ya Yehova. Nyenya, Estra haatenketho ixiri sa epooma eyo. Hinkoni noone mummo Nehemiya eerenliiye ela.
Waari vachuli va iyaakha 13 Artaxerxes amvanheene Estra ikhorowa wii areerihele empa ya Muluku. Nehemiya aari muhooleli a alipa ooveleela ekahi a Mwene Artaxerxes. Aanaphwanela ovahererya evinyo wa mwene ni woona wii haavovo onamuhelela mireche mwenoowo. Waari muteko woolimela.
Phaamene, nihiku nikina, munneeni a Nehemiya Hanani, ni alopwana akina a o elapo ya Isarayeli yaahiya omuxekurya Nehemiya. Yaahimuthoriherya wii aIsarayeli yaahikhalano sookachamiha ni ixiri sa Yerusalemu nlelo saari milepe. Nehemiya aahithanana vancipale nave aahivekela wa Yehova sa ela.
Nihiku nikina, mwenoowo aahoona wii Nehemiya ori othanana nave aahimukoha: ‘Mano ntakhara heni oryaawe othananaxa?’ Nehemiya aahimuthoriherya wii waari nthowa nawii Yerusalemu aari mmukhalelo woohasuweene nave ixiri milepeene. ‘Mano onachuna eheni?’ aahikoha mwenoowo.
‘Keemereryeeni kirowe o Yerusalemu,’ aahi Nehemiya, ‘wii kateketho ixiri iho.’ Mwene Artaxerxes ahimureerela murima. Aahi wii Nehemiya aanaphwanela orowa, nave aahimukhaviherya ophwanya ithaapwa wii atekeno. Mwawaakuveya vachuli va ophiya wa Nehemiya o Yerusalemu, ahiloca wa achwaawo sa maryeheryeryeliwo awe. Awo yaahisiveliwa ni eyuupuwelo eyo nave yaahi: ‘Hinkoni napacerye oteka.’
Vavaa amwiicani yonnaaya ixiri iwelaka, yaahi: ‘Hinkoni nawiiphe nave neemexe oteka iwo.’ Nyenya Nehemiya aahisuwela sa eyo, nave aahaavaha alipa a mutekwaawo malema ni mavaka. Nave aahi: ‘Muhiwoove amwiicani. Wanelani ekhoco asinninyu, anamwanaanyu, asaarinyu ni ipa sanyu.’
Achwaawo yaakhala akuru. Yaahiikhalelaru ni akapuchi oryeheryiweene othana ni ohiyu, nave yaahipwahiherya oteka iwo. Hiihaa, m’mahiku 52 pahiru, yaahimaliha ixiri iho. Vaavanto, achwaawo yaahisoona ookhapeleleya m’epoomani eyo. Nehemiya ni Estra yaahaahusiha achwaawo nlamulo na Muluku nave achwaawo yaahihakalala.
Nyenya, ichu hisaari imohamoha ntoko khalai aIsarayeli ehironwe mikhole o Paapulu. Achwaawo yaalamuleliwa ni mwene a o Persiya nave yaanaphwanela omurumeela owo. Nyenya, Yehova aahilakana wii aahala omurumiha mwene ahihano, yoowo aahala oruuha murechele wa achwaawo. Mano mwene ola aahala okhala taani? Mano aahala oruuha murechele veelaponi yavathi mwawiihai? Waahiviravo iyaakha 450 ohaakumve osuweliwa sawaacheereryeya vooloca sa eyo. Ovinyerya vavaa, aahiyariwa mwaana oochuneya vancipale. Nyenya, ola mwaha mukina.
Nehemiya ikapitulu 1 ophiyerya 6.