NIKUPA 6

Ovinyerya va Oyariwa wa Yesu Ophiyerya va Okhwa Wawe

Mungelo Gabrieli aahirummwa wa mwali ooreera owo awiichaniwa Mariya. Aahimuleela wii owo aahala omuyara mwaana mwaamulopwana, yoowo aahala olamulela ntoko mwene mwawiikhalelaru. Mwaana owo, Yesu, aayariwe mu nikholani, wiiwo aaxekuryiwiiyewo ti akukhula. Vachuli vaya, etheneri emoha yaahaaholela achu a wiiwo onakhuma Nsuwo oya wa mwaana owo. Nnahaala osuwela taani yoowo eerinhe wii yoone etheneeriyo nave wii Yesu aavulunwe mwawihai weererya-eererya omwiipha.

Vocharelavo, ninnamphwanya Yesu, arino iyaakha 12, alocaka ni ahusiha mu empa ya Muluku. Iyaakha khumi ni ithanu nararu vachuli vaya, Yesu aahipatisiwa, nave vaavanto aahipacerya muteko wa olaleyerya ni ohusiha Omwene, yoowo Muluku aamurumenliiye veelaponi yavathi. Wii emukhaviherye va mutekweene yoola, Yesu aahaathanla alopwana 12 nave aahaapaka okhala arummwaawe.

Yesu aahipakatho sotikiniha sincipale. Aahaavakulela masana masaneene a achu ni asihopa akavi ni iphawu. Aahaapenuxa awiicheliwa nave naaritho waaviiha alipa okhwa. Vookuchula vaya, nnahaala osuwela ichu sincipale hiiho seerenye wa Yesu mu nihiku noomaliherya na okumi awe, ni wii owo aiphiwe mwawiihai. Yesu aahilaleyerya mu iyaakha raru ni emeya, vawihiihaa wii NIKUPA 6 anuuraanya elukuluku yoopwaha vakhaani iyaakha 34.