MWAHA 86
Alopwana Oohooleliwa Ni Etheneeri
MANO munnoona etheneri yawaarya ele yeeyo mmoha a alopwana awo onathoonyiiye? Etheneriiyo yoonenye vavaa yaavinnyaaya o Yerusalemu. Alopwanaala yaarwenle weiwo onakhumawo Nsuwa, nave yaahusurya sa itheneeri. Yaahoona wii etheneri yahihano ela yaahaala waakuxerya awo wa muchu oochuneyaxa.
Vavaa alopwanaawo yaaphiyalaaya o Yerusalemu, yaahikoha: ‘Ori wowi yoowo ayariwe anahaala okhala Mwene a aYuuta?’ “AYuuta” ti nsina nikina na aIsarayeli. ‘Ntakhara naahona etheneri yawe wiwo onakhuma nsuwa,’ yaahi yaawo, ‘nave naarwa wi nimuthamele yoowo.’
Vavaa Herode, mwene a o Yerusalemu, aasuwenliiye sa ela, aahuukhuwa. Haamuchuna mwene mukina vanipuroni vawe. Herode aahiwiichana alipa-ephepa atokotoko nave aahaakoha: ‘Ayariwele wowi mwene olakaniwa owo?’ Yaahaakhula: ‘Piipiliya onii o Petelehemu.’
Mwawihiihaa, Herode aahiwiichana alopwanaawo a weiwo onakhuma Nsuwa ii: ‘Haweni mwavyaxe sa mwaamwana owo; nave mwamphwanya, mukikokiherye masu, wii miyo’tho kirwe orwa-omuthamala yoowo.’ Nyenyanto chiryene, Herode aachuna omphwanya wii amwiiphe!
Etheneriiyo yaahiya vahoolo va alopwanaawo oya o Petelehemu, nave yaaheemela vasulu va nipuro nenlo waarivo mwanoowo. Woovolowa mpa mmo, alopwanaawo yaahimoona Mariya ni Yesu mwamukhani owo. Yaahikumiha samahala nave yaahimvaha Yesu. Nyenya, Yehova aahaalopola alopwanaawo muulohani wii ehikookele wa Herode. Va nthowa nenla yaahikuxa ephiro ekina yoorowa owannyaya.
Vavaa Herode aasuwenliiye wii alopwanaawo a weiwo onakhuma Nsuwa aarowa, aahinanariwa. Hiihaa, aahilamula wii anamwane oothene aasilopwana a m’Petelehemu a iyaakha piili sa oyariwa waya, yiiphiwe. Nyenya, Yehova aahimulopola khuluwi Yoosefe muulohani, nave Yoosefe aahichimula ni echokwaawe oya o Yiikuputu. Vachuli vaya, Yoosefe voosuwela sa okhwa wa Herode, aahaakuxa Mariya ni Yesu nave aahikookela o Nazarete. Ti weiwo Yesu aaphuweliwiiyewo.
Mano munnoona wii taani yoowo eerinhe etheneri yahihano eyo wii yaarye? Upuwelani wii alopwanaawo yaakeele o Yerusalemu pahiru vachuli va woona etheneriiyo. Satana, Musaserya, aachuna omwiipha Mwaana a Muluku, nave aanasuwela wii Mwene Herode a o Yerusalemu, aahala waavyavya omwiipha. Hiihaa, onnaphwanela okhala Satana yoowo eerinhe etheneriiyo wii yaarye.
Mateyu 2:1-23; Mikeya 5:2.