Anamiruku Annamusekurya Yesu

Alopwana anarweela Onakhumawo Nsuwa. Awo anamiruku—alopwana yaawo anahuserya mathitimanelo a itheneeri, yuupuwelaka wi mu weerano hiiha ananwerya oloca yootaphulela ya saweereya mookumini mwa achu. (Isaiya 47:13) Eri owannyaya mukuma Onakhumawo Nsuwa, awo yaahoona “etheneri” nave yaahichara eyo mukwaha waakhwana masana orekama waya, eyaaka o Yerusalemu.

Vaavaa anamiruku anaphiyaaya weiwo, awo annakoha: “Oruwi mwene a Ayuda oyariwe hihano? Ntakhara nòhona etheneri awe onakhumawo nsuwa, nave nòrwela omwepesa.”—Mateu 2:1, 2.

Mwene Herote o Yerusalemu onniiwa vooloca sa yeeyo nave onnanyeenyeya vancipale. Mwawiihiiha onnawiichana asitokweene a anamukucho ni asitokweene akina a malapelo nave onnaakoha ti woowi Kristu aahaaleiye oyariwawo. Yaakhulaka mmathipelo a Soorempwa annaloca: “O Betlehemu.” (Mateu 2:5; Mikeya 5:1) Mu elukuluku yeeyo, Herote onnaakeriha anamiruku wiiphiini nave onnaaleela: “Haweni, mwakohe phama sa mwana yowo, mukòke, mukilèle, wi miyanotho kiyewo kamwepese.” (Mateu 2:8) Nyenya, Herote onachuna omphwanya mwaana owo wi amwiiphe!

Emanle anamiruku okhumavo, “etheneri” yeele yoonnaaya eri Onakhumawo Nsuwa ennooneya ohoolo waya. Mwawooneya, tahi etheneeri vyakala, nyenya yaakumihiwe wi yaahoolele. Anamiruku annachara ophiyerya vaava yeemenlaayavo vasulu va empa yeeyo Yosefe ni Mariya yaakhalaayavo ni mwanaya.

Vaavaa anamiruku anavolowaaya mpa, awo annamphwanya Mariya ni mwaana mukhaani—Yesu. Mu elukuluku yeeyo, anamiruku annakokhora vamiithoni vawe. Nave annamvaha samahala ikhorowa, manlela a munyawa ni miira. Voocharela, vaavaa awo anachunaaya okookela wa Herote, annalopoliwa ni Muluku moolohani wi eheereno. Mwawiihiiha awo annakookela mu elapo aya moorweela wa ephiro ekina.

Munoona wi taani aakuminhe “etheneri” wi yaahoolele anamiruku? Etheneeri hiyaarweela wa Muluku, nthowa nawi eyo hiyaahoolenle mooluluwanya weiwo aariwo Yesu o Petelehemu. Opwaha yeeyo, eyo yaahoolenle o Yerusalemu, weiwo yaavaanenlaayawo ni Mwene Herote, yoowo aachuna omwiipa Yesu. Nave owo aahaala opaka yeeyo wahikhanle wi Muluku haavolowenle nave haaloponle anamiruku wi ehimuleele Herote nipuro Yesu aareiyewo. Mwawooneya, aari mwiicani a Muluku, Satana, yoowo aachuna wi Yesu iiphiwe, nave owo aahipharihela muteko makhalelo yaawo wi akhwaaniherye yookhwelaawe.