MASU AWAACEERERYA

Eparipari Vooloca sa Atiithi, Mwaana, ni Munepa Waweela

ACHU yaawo anaroromela yoohusiha ya Oraru analoca wi Muluku ti achu araru—Atiithi, Mwaana, ni Munepa Waweela. Enalociwa wi mmoha ti mmoha a achu yaala araru ti oophwanaphwana mukina ni mukhwaawe, ti aikuru soothene, ni oohikhalano mapacereryo. Mwawiihiiha, mwawiiwanana ni yoohusiha ya Oraru, Atiithi ti Muluku, Mwaana ti Muluku, nave Munepa waweela ti Muluku, nyenya ooraaru ala Muluku mmoharu pahi.

Achu ancipale yaawo anaroromela Oraru anneemererya wi awo hanawerya othariha phaama yoohusiha ela. Nivano, awo anuupuwela wi yoohusiha eyo ti ya Mpiipiliyani. Mwevelevelo, nsu nawi “Oraru” hinnaphwanyeya Mpiipiliyani. Mano muupuwelo wa Oraru onnaphwanyeya Mpiipiliyani? Wi naakhule nikoho nla, hankooni nivarerye yoorempwa yeeyo ikwaha sincipale achu analocaaya wi ennakhaviherya yoohusiha ya Oraru.

“NSU NÀRI MULUKU”

Yohani 1:1 onii: “Vopatxeryani wàriwo Nsu, Nsu nàri ni Muluku nave Nsu nàri Muluku.” Mu ecima emohamoha, murummwa Yohani onnooniherya mwawiiweyaxa wi “Nsu” ti Yesu. (Yohani 1:14) Vanonto, woona wi Nsu nniichaniwa Muluku, achu akina annaloca wi Mwaana ni Atiithi Muluku mmoharu.

Upuwelani wi makupa ala a Piipiliya yaarempwe mu elocelo ya Ekriki. Moovira wa elukuluku, alipa ootaphulela, yaataphulela soorempwa sa Ekriki mu ilocelo sikina. Vanonto, alipa ootaphulela a Piipiliya ancipale, hiyaapharihenle muteko masu awi “Nsu nàri Muluku.” Ntakhara heeni? Mu opharihela muteko nsuweliho naya na Ekriki, elocelo yaaphariheliwe muteko wi arempwe Piipiliya, alipa ootaphulela awo yaaloca wi masu awi “Nsu nàri Muluku” yaanaphwanela otaphuleliwa mmukhalelo woohiyana. Mano mwawiihai? Vareryani sawooniherya vakhaani: ‘Logos [Nsu] naari Noomuluku.’ (A New Translation of the Bible) ‘Nsu naari muluku.’ (The New Testament in an Improved Version) ‘Nsu naari ni Muluku nave naakhalano maphacuwelo oolikana ni yoowo.’ (The Translator’s New Testament) Mwawiiwanana ni Apiipiliya ala, Nsu tahi Muluku mwaneene.a Ohiya eyo, nthowa na nipuro nawe na vasulu variyari va soopatuxiwa sa Yehova, Nsu nlo ninnalociwa ntoko “muluku.” Va eciciri ela, nsu nawi “muluku” nnataphulela “aikuru.”

MUKHALENO MISEELO MIKINA SEEPARIPARI

Achu ancipale hanasuwela elocelo ya Ekriki yaaphariheliwe muteko wi arempwe Piipiliya. Vanonto, munahaala osuwela hai yeeyo murummwa Yohani aachuneiye oloca chiryene? Nkuupuwelani yawooniherya ela: Muhusiha onathariha mwaha wa anaxikola awe. Vookuchula vaya, anaxikola aakhalano muupuwelo woohiyana mmukhalelo yiiwexenxaaya mwaha owo. Mano anaxikola yaahaala omaliha hai mwaha owo? Awo yahaala oveka wa muhusiha owo miselo sawaacereryeya. Moohikhwa minikwa, ohuserya miselo mikina sinahaala waakhaviherya awo wiiwexexa phaama mwaha owo. Moophwanaphwana, wi mwiiwexexe yootaphulela ya Yohani 1:1, munaphwanela ovarerya mu Michaka ya Yohani wi mphwanye miselo mikina vooloca sa owerya wa Yesu. Ohuserya iparipari ikina vooloca sa mwaha ola enahaala wookhaviheryaani wiiwexexa phaama.

Ntoko yawooniherya, thokororyani tho yeeyo Yohani orempeiye mu ecima 1, eciciri ya 18: “Havo mutxhu otonko omona Muluku.” Nyenya, Yesu ohooniwa ti achu, ti nthowa nenlo Yohani olonceiye: “Nsu [Yesu] nàhisera mutxhu ni nàmaka ni hiyano. Hiyano nàhona ovuwa waya.” (Yohani 1:14) Vanonto, Mwaana aahaala owerya hai okhala makupa a Muluku Aikuru soothesene? Yohani onnaloca tho wi Nsu naari “ni Muluku.” Nyenya onaweryeya hai muchu mmoha okhala ni muchu mukina nave mu elukuluku emoha owo akhale muchu yoole oreiyeno? Mwa waacererya, ntoko erempwaaya mu Yohani 17:3, Yesu aahooniherya mwawiiweyaxa ohiyana orivovo ni Atiithi awe a wirimu. Owo aawiichana Atiithi awe ariki “Muluku mmoharu ni a eparipari.” Nave omakuchuwelo wa Michaka sawe, Yohani onnaloca mookwasa ariki: “Iha irempwe wi mwemererye wi Yesu ti Kristu Mwana a Muluku, nave tho wi, mwemerereyaka, mukhale ni ekumi mwa nsina nawe.” (Yohani 20:31) Vareryani wi Yesu oniichaniwa, ohiya Muluku, nyenya Mwaana a Muluku. Miselo iha sawaacererya inaphwanyeya mu Michaka ya Yohani sinooniherya mukhalelo nnaphwanelaahu omwiiwexexa Yohani 1:1. Yesu, Nsu, ti “muluku” mu mukhalelo wawi owo ookhalano nipuro na vasulu, nyenya tahi oophwanaphwana ni Muluku Aikuru soothesene.

MUCICIMIHERYE MISEELO

Nkuupuwelani wanaawiili vooloca sa yawooniherya ya muhusiha ni anaxikola. Nkaanyiheryani wi anaxikola akina nivano aakhalano minikwa, emanle wiiwa miselo mikina sa muhusiha. Awo yaaya weera eheeni? Awo yahaala okoha wa muhusiha mukina wi ephwanye miselo mikina vooloca sa mwaha mmohamoha. Wakhala wi muhusiha anaawiili onnacicimiherya soothariha sa muhusiha oopacerya, minikwa sa anaxikola sinahaala omala. Moophwanaphwana, wakhala wi nyuwo himwaanono yootaphulela ya masu a Yohani vooloca sa waataana variyari va Yesu ni Muluku a ikuru soothesene, nyuwo munanwerya okoherya wa mulipa oorepa a Piipiliya mukina wi mphwanye miselo sawaacereryeya. Ntoko yawooniherya, thokororyani yeeyo yaarempwe moorweela wa Mateu. Mwawiiwanana ni makuchuwelo a elapo ela ya Satana, Mateu oorepa masu a Yesu ariki: “Havo mutxhu onasuwela nihiku ni elukuluku itxhu seiha inaphatxuwaya: nari mano ankelo a wirimu, nari Mwana. Nto asuwenle t’Atithi pahi.” (Mateu 24:36) Mano masu ala anacicimiherya mwawiihai wi Yesu tahi Muluku Aikuru soothesene?

Yesu ooloca wi Atiithi annasuwela vancipale ompwaha Mwaana. Vanonto, waakhanle wi Yesu ti makupa a Muluku Aikuru soothesene, owo aahaala osuwela ichu imohamoha hiihaa ntoko Atiithi awe. Mwawiihiiha, Mwaana ni Atiithi hanaphwanaphwana. Nivano achu akina anahaala oloca: ‘Yesu aarino maphacuwelo meeli. Va makupa yaala meeli owo onaloca ntoko muchu.’ Nyenya naari waakhanle wi ti hiihaa, hanka vooloca sa munepa waweela? Waakhanle wi munepa waweela Muluku,ntakhara heeni Yesu haalonce wi munepa waweela onnasuwela yeeyo Atiithi anasuwelaaya?

Mwapwahiherya omuhuserya Piipiliya, nyuwo munahaala wiiwexexa makupa mancipale a Piipiliya aniiwanana ni mwaha ola. Awo annacicimiherya eparipari vooloca sa Atiithi, Mwaana, ni munepa waweela.—Salumu 90:2; Saweriwa T’arummwa 7:55; Kolosi 1:15.

[Nsu na vathi]