YOOHUSERYA 6
Yoowehererya Taani Erivovo wa Alipa Ookhwa?
1. Michaka yaphaama vooloca sa alipa ookhwa tiheeni?
Vaava Yesu aaphin’yeiye oBetaniya waacamela oYerusalemu, nthamwene awe Lazaro aahikhwa nave yaavira mahiku maxexe. Yesu aayawo omahiyeni vamoha ni Malita ni Mariya, arokora a mulipa ookhwa owo. Mwawaakuveya, muloko waathukumana. Nyuwo munnawerya waanyiherya ohakalala wa Malita ni Mariya vaava Yesu amvihaleiye Lazaro muukhwani?—Mwaalakhanye Yohane 11:21-24, 38-44.
Malita aasuwela michaka yaphaama vooloca sa alipa ookhwa. Owo aanasuwela wi Yehova ahaala waaviha alipa ookhwa wi ekhale akumi veelaponi ya vathi.—Mwaalakhanye Yobi 14:14, 15.
2. Mukhalelo wa achu ookhwa tuuvi?
Muluku aamuleela Aatamu: “Weyo wa nchupi, nave onarwa okookela okhala nchupi.”—MAPACERERYO 3:19, Sociedade Bíblica em Moçambique.
Achu apatuxiwe moorweela wa echaya. (Mapacereryo 2:7; 3:19) Hiyaano hanri minepa inakhala mmwiilini wanama. Hiyaano na soopatuxiwa sanama, hinaanono echu enapwahiherya okhala ekumi va okhwa. Vaava hiyaano nnakhwaahu, ocoopare ahu tho onnakhwa, nave muupuwelo ahu onnamala. Mwawiihiiha, Lazaro haalonce echu sa okhwa wawe nthowa nawi alipa ookhwa hanasuwela echu.—Mwaalakhanye Salmo 146:4; Eklesiasti 9:5, 6, 10.
Mano Muluku onnaahooxa achu ni mooro yamala okhwa? Vawoona wi Piipiliya onnooniherya wi alipa ookhwa hanasuwela echu, chukucha a mooro mwawooneyaxa ti nihusiheryo noowoka nenno nnamunyemula Muluku. Eyuupuwelo ya waahooxa achu ni mooro echu yoothanyeya wa Muluku.—Mwaalakhanye Yeremiya 7:31.
Moone exilema Mukhalelo wa Achu Ookhwa Tuuvi?
3. Alipa ookhwa annawerya oloca ni hiyo?
Alipa ookhwa hanawerya oloca nari wiiwa. (Salmo 115:17) Nyenya ankeelo akina ti oonanara, nave awo poti oloca ni achu nave anniipaka okhala ntoko achu ookhwa. (2 Petro 2:4) Yehova onnaniwateeliha weererya oloca ni alipa ookhwa.—Mwaalakhanye Malamulo 18:10, 11.
4. Taani onahaala oviihiwa muukhwani?
Macikhwi a achu yaawo ari mmahiyeni anahaala okookela okhala ni okumi veelaponi ya vathi. Nari akina yaale yaakhwile ehimusuwelaka Muluku nave yeera ichu soonanara anahaala oviihiwa muukhwani.—Mwaalakhanye Luka 23:43; Saweriwa Tarummwa 24:15.
Achu oviihiwa anahaala ohuserya eparipari vooloca sa Muluku ni omuroromela Yesu moorweela wa omwiiwelela yoowo. (Yawupulula 20:11-13) Yaawo anahaala ochikela okhala akumi nave yeera ichu saphaama enarwa epuha okumi woohimala veelaponi ya vathi.—Mwaalakhanye Yohane 5:28, 29.
5. Oviihiwa muukhwani onanihusiha eheeni vooloca sa Yehova?
Muluku oheeriha wi yoowehererya wa alipa ookhwa ekhale yooweryeya moorweela wa omurumiha Mwanawe wi akhwe ntakhara hiyaano. Hiihaa oviihiwa muukhwani onnanihusiha vooloca sa osivela ni ikharari sa Yehova. Alipa ookhwa yakookela okhala akumi, taani xaxaxa munachunaanyu omoona?—Mwaalakhanye Yohane 3:16; aRoma 6:23.