Ruthi ni Nowemi

Vaavaa o Isarayeli yaaraayawo etala, Muisarayeli mmoha awiichaniwa Nowemi aathaamela o Mowape ni iyawe vamoha ni anamwane awe apiili aasilopwana. Ohoolo waya iyawe aakhwa. Anamwane awe yaahaathela athiyana o Mowape, Ruthi ni Orpa. Voocharela anamwane a Nowemi yaakhwa tho.

Nowemi aahiiwa wi etala o Isarayeli yoomala, navento aakookelawo. Ruthi ni Orpa yaamuchara, nyenya erikimweeca, Nowemi aahaaleela: ‘Nyuwaano mwaatheliwe ni anamwanaaka, nave mwaanakikhaliha phaama. Kinachuna wi mutheliwe wanawiili. Mukookele owannyu o Mowape.’ Athiyana ale yaahaakhula: ‘Hinnoohiyaani ntakhara ninnoosivelaani.’ Nowemi aatitelela waaleela wi eroweke. Voomaliheryani Orpa aarowa ahala Ruthi. Nowemi aalocano: ‘Munootheliwa aa okookenleiye owannyawe ni amuluku awe, wetho hawe ni yoowo.’ Nto Ruthi aahaakhula: ‘Muhikititelihe mwaha owo wi koohiyeeni. Kinamoocharaani weiwo munayaanyuwo, nloko nanyu ti nloko naka, nave Muluku anyu ti Muluku aka.’ Nowemi onne hai vaavaa Ruthi aalonceiye yeela?

Ruthi ni Nowemi yaaphiya o Isarayeli omapacereryo wa elukuluku ya ohaca. Nihiku nimoha, Ruthi aaya wuurula isoro seiyo saahalela muculi mmacani wa Powasi mwaana a Rahapi. Powasi aahiiwa wi Ruthi aari Mmowape yoowo aamukhavihenrye Nowemi. Aahaaleela anamalapa awe wi ehiyeke isoro sawaaca mmacani wi Ruthi uuruleke.

Oxekuwa wa nihiku nenle, Nowemi aamukoha Ruthi: ‘Wuurunle woowi olelo?’ Ruthi aahaakhula: ‘Mwaneene a emaca oniichaniwa Powasi.’ Nowemi aamuleela: ‘Powasi mmusi ahu. Otitelele olapa mmacani mwawe ni asimwali akina. Heni yeereye yoonanara.’

Ruthi aatitelela olapa mmacani wa Powasi ophiyerya okuchuwa wa ohaca. Powasi aahoona wi Ruthi aanalapa phaama. Khalai wakhala wi mulopwana ookhwa ahirino anamwane, mmusi awe aanathelana ni naamukhwele owo. Mwawiihiiha, Powasi aamuthela Ruthi. Yaamuyara mwaana awiichaniwa Opeti nave ohoolo waya Opeti aakhala taata a Mwene Tavite. Asinthamwene a Nowemi yaatepa ohakalala. Awo yaaloca: ‘Wulu, Yehova ohoovaha Ruthi wi ookhaviheryeke nave vano wookhalano munamunna aa. Yehova acicimihiwe.’