Munkeelo a Yehova Aamwaakiha Esekiya

Asiriya yaakuxa omwene wa mahimo khumi wa Isarayeli. Nave Senakeripi mwene a Asiriya achuna tho okuxa omwene wa mahimo meeli wa Yuteya. Aapacerya okuxa epooma emoha ti emoha ya Yuteya, nto epooma achuneiye yaari ya Yerusalemu. Senakeripi haasuwela wi Yehova aanaakiha epooma ya Yerusalemu.

Esekiya mwene a Yuteya aamvaha Senakeripi ikhorowa sincipale wi ahimpahule Yerusalemu. Naamwi Senakeripi aakhenle ikhorowa, owo aahaaruma anakhoco awe wi emukuxe Yerusalemu. Achu mu epooma yaapacerya woova nthowa na Asiriya. Nto Esekiya aaloca: ‘Muhimoove mwene a Asariya ni muhoove waaca wa akhoco awe, ntakhara ole ori ni hiyaano tawuupasa.’

Senakeripi aamuruma namuchaka awe awiichaniwa Rapusaki wi aye o Yerusalemu wi aanyemule achu weiwo. Rapusaki aaheemela waacamela epooma nave aakhuwela: ‘Muhiwokiwe ti Esekiya. Hantonko okhala muluku a elapo ekina owenrye ovulusa nloko nimoharu mmatani wa mwene a Asiriya.’

Esekiya aamukoha Yehova echu yoophwanela weera. Yehova aahaakhula: ‘Ohoove yeeyo Rapusaki olonceiye. Senakeripi hani amukuxe Yerusalemu.’ Voocharela Esekiya aahaakhela ikaarata soorweela wa Senakeripi. Va ikaarata iho yaakhalavo masu ala: ‘Mwiiveleele mmatani mwaka. Yehova hani oovuluxeni.’ Esekiya aavekela: ‘Khwoo Pwiya Yehova munivuluxe, wi achu esuwele wi pahiru nyuwaano mwa Muluku eeparipari.’ Yehova aamuleela Esekiya ariki: ‘Mwene a Asiriya hani avolowe mu Yerusalemu. Miyaano kinamoopola epooma.’

Senakeripi aanaroromela wi Yerusalemu aahaala okhala awawe. Nto ohiyu omoha, Yehova aamuruma munkeelo awe wi aye weiwo anakhoco yaahan’yaayawo waacamela epooma. Munkeelo owo aawiipha anakhoco 185.000! Mwene Senakeripi aahaayeleela anakhoco awe akuru. Aahaaleela yaweera, nave aakookela owannyawe ookhulumuweene. Mmukhalelo yoowo Yehova aamoopola Esekiya ni Yerusalemu hiiha ntoko aalonceiye. Waakhanle wi ori o Yerusalemu, weyaano waahaala omuroromela Yehova?