Mapaceryiho

Liivuru Mpharihele Malakiheryo a Mpiipiliyani Mookumini onahaala wookhaviheryaani ophwanya iversikulu ni saweereya sa Mpiipiliyani wi mvilele makacamiho a nihiku ti nihiku. Yoolaleeryiwa ela enahaala tho wookhaviheryaani ophwanya iversikulu sa Mpiipiliyani soophwanelela wi mwaalipiheno akina ni waakhaviherya opaka soolakelela sinamucicimiha Yehova. Munaphwanela pahiru othanla mwaha yoowo munachunaanyu nave voocharela muhiye wi makoho ni mikwasu sawaakuveya sa saweereya sa Mpiipiliyani soohooleleeni. (Moone ekaaxa “Mukhalelo wa Opharihela Yoolaleeryiwa Yeela.”) Mwawaakuveya, nyuwaano munahaala ophwanya soorepa sincipale sa Mpiipiliyani seiho iri ehime yaphaama ya ikano ni nlipiho. Nyuwaano tho munahaala ophwanya muhakhu wi mukawane ni akina—iversikulu sa Mpiipiliyani seiho sinahaala waahakararya, waakhaviherya ovootha makacamiho aya, waavaha ohoolela ni waalipiha.

Mukhalelo wa Opharihela Yoolaleeryiwa Yeela

Wi mphwanye mwaha, muye va ekaaxa ya otholathola naari makupa ani miyaha sa vasulu. Liivuru Mpharihele Malakiheryo a Mpiipiliyani Mookumini okawanyiwe mu ipontu sa vasulu thanu napiili soohiyana: Echoko, Makacamiho, Meecelo, Mikhalelo, Muloko, Okumi wa Nihiku ti Nihiku ni Wunnuwa Omunepani. Miyaha mincipale inahaala ophwanyeyaka vathi va makupa a miyaha seiha sa vasulu. Muthanle mwaha munachunaanyu nave muye va elista ya miyaha. Nyenya wakhala nyuwaano hamunasuwela onaphwanyeyaayavo mwaheene, muye va Soothene nave mwaavye elista ya miyaha ophiyerya mphwannye yeeyo munaavyaanyu. Va mwaha ti mwaha, munahaala ophwanyakavo masu ooripelela. Makina masuru pahi nave makina makoho. Vaavaa munaalakhanyaanyu iversikulu sooripelela inarwa ohoolo wa masu, muupuwelele mukhalelo iniiwananaaya ni masu alociwe naari inaakhulaaya makoho. Mmikhalelo mikina, mwaha mmoha onahaala okawanyiwa mu miru mikhaani seiho sinahaala wookhaviheryaani ophwanya mookhweya mwaha yoowo munachunaanyu otholathola. Vakina vaya soorepa ikina sa Mpiipiliyani sookhalano masu awi, “Moone tho”. Iversikulu seiho sinnavaha miruku siniiwanana ni mwaha yoowo. Mu miyaha sincipale munahaala ophwanya elista ya “Sootakiherya sookhweleya sa Mpiipiliyani”. Iho sinnaruuha masu anathariha eponto ene naari nihusiheryo nnaphwanyeya mmwaha wa yoorepa eromoliwe. Masu yaala anahaala wookhaviheryaani osuwela echu yawuupuwelela vaavaa munaalakhanyaanyu eversikulu seiha.

Yoolaleeryiwa ela henathariha soorepa soothene sa mwaha ti mwaha. Nyenya enahaala okhala mapacereryo aphaama a otholathola wanyu. (Mas 2:1-6) Wi muhuserye mwawiiseela, mpharihele ireferensiya naari notas de estudo da Tradução do Novo Mundo da Bíblia Sagrada. Mpharihele Yoohoolela ya Otholathola ya Anamoona a Yehova naari Índice das Publicações da Torre de Vigia wi muhuserye sincipale vooloca sa yootaphulela ya yoorepa ya Mpiipiliyani naari ophara waya muteko. Moone yoolaleeryiwa ya hiihaanoru wi mphwanye wiiwesesiwa ovyaani wa iparipari sa Mpiipiliyani.

Nnaweherya wi liivuru Mpharihele Malakiheryo a Mpiipiliyani Mookumini onahaala wookhaviheryaani ophwanya miruku, masuwelelo ni wiiwexexa inaphwanyeya mu Soorepa Saweela. Moorweela wa opharihela yoolaleeryiwa yeela, nyuwaano chiryene munahaala olekecheya wi “masu a Muluku tookumi ni oowerya.”—Ahe 4:12.