Ekaarata ya Nikhuuru Noolamulela

Anna ni arokora oosiveliwa:

Omusivela Muluku ni achu, onnanceenyerya ‘oya waapaka oohuserya achu a maloko oothene ni waapatisa yaawo.’ (Mat. 28:19, 20; Mar. 12:28-31) Osivela weeparipari ntakhara amwaacamani wookhalano owerya. Owo wookhalano owerya wa otoroka mirima sa achu yaale arino “nchuno noophwanelela na waakhela ekumi yoohimala.”— Saw. 13:48.

Khalai, naatikithereya mu wiikhoveleliha mapaceryiho ni mukhalelo wa okawa soolaleeryiwa. Nyenya vano, ninnaphwanela orehererya mavyakelo ahu a ovaanela ni akina. Nnachuna wooniherya osivela wa achu, moorweela wa oloca miyaha seiyo inatannya mirima saya. Eyo enataphulela wi nnahaala ochuneyaka okhala awaakuva ni wiilipiserya nuupuwelaka sawuukhula saya ni soochuna sa muchu ti muchu. Eproxura ela eni enikhaviherye hai weerano yeeyo?

Eproxura ela erino miyaha 12 seiyo inooniherya mikhalelo nnaphwanelaahu wunnuwiha wi nooniherye osivela ni waapaka oohuserya. Mwaha ti mwa onatikitheryeya mu yaweereya emoha ya Mpiipiliyani yeeyo Yesu naari mmoha a Akristu oopacerya yoonihenryaaya mmuteko woolaleerya. Yoolakelela ahu tahi wiikhoveleliha mapaceryiho, nyenya ori waavya mikhalelo sa wooniherya osivela wahu ntakhara achu. Eparipari wi mukhalelo ori woothene wa mikhalelo seiya ti woochuneya mmuteko ahu woolaleerya. Nyenya nnahaala woona mikhalelo seiyo iri savameekhaaya wi nipaceryihe ovaanela, opaka oxekurya, naari tho weeciha soohuserya.

Vaavaa munahuseryaanyu mwaha ti mwaha muupuwele mukhalelo nyuwaano munahaalaanyu wooniherya mukhalelo yoowo, vaavaa munalocaanyu ni achu a muceche yoowo munakhalaanyu. Mwaavyeke mukhalelo wa waaceererya osivela wanyu ntakhara Yehova ni achu. Opwaha mavyakelo vyakala nryaahuno, osivela tonahaala wookhaviheryaani okhwaaniherya yoolakelela anyu ya waapaka oohuserya.

Wa hiyaano, ekari etokweene olapa vamoha ni nyuwaano moohihiyererya. (Sof. 3:9) Ninnavekela wi Yehova areelihe wiilipiserya yoowo munooniheryaanyu wi mwaasivele achu ni waapaka oohuserya!