Moota wa Opharihela Michaka Yaphaama Yoorweela wa Muluku!
Eproxura Evyaani Epakiwe wi Enikhaviherye Opaka Irevisita ni Opaceryiha Soohuserya sa Piipiliya
1. Eproxura taani evyaani evonyiwe va Kongreso a Edistritu “Okhapelele Murima-à!” epakiwe wi enikhaviherye opaka irevisita ni opaceryiha soohuserya sa Piipiliya?
1 Variyari va Kongreso a Edistritu “Okhapelele Murima-à!”, hiyaano naahakalala waakhela eproxura evyaani wi enikhaviherye opaka irevisita ni opaceryiha soohuserya sa Piipiliya. Michaka Yaphaama Yoorweela wa Muluku! Enalikana ni eproxura Muluku Ontchuna, yeeyo enaraceelaaya, mahusiheryo aya ti ookhuveya. Ela enneeriha okhweya opaceryiha soohuserya sa Piipiliya va mulako. Nyenya, eproxura Muluku Ontchuna yaathokororya sookhweleya sa eKiristu, sikina siri soovila weemereryiwa ni oohuserya avyaani, eproxura ela evyaani enathokororya michaka yaphaama inaphwanyeya mPiipiliyani.—Saw. 15:35.
2. Ntakhara heeni Michaka Yaphaama epakiwaaya?
2 Ntakhara heeni epakiwaaya? Anna orukurerya veelaponi yaanachuna echu yookhweya yaahaala waakuxa achu murima wa eparipari nave yahaala ophariheliwa muteko wi yaahoolela awo wa yoohuserya ya liivuru Piipiliya Onahusiha Eheeni, ekaruma ahu yoopacerya ya soohuserya sa Piipiliya. Achu anamoova liivuru wiiliwiili annachuna omuhuserya Piipiliya epharihelaka eproxura. Mu waaceererya, eproxura ti yookhweya vancipale otaphuleliwa mu ilocelo sincipale.
3. Eproxura ela ehiyanne hai ni soolaleeryiwa ikina sa yoohuserya?
3 Epakiwe Hai: Sincipale sa soolaleeryiwa sahu sirempwe mmukhalelo wi muchu awerye waalakhanya ni wiiwexexa eparipari, naamwi ahirino nikhaviheryo. Yoolaleeryiwa ela ti yoohiyana. Ela erempwe ntoko yoohoolela ya yoohuserya ya Piipiliya nnikhaviheryo na muhusiha. Mwawiihiiha, vaavaa munamvahaanyu muchu ti waphaama othokororya eparakrafo emoha nari piili. Iparakrafo ti sookhuveya, hiihaa iho poti othokororyiwa va mulako wa muchu nari va nipuro nawe na maroca. Naamwi yoohuserya 1 ti yaphaama opacerya, hiyaano poti opaceryiha yoohuserya makupa ari oothene mu eproxura.
4. Eproxura ela enanikhaviherya hai ohusiha moorweela wa Piipiliya?
4 Mu soolaleeryiwa sahu sincipale, maakhulo a makoho oorempwa annaphwanyeya mu iparakrafo. Nyenya, mu yoolaleeryiwa ela, maakhulo anaphwanyeya xaxaxa mPiipiliyani. Achu ancipale anachuna ohuserya orweela mPiipiliyani ohiya orweela mu soolaleeryiwa sahu. Hiihaa, hiyaavo yoorepa eromoliwe elociwe masu aya. Iho inaphwanela waalakhanyiwa mPiipiliyani. Eyo ennaakhaviherya oohuserya osuwela wi yeeyo anahuseryaaya enarweela wa Muluku.—Yes. 54:13.
5. Ntakhara heeni ti wookhweleya muhusiha wiirehererya phaama wa yoohuserya eri yoothene?
5 Eproxura henataphulela soorempwa soothene. Ntakhara heeni? Ela epakiwe wi emuceenyerye oohuserya wi apake makoho nave enneeriha wi muhusiha apharihele owerya wawe ohusiha. Hiihaa, ti wookhweleya wiirehererya phaama wa yoohuserya eri yoothene. Nsu na ephoole: Muhiloce vancipale. Hiyaano ninnasiveliwa otaphulela soorempwa. Nyenya wiiliwiili ninnaphura vancipale moorweela wa omveka oohuserya wi ataphulele yeeyo owo onuupuweleiye eri yootaphulela ya yoorempwa. Moorweela wa opharihela makoho mwa miruku, hiyaano nnanwerya omukhaviherya owo woopelela yootaphulela ya yoorepa eri yoothene.—Saw 17:2.
6. Nnii nipharihele hai eproxura: (a) weiwo achu aryaaya awaakaaha vooloca sa Muluku ni Piipiliya? (b) nayaaka empa ni empa? (c) naapharihelaka wooniherya wawaakuveya wi nipaceryiha soohuserya sa Piipiliya? (d) naapakaka irevisita?
6 Ntoko soolaleeryiwa ikina sa weecihano soohuserya, eproxura ela poti ovahiwa mu elukuluku yoothene, moohipwacha yoolaleeryiwa taani ya mweeri. Ancipale anahaala osiveliwa opharihela yeela mu opaceryiha soohuserya mwawaakuveya va mulakoni. Mu waaceererya, ntoko elociwaaya va Kongreso a Edistritu, opharihela yeela vaavaa munaaxekuryaanyu yaawo oonihenrye ochuna “chiryene enahaala weeriha wi muteko wa opaka erevisita okhale woohakalaliha!”—Moone ikaaxa va ipaaxina 5-7.
7. Munii muweherye hai weeciha yoohuserya ya Piipiliya mpharihelaka eproxura ela?
7 Moota wa Weeciha Yoohuserya: Hiyaano poti opacerya oloca moorweela wa waalakhanya makoho ooripa arino inumero. Voocharela, naalakhanye eparagrafo ni soorempwa ithitimanne. Nipharihele makoho mwa miruku wi nimukhaviherye namakhala wi iwexexe yootaphulela ya soorempwa. Namala, nihaakumve oya nikupa nnacharela, nimukohe namakhala wi aakhule nikoho nooripa, wi nsuwele wakhala wi ohiiwexexa. Va oxekurya woopacerya, ti waphaama othokororya pahiru nikoho nimoha nooripa. Voovira wa elukuluku, hiyaano poti orakamiha ophiyerya othokororya yoohuserya yoothene.
8. Nnaphwanela oromola hai soorempwa, nave ntakhara heeni?
8 Soorempwa iromoliwe irino nsu “mwaalakhanye” ti seiyo inaakhula mwawaakuveya nikoho nooripa. Vaavaa nnaromolaahu, yoorempwa, nsepe oloca, “Murummwa Paulo oorepa” nari “Moone yeeyo Yeremiya olohenryeiye.” Namakhala poti wuupuwela wi yeeyo hiyaano nnaalakhanya masu aachu phyakala. Ti waphaama wi, “Nsu na Muluku nnii” nari, “Moone yeeyo Piipiliya olohenryeiye.”
9. Soorepa soothene iromoliwe inaphwanela waalakhanyiwa variyari va yoohuserya?
9 Nnaphwanela waalakhanya soorepa soothene iromoliwe nari pahiru soorepa “mwaalakhanye”? Nnaphwanela ohooleliwa ni mikhalelo. Soorepa soothene iromoliwe sookhalano yoolakelela aya. Yoorepa eri yoothene yookhalano miseelo inaphwanela othokororya. Nyenya ikwaha ikina, nthowa na oohuserya ohikhalano elukuluku, ohichuna, nari ohiwerya waalakhanya poti weeriha wi nthokororye pahiru soorepa “mwaalakhanye.”
10. Ti liini nnaphwanelaahu oraceeliha yoohuserya ni liivuru Piipiliya Onahusiha Eheeni?
10 Naaraceelihaka ni Liivuru Piipiliya Onahusiha Eheeni: Vaculi va othokororya makupa mancipale nave nimanle otikitherya yookhovelela yaphaama, hiyaano poti oraceeliha ni liivuru Piipiliya Onahusiha Eheeni nari opwahiherya ni eproxura Michaka Yaphaama. Alaleeryi anaphwanela opharihela moonelo aya wi elakelele ti liini anahaalaaya oraceeliha. Namala oraceeliha ni liivuru Piipiliya Onahusiha Eheeni, nnaphwanela opacerya o mapacereryo? Haavovo malamulo wa yeela. Khata muchu ti oohiyana. Nyenya, oohuserya ancipale anahaala ophura moorweela wa wuuluulela miyaha imohamoha wanawiili mwawaacererya mu liivuru Piipiliya Onahusiha Eheeni.
11. Ntakhara heeni nnaphwanelaahu opharihela phaama eproxura ela evyaani?
11 Mu elapo eramme michaka yaphaama, hiyaano nookhalano ekari etokotoko ya olaleerya michaka yaphaama—wi Omwene wa Muluku onnalamulela nave wi moohilekela onahaala ohoolela elapo evyaani mummo ekhaikhai enahaalaaya wiichaalamo! (Mat. 24:14; 2 Pet. 3:13) Hiyaano ninnaroromela wi ancipale yaawo anawiriyana michaka seiha anahaala ovuwiha masu ala ooveereliwa: “Eri etxhu yorèra omona arwaka mmiyakoni namitxhaka onalaleya muretxele, witxhàla ni nivuluso! Yowo onnamulèla Yerusalemu ariki: “Muluku à onnalamuela.” (Yes. 52:7, BNM) Hankooni nipharihele eproxura ela evyaani wi nlaleerye michaka yaphaama yoorweela wa Muluku wa oovoliwa nchanana mu ekulucu ahu!
[Eruku va epaaxina 5]
Weiwo Achu Aryaaya Awaakaaha Vooloca sa Muluku ni Piipiliya:
● Mmakupa makina, alipa oolaleerya annoona wi masu “Muluku” ni “Piipiliya” annakwasa ovaanela. Mmukhalelo yoowo, va oxekurya woopacerya, enahaala okhala phaama othokororya miyaha sinawuukhula achu vanipuroni, ntoko ochuneya wa olamulelo waphaama, ti woowi nnahaalaahu ophwanyawo nikhaviheryo na imusi, ni sa mmwaahiyu. Akhweya eproxura Michaka Yaphaama poti opaceryihiwa nimanle ovaanela ikwaha sincipale nthokororyaka ti mwawiihai nnasuwelaahu wi Muluku ookhala ni ntakhara heeni Piipiliya ti eeparipari.
[Eruku va epaaxina 6]
Nayaaka Empa ni Empa:
● “Kinooxekuryaani wi kiwooniheeni moota oryaaya wookhweya osuwela yeeyo Muluku onachuneiye oweerela achu mmwaahiyu. Moontoko wiikoha wakhala wi Muluku onahaala onoopola wa makacamiho? [Muweherye naakhulo.] Eproxura ela ennooniherya ti woowi mPiipiliyani munahaalaanyu ophwanyawo naakhulo na nikoho nla. [Mumvahe eproxura, nave mwaalakhanye eparagrafo yoopacerya ya yoohuserya 1, vamoha ni Yeremiya 29:11.] Moorweela wa yeela, ennoosivelaani osuwela wi Muluku onachuna wi hiyaano nikhaleno mmwaahiyu waphaama? [Muweherye naakhulo.] Wakhala wi onnoosivelaani, nyuwano poti okuha eproxura ela. Ekwaha enacharela, hiyaano poti othokororya eparagrafo yanawiili wi nsuwele naakhulo na Piipiliya na nikoho nla, ‘Muluku onahaala owoopola hai achu wa makacamiho?’” Wakhala wi namakhala onnooniherya okhalano elukuluku yincipale va oxekurya woopacerya, nyuwano poti waalakhanya ni othokororya eparagrafo yanawiili ni soorempwa saya sa Piipiliya chaaru. Mvaanele okooka wi muthokororye nikoho nanawiili va yoohuserya yeeyo.
● Achu ancipale annasiveliwa ovekela, xaxaxa vaavaa anakumanaaya ni makacamiho. Nyuwano munnavekela ilukuluku ikina? [Muweherye naakhulo.] Munuupuwela wi Muluku onnawiriyana mavekelo oothene, nari wi mavekelo makina hanamuhakalaliha? [Muweherye naakhulo.] Miyaano kookhalano eproxura enooniherya moota wa ophwanya naakhulo na Piipiliya wa makoho yaawo. [Mumvahe eproxura, nave muthokororye vamoha eparakrafo yoopacerya ya yoohuserya 12 ni soorempwa “mwaalakhanye.” Tahi echu yootikiniha osuwela wi Muluku onnachuna oniwiriyana? Nyenya wi niphure vancipale moorweela wa nivekelo, nnaphwanela omusuwela Muluku phaama. [Mukhunule yoohuserya 2 nave mvuwihe miru mikhaani.] Wakhala wi munnachuna, miyaano poti woohiyeraani eproxura ela, nave ekwaha ekina hiyaano poti waalakhanya maakhulo a Piipiliya a makoho yaala oochuneya.”
● “Kiruule ntakhara achu annuukhuwa vooloca sa elapo yeela enaya woowi. Nyuwano munuupuwela wi makhalelo anahaala okhala phaama? [Muweherye naakhulo.] Achu ancipale annatikiniheya ohuserya wi Piipiliya ookhalano michaka yaphaama yeeyo enawerya onivaha ewehereryo. Va aakhalavo makoho makina yaawo Piipiliya onaakhuleiye.” Mumvahe eproxura, nave mumveke wi athanle nikoho oculi wa ekaapa nenlo onachuneiyexa osuwela. Mwamala mukhunule yoohuserya eyo, nave mooniherye yoohuserya. Mvaanele okooka wi muthokororye nikoho nnacharela va yoohuserya yeeyo.
[Eruku va epaaxina 7]
Neererye Wooniherya Wawaakuveya:
● “Miyaano kirwenle woovahani ekursu evyaani ya yoohuserya ya Piipiliya. Eproxura ela erino soohuserya 15 sinooniherya ti woowi mPiipiliyani munahaalaanyu ophwanyawo maakhulo a makoho ookhweleya. [Mmoonihe ekaapa ohoolo ni oculi.] Moontoko weererya omwiiwexexa Piipiliya? [Muweherye naakhulo.] Kinchuna owoonihani okhweya wa soohuserya seiya. [Muthokororye eparakrafo yoopacerya ya nikoho 3 va yoohuserya 3, nave mwaalakhanye Yawupulula 21:4, 5.] Wakhala woophwanelela, muthokororye eparakrafo enacharela ni soorempwa “mwaalakhanye.”] Wakhala wi munnachuna, miyaano poti woohiyeraani eproxura ela. Hiyaano ninnooceenyeryaani wi mweererye omuhuserya Piipiliya ekwaha emoha. Mwasiveliwa, poti opwahiherya. Ekwaha enacharela, hiyaano poti othokororya yoohuserya yoopacerya. Moone wi orakama waya epaaxina emoha pahiru.”
[Eruku va epaaxina 7]
Naapakaka Irevisita:
● Vaavaa nnakookaahu wi nimuxekurye muchu oonihenrye ochuna, hiyaano poti oloca: “Koosiveliwa owoonaani wanawiili. Kooruuha eproxura ela enavaha maakhulo a Piipiliya a makoho mancipale oochuneya. [Mumvahe eproxura, nave mumveke wi avarerye oculi wa ekaapa.] Mwaha taani munachunaanyu osuwela? [Muweherye naakhulo. Mwamala mukhunule yoohuserya yeeyo othanlileiye.] Kinchuna owoonihani moota wa opharihela eproxura ela wi mphwanye naakhulo na Piipiliya.” Mooniherye yoohuserya moorweela wa othokororya eparagrafo emoha nari piili ni soorempwa “mwaalakhanye.” Ti wookhweya opaceryiha yoohuserya ya Piipiliya! Muhiye eproxura ni namakhala nave mvaanele okooka. Vaavaa munamalihaanyu yoohuserya, nyuwano poti othokororya yoohuserya ekina ethanliwe ni namakhala nari opacerya woopaceryani wa eproxura.