Wunnuwiha Mavyakelo Ahu mu Orummwa—Opaceryiha Yoohuserya ya Piipiliya Vaate va Namakhala ni Eproxura Michaka Yaphaama Yoorweela wa Muluku!
Ntakhara Heeni ti Yoochuneya: Wi naapake oohuserya, nnaphwanela okhala ahusiha a Masu a Muluku. (Mat. 28:19, 20) Oothene hiyo nnanwerya okhala ahusiha aphaama a Masu a Muluku moorweela wa opharihela ikaruma nivahiwaahu. Eproxura Michaka Yaphaama Yoorweela wa Muluku! ti yoophwanelela ntakhara wi epakeliwe wi enikhaviherye waahusiha akina eparipari. Chiryene, nnanwerya opharihela wi nipaceryihe yoohuserya ya Piipiliya mu ovaanela woopacerya va mukhora wa namakhala.
Mukhalelo wa Weerano Yeela:
• Muuluulele mapaceryiho va ekaaxa.—Moone tho Orummwa Wahu wa Omwene Marsu a 2013.
• Mukuhe eproxura anyu emoha mmurupani mwanyu wa olaleerya. Nave tho mukhaleno iproxura sawaakhwanela wi mvahe.
• Muthokororye eparakrafo emoha naari piili, mu aminutu 10 naari vakhaani.
Mweererye Ela Variyari va Mweeri:
• Mvekele wi mukhaleno nchuno na ohoolela yoohuserya ya Piipiliya. Navetho, mveke nikhaviheryo na Yehova wi mpaceryihe yoohuserya ya Piipiliya nave wi mukhale muhusiha aphaama a eparipari.—Afil. 2:13.
• Mu malapelo a echoko naari mu yoohuserya ya muchu mukhateiye, mwiivahe elukuluku wi muhuserye phaama mapaceryiho. Nyuwaano munanwerya oloca moolekecha ni opaceryiha yoohuserya ya Piipiliya va mukhora wa namakhala.
[Ekaaxa va epaaxina 1]
Vaavaa Munayaanyu Empa ni Empa:
“Kinaachekurya achu woona wi ancipale ari awuukhuwa vooloca sa makacamiho mancipale mu elapo. Munuupuwela wi nihiku nimoha ichu sinahaala oreheryeya? [Nwehererye naakhulo.] Ancipale annatikhina ohuserya wi Piipiliya okhalano michaka saphaama sinavaha ewehereryo. Va annaphwanyeya makoho yaawo anaakhuliwa Mpiipiliyani.” Mumvahe namakhala eproxura, nave mumveke wi athanle nikoho nnaphwanyeya omapacereryo nenlo nimutannyile murima vancipale. Voocharela muye va mwaha yoowo, nave mooniherye yoohuserya ya Piipiliya. Mpake marehereryo a ochekurya wi muthokororye mwaha yoowo.