Ohusiha Moorweela wa Opharihela Eproxura Michaka Yaphaama
1. Eproxura Michaka Yaphaama epakiwe ni yoolakelela taani?
1 Ntoko ethokororyiwaaya mu Orummwa Wahu wa Omwene wa Yunyo, ekaruma emoha yoochuneya ya ikaruma sahu sa ohusihano, eproxura Michaka Yaphaama Yoorweela wa Muluku! Yookhalano soorepa iromoliwe nyenya sihirempwale wi simukhaviherye namakhala ohuserya Mpiipiliyani mwawe. Soolaleeryiwa sahu sincipale sirempwe mmukhalelo oneeriha wi mulipa awaalakhanya ahuseryeke mukhateiye, nyenya eproxura ela epakiwe wi ethokororyiweke vamoha ni mulipa oohusiha. Mwawiihiiha, vaavaa nnakawaahu, nnaphwanela wiilipixerya wi nooniherye mukhalelo enahuseryiwaaya, wi namakhala oone mukhalelo wookhweya wa ohuserya michaka yaphaama orweela Mpiipiliyani.—Mat. 13:44.
2. Nnii nipharihele hai eproxura Michaka Yaphaama mu ekwaha yoopacerya?
2 Ekwaha Yoopacerya: Nyuwaano akhweya muloce: “Koophiya vaate vanyu nthowa nawi achu ancipale annuukhuwa vooloca sa omwaahiyu wa achu. Nyuwaano munuupuwela wi omwaahiyu onahaala okhala waphaama? [Nweherye naakhulo.] Piipiliya ookhalano michaka yaphaama seiho sinawerya onivaha ewehereryo. Ala makoho yaawo Piipiliya onaakhuleiye.” Mmoonihe namakhala wookuchulani wa eproxura, nave mumveke wi athanle nikoho nimoha. Nave mooniherye mukhalelo enahuseryiwaaya mpharihelaka eparakrafo yoopacerya ya mwaha yoowo othanlileiye. Mukhalelo mukina ori ompakela namakhala nikoho noochuneya nniiwanana ni mwaha nyuwaano muthanlilaanyu, nave mooniherye mukhalelo eproxura eyo enahaalaaya omukhaviherya ophwanya maakhulo a Mpiipiliyani. Wakhala yookhalawo exilema eniiwanana ni yoohuserya yeela mu jw.org, alaleeryi annarumiha variyari va ochekula waaya.
3. Mutharihe mukhalelo wa weeciha yoohuserya ya Piipiliya mpharihelaka eproxura Michaka Yaphaama.
3 Mukhalelo wa Weeciha Yoohuserya: (1) Mwaalakhanye nikoho nooriipelela wi mmukhaviherye namakhala otikitherya muupuwelo awe mmwaha woochuneya. (2) Mwaalakhanye eparakrafo enacharela. (3) Mwaalakhanye yoorepa ethonyeriwe ni masu othitimana, nave mpake nikoho mmukhalelo waphaama wi mmukhaviherye namakhala woona ti mwawiihai yoorepa eyo enaakhulaaya nikoho. (4) Wakhala wi yookhalavo eparakrafo ekina eri vathi va nikoho nimohamoha, mpharihele sooleeliherya 2 ni 3. Wakhala wi yookhalavo exilema enaakhula nikoho, nave nyuwaano nivano hamuruminhe wa namakhala, mweereno ela variyari va othokororya wanyu. (5) Wookuchulani, mumveke namakhala waakhula nikoho nooriipelela wi muroromele wakhala wi ohiiwexexa.
4. Tiheeni enii enikhaviherye opharihela ekaruma ela moophwanelela?
4 Mwiikhovelelihe ni ekaruma ela. Mphariheleke ikari soothene. Ehaakumve yoohuserya eri yoothene, mmuupuwele ohuserya ni mukhalelo waphaama wa waalikhela soorepa ni yoohusiha aya. (Masi. 15:28; Saw. 17:2, 3) Vaavaa muneeraanyu mukhovelele ni okhalano mavyakelo, munahaala woonaka eproxura ela okhala ekaruma yookhweya waahusihano achu eparipari!