Moota wa Opharihela Taani Aneera Yookhwela Ya Yehova Olelo?
Eproxura Evyaani Epakiwe wi Yaahoolele Oohuserya a Piipiliya mu Marehereryo
1. Yoochuna taani ya makupa mararu ya eproxura Yookhwela ya Yehova?
1 Nyuwano moopacerya opharihela eproxura evyaani Taani Aneera Yookhwela Ya Yehova Olelo? Yoochuna aya ti (1) waakhoveleliha oohuserya a Piipiliya ni hiyo ntoko achu (2) waakhaviherya awo ohuserya vooloca sa miteko sahu, ni (3) woona marehereryo ahu ophara waya muteko. Eproxura Yookhwela ya Yehova erino soohuserya sa epaaxina emoha sinahaala ophariheliwa mookhweya mpuwa mwa aminutu athanu nari khumi omakuchuwelo wa khata yoohuserya.
2. Tharihani opakiwa ni makhalelo a eproxura ela.
2 Epakiwe Hai: Eproxura ela ekawanyiwe makupa mararu, khata nikupa nnathokororya mukhalelo woohiyana wa marehereryo a Yehova ntoko elociwaaya osulu. Muru ori woothene wa soohuserya 28 orempwe ntoko nikoho, nave miru mikhaani sooripa inacharela inaakhula nikoho nenlo. Ifootu soorweela mu ilapo 50 siri mwemmo sinooniherya mukhalelo wa muteko ahu veelaponi yoothene. Soohuserya ikaaxa “Suwelani Ichu Sikina,” irino miruku munahaalaanyu owerya.
3. Nnii nipharihele hai eproxura Yookhwela ya Yehova?
3 Muni mpharihele Hai: Mpacerye moorweela wa oloca nikoho nri muru wa yoohuserya. Mwamala, vaavaa munaalakhanyaanyu yoohuserya vamoha, mvuwihe miru sooripa. Vookuchula, muthokororye makoho awuuluulela ari vathi va epaaxina. Nyuwano poti waalakhanya yoohuserya yoothene nari waalakhanya ni othokororya eyo nikupa ti nikupa. Mpharihele moonelo anyu wi mulakelele soorepa taani munahaalaanyu waalakhanya. Muhicuwale othokororya iruku ni ikaaxa “Suwelani Ichu Sikina.” Mmakhalelo mancipale, soohuserya inaphwanela othokororyiwa moocharelana. Nyenya, mukhale ootaphuwa ocuphela ohoolo wa yoohuserya eniiwanana ni echu enachuneya mwawaakuveya. Ntoko yawooniherya, wakhala wi muthukumano mutokotoko wa mahiku meeli nari mararu onnaacamela, nyuwano poti ocuphela yoohuserya 11.
4. Ntakhara heeni muryaanyu oohakalala okhalano ekaruma ela evyaani?
4 Vaavaa nnamuhuseryaahu Piipiliya ni muchu, hiyaano nnamukhaviherya wi aasuwele Atiithi ahu awirimu. Nyenya, nnaphwanela tho omuhusiha vooloca sa marehereryo a Yehova. (Masi. 6:20) Ninnahakalala vancipale okhalano ekaruma ela evyaani eneeriha okhala yookhweya weerano hiihaa!