Muwaakhele Phaama!

1. Elukuluku taani enanivaha ekari yaphaama ya ovaha onamoona, nave ntakhara heeni?

¹ Hiyaavovo elukuluku enanivaha ekari yaphaama ya ovaha onamoona opwaha Yawuupuxerya ya vayaakhani. Muthokororye: Eyaakha yeela opwaha macikhwi khumi a alipa ooxekurya annaweheryiwa ophiya va Yawuupuxerya wi yiiwe vooloca sa saweereya piili itokotoko sa osivela, seiyo sooniheryiwe moorweela wa mukucho. (Yoh. 3:16; 15:13) Awo anahaala ohuserya vooloca sa mareeliho anahaalaaya ophwanya moorweela wa yamahala ya Yehova. (Yes. 65:21-23) Mwawiihiiha, namaloca tahi yooworu pahi onahaala ovaha onamoona va elukuluku yeela. Alipa oowiriyana oothene anahaala okhalano ekari ya ovaha onamoona wakuru moorweela wa owaakhela phaama alipa ooxekurya.​—Arom. 15:7.

2. Nnii niwaakhele phaama hai alipa ooxekurya?

² Ohiya pahi ophara nipuro nanyu ni omaala muweheryaka opacerya wa eprograma, ntakhara heeni muhinapaceryaanyu waaleela nsina nanyu yaawo mwaacamannaanyuno? Alipa ooxekurya poti okhala oohaleeliheya ni oohisuwela yeeyo anawehereryaaya. Otheya ni waamwenyerya wahu woonthamwene onahaala oweeriha okhala phaama. Wi musuwele wakhala wi muchu oruule ntoko yookhumelela ya waakhela nwopelo, nyuwano poti omukoha wakhala wi ela etila yoopacerya orwa mmithukumano sahu nari wakhala wi owo onnamusuwela muchu mmulokoni. Akhweya nyuwano poti onwopa wi akiraathi ni nyuwano nave muukeno Piipiliya anyu ni liivuru a macipo. Wakhala wi enahaala ophariheliwa Empa ya Omwene, akhweya enahaala okhala wooweryeya omooniha mwawaakuveya. Wamala mwaha, mwiivahe wi mwaakhule makoho awe. Wakhala wi muloko anyu onaphwanela ohiya Empa ya Omwene mwawaakuveya wi muloko mukina opharihele muteko, nyuwano poti oloca: “Miyaano kaahaala osiveliwa wiiwa yeeyo munuupuwelaanyu vooloca sa eprograma. Kinahaala woophwanyaani hai?” Mvinyaka mpake marehereryo a omuxekurya. Mansiau anahaala waavyaavya waalipiha alaleeryi ooyerye yaawo anahaala orwa.

3. Ntakhara heeni ti wookhweleya opacerya owaakhela phaama alipa ooxekurya va Yawuupuxerya?

³ Wa alipa ooxekurya ancipale, ela enahaala okhala etila yoopacerya ya olawiha ohakalala, murecele, ni wiiwanana wa paradaiso oomunepani yoowo hiyaano nnapuhaahu ntoko achu a Yehova. (Sal. 29:11; Yes. 11:6-9; 65:13, 14) Moonelo taani alipa ooxekurya anahaalaaya orowano? Sincipale sinarweela wa opacerya wahu owaakhela phaama.