Taani Aneera Yookhwela ya Yehova Olelo?
1. Ti liini nnahaalaahu opacerya othokororya Taani Aneera Yookhwela ya Yehova Olelo? nave enahaala onikhaviherya hai?
1 Opacerya esumana ya 28 a Otupuru, Taani Aneera Yookhwela ya Yehova Olelo? enahaala othokororyiwa va Yoohuserya ya Piipiliya ya Muloko. Eproxura evyaani yeela evonyiwe o Kongreso a Edistritu “Okhapelele Murima Aa!” epakiwe wi yaahoolele oohuserya a Piipiliya mu marehereryo. Othokororya yoolaleeryiwa yeela enahaala waaceererya othamalela wahu wa opaka makupa a marehereryo a Yehova navetho enahaala onikhaviherya osuwela phaama ekaruma yeela yookhweleya wa orummwa.—Sal. 48:13.
2. Eproxura ela enahaala ohuseryiwa hai mmulokoni?
2 Enii Ehuseryiwe Hai: Muhusiha onahaala okawa elukuluku awe wi yoohuserya eri yoothene ethokororyiwe phaama. Owo onahaala opaceryiha soohuserya 28 moorweela wa waalakhanya nikoho nenlo nri muru wa yoohuserya eri yoothene. Amala, owo onahaala onwopa mulipa waalakhanya wi aalakhanye eparagrafo yoopacerya. Voocharela, muhusiha onahaala waakoha alipa oowiriyana nikoho nenlo oreherenryeiye wa mapaceryiho. Voocharela, khata nikupa nnapacerya ni masu ooripa nnaphwanela waalakhanyiwa ni othokororyiwa meekhaaya. Namala waalakhanyiwa nikupa, muhusiha onahaala waawopa alipa oowiriyana wi eloce moota nikupa nlo nnaakhulaaya nikoho nri muru wa yoohuserya eyo. Eproxura tho yookhalano iruku sincipale inaphwanela olociwa. Soorempwa soochuneya inaphwanela waalakhanyiwa elukuluku yeemererya. Ahaakumve ocuphela yoohuserya enacharela, muhusiha onaphwanela wuuluulela moorweela wa opaka makoho ari vathi va epaaxina. Yakhalavo ekaaxa “Suwelani Ichu Sikina”, enahaala waalakhanyiwa, nave muhusiha onahaala waawopa alipa oowiriyana wi eloce moota oohuserya a Piipiliya aahaaleiye ophura achara ekano eyo. Wakhala wi elukuluku enneemererya omakuchuwelo wa yoohuserya, muhusiha poti opharihela miru sa soohuserya ntoko makoho awuuluulela. Muupuwele wi ola tahi mukhalelo wa weeciha yoohuserya ya Piipiliya ya veechokoni.
3. Nnii niwerye hai ophura phaama va ohuserya eproxura yeela?
3 Wi mphure phaama, munaphwanela ophiya o muthukumano mwiireherenrye phaama. Mwiilipixerye wuuka mu waakhula. Variyari va yoohuserya, muupuwele vooloca sa ntakhara heeni miseelo seiyo ti sa mphurelo wa oohuserya a Piipiliya. Othokororya wahu eproxura yeela evyaani enahaala onireherya wi naakhaviherye akina wuuka weerano yookhwela ya Muluku wi awo tho ekhaleno ewehereryo ya okhala wookhala.—1 Yoh. 2:17.