Wunnuwiha Mavyakelo Ahu mu Orummwa—Wooniherya Yoohuserya ya Piipiliya Moorweela wa Ompharihela Liivuru Piipiliya Onahusiha Eheeni
Ntakhara Heeni ti Yoochuneya: Wa achu ancipale, hanasiveliwa ni masu a wi “ohuserya”. Eyo ennawuupuxerya saweereya sa oxikola—waalakhanya, otholathola, muteko wa opaka owaani, ni isaami—ichu heiho awo yaahisiveliwaayano. Mmukhalelo mukina, achu ancipale anahaala osiveliwa othokororya ichu sinawuukhula seiho anahoolelaaya. Mwawiihiiha, ti wookhweleya waakhaviherya wi omuhuserya Piipiliya mukhalelo wa phaama onakhaviherya ovootha wuukhuwa waya.—Masi. 22:29.
Mukhalelo wa Weerano Yeela:
• Mmanle oloca nsina nanyu, mmukohe namakhala wakhala wi owo ori awuukhuwa ni omwaahiyu awe vamoha ni wa emusi awe.
• Muloce wi achu ancipale ari tho awuukhuwa, nave mmoonihe makoho eri omapacereryo wa liivuru Piipiliya Onahusiha Eheeni. Mutharihe wi liivuru ola ookhalano miyaha sookhweya wiiwexexa sinooniherya ti heeni Piipiliya onahusiheiye vooloca sa omwaahiyu ni miyaha mikina, nave mmukohe mwaha taani onachuneiye osuwela.
• Mumvahe liivuru nave muye va mwaha yoowo othanlileiye. Mutharihe wi makoho ari omapacereryo wa miyaha annaakhuliwa mu iparakrafo inacharela.
• Mumveke namakhala wi aalakhanye eparakrafo yoopacerya wakhala wooweryeya. Voocharela mpake nikoho na eparakrafo yeeyo, nave muthokororye vamoha naakhulo. Muthanle nave muthokororye yoorepa eromoliwe va eparakrafo eniiwanana ni naakhulo. Mmoonihe mukhalelo mphwannyaanyu naakhulo mu liivuru.
• Muthokororye eparakrafo yoocharela, nyenya mu elukuluku ela munveke namakhala wi eererye waakhula nikoho nlo mmasu awe.
• Mmuthamalele, nave mpake marehereryo a okooka wi mmalihe mwaha.
• Wakhala wooweryeya, mmoonihe eviitiyu mu jw.org erino muru Como é um Estudo Bíblico?
Mweererye Ela Variyari va Mweeri:
• Mvekele wa Yehova wi areelihe wiilipixerya wanyu wa opaceryiha yoohuserya ya Piipiliya evyaani.—Afil. 2:13.
• Mweererye wooniherya yoohuserya ya Piipiliya mmupharihelaka liivuru Piipiliya Onahusiha Eheeni, naari mmoonihe eviitiyu Como é um Estudo Bíblico? Mweereno ela mu orummwa.