Munii Muwerye Hai Omwaacamela Muluku?

1. Muluku onnawiriyana mavekelo oothene?

Muluku onnaawopa achu a mukhalelo woothene wi emwaacamele mu nivekelo. (Salmo 65:2) Nyenya, owo hanawiriyana mavekelo oothene. Ntoko yawooniherya, mavekelo a mulopwana onamuhooxa mwaariye poti ohaakhuliwa. (1 Petro 3:7) Navetho, vaava aIsarayeli yaatitelelaaya weera soonanara, Muluku aahikhooca owiriyana mavekelo aya. Mwawooneyaxa, nivekelo ti yamahala etokotoko. Nyenya, Muluku onahaala waakhela mavekelo a alipa oocheka wakhala wi awo aarukunuxa murima.​—Mwaalakhanye Yesaya 1:15; 55:7.

Moone exilema Muluku Onnawiriyana Mavekelo Oothene?

2. Nnii nivekele hai?

Nivekelo nnapaka makupa a malapelo ahu, mwawihiihaa nnaphwanela omvekela pahiru Mpatuxa ahu, Yehova. (Mateyu 4:10; 6:9) Navetho, vawoona wi na achu oohiphaameya, nnaphwanela ovekela mu nsina na Yesu ntakhara owo okhwenle soocheka sahu. (Yohane 14:6) Yehova hanachuna wi hiyaano nipakeke mavekelo awuuluula nari oorempwa. Owo onachuna wi hiyaano nivekele moorweela wa murima ahu.​—Mwaalakhanyeni Mateyu 6:7; aFilipi 4:6, 7.

Mpatuxa ahu onnawerya wiiwa mavekelo avathivathi. (1 Samuwele 1:12, 13) Owo onnaniwopa wi nivekeleke mu ilukuluku soothene, ntoko omapacereryo ni omakuchuwelo wa nihiku, naachunaka olya, ni vaava nnakumanaahu ni makacamiho.​—Mwaalakhanye Salmo 55:22; Mateyu 15:36.

3. Ntakhara heeni aKiristu annathukumana vamoha?

Omwaacamela Muluku tahi echu yookhweya nthowa nawi hiyaano nnakhala variyari va achu ahinamuroromela Muluku nave anavaanya yoolaiherya awe ya murecele veelaponi ya vathi. (2 Timoteo 3:1, 4; 2 Petro 3:3, 13) Mwawihiihaa hiyaano ninnachuna othukumana vamoha ni annihu wi nlipixaneke.​—Mwaalakhanye aHebri 10:24, 25.

Othukumana ni achu anamusivela Muluku onnanikhaviherya omwaacamela Muluku. Mithukumano sa Anamoona a Yehova sinnavaha ekari yaphaama ya ophura moorweela wa nroromelo na akina.​—Mwaalakhanye aRoma 1:11, 12.

4. Munii Muwerye Hai Omwaacamela Muluku?

Nyuwano munanwerya omwaacamela Muluku moorweela wa wuupuwelela ichu seiyo muhusenryaanyu mu Masu awe. Muupuwele vooloca sa miteko sawe, malakiheryo awe, ni soolaiherya sawe. Ovekela ni wuupuwelela onnanikhaviherya ocicimiha osivela ni miruku sa Muluku.​—Mwaalakhanye Yosuwa 1:8; Salmo 1:1-3.

Nyuwo munanwerya omwaacamela Muluku wakhala wi munnamuroromela yoowo pahiru. Nyenya nroromelo nri ntoko echu ekumi enachuna olyihiwa. Nyuwano munachuna otitelela olyiha nroromelo nanyu moorweela wa wuupuwelela mathowa a soororomela sanyu.​—Mwaalakhanye Mateyu 4:4; aHebri 11:1, 6.

5. Omwaacamela Muluku onahaala wookhaviheryaani mwawiihai?

Muluku onnaakhapelela yaale anamusivela yoowo. Owo onnawerya waakhapelela mwa echu eri yoothene yaahaala otoloxa nroromelo naya ni ewehereryo aya ya okumi woohimala. (Salmo 91:1, 2, 7-10) Owo onnanlopola vooloca sa meecelo a okumi annanariha okumi ni ohakalala wahu. Yehova onnanihusiha ephiro yaphaama ya okumi.​—Mwaalakhanye Salmo 73:27, 28; Yakobo 4:4, 8.