Yohuserya 7
Ephiro Yomphiyerya Muluku Munivekelo
Nthowa heni oryaya wotchuneya wii nivekeleke elukuluku yothene? (1)
Tani nnaphwanelahu onvekela nave mwawihai? (2, 3)
Itchu tani iri sophwanelela mu nivekeloni? (4)
Nyuwano tilini mumphwanelanyu ovekela? (5, 6)
Onniwa Muluku mavekelo othene? (7)
1. Ovekela ontaphulela olocha mwawiyeviha ni Muluku. Nyuwano munaphwanela onvekela Muluku elukuluku yothene. Mwawinohiha muni munamona okhalano vakhiviru ni vakhiviru ntoko nthamwene osiveliwa. Yehova mutokwene vanchipale ni owerya, nyenya owo onnaiwa mavekelo ahu! Munnanvekela wiliwili Muluku?—Masalmo 65:2; 1 Atesalonika 5:17.
2. Nivekelo ninnapaka makupa a othamalela wahu. Mwawihiha, nnaphwanela onvekela Yehova Muluku mekheiye. Vava Yesu ariye velaponi yavathi, owo anavekelaru Atithinya nave harivotho mukina. Hiyanotho nnaphwanela wera emohamoha. (Mateyu 4:10; 6:9) Mwawihiha mavekeloahu othene amphwanelela weriwakano mu nsina na Yesu. Wera hiha ninnoniherya wii ninnachichimiha oriyevo Yesu ni wii nokhalano nroromelo mu ovelela wawe ephepa ya yawopola.—Yohane 14:6; 1 Yohane 2:1, 2.
3. Vava ninvekelahu, nnaphwanelela omulela Muluku sa vathi wa murimahu. Hinnaphwanelela wera mavekelo awululawulula, nari walikhanya mu livro amavekelo. (Mateyu 6:7, 8) Ninnaphwanela onvekela mmakhalelo ari othene anchichimiho, mu elukuluku eri yothene ni mapuro ari othene. Muluku onnaiwatho mavekelo avathivathi, awiriwano va murimani. (1 Samuele 1:12, 13) Tiwaphama wasya mapuro omaleleya, orakamela ni atchu akina, wii nipake mavekelo ahu mekheihuvo.—Marko 1:35.
4. Myaha tani nyuwano mumphwanelanyu ovekela? Volocha sothene seiho sinavolowela onthamwenanyu ni yowo. (Afilipi 4:6, 7) Nivekelo nophwanaphwaniha ninnoniherya wii ninnaphwanela ovekelela nsina ni yokhwela ya Yehova. Nimphwanelatho oveka wi anivahe sothowa sahu samwili, ovekela wii sotcheka sahu ikhurumuweliwe ni yokhaviherya nnakumanahuno saweha. (Mateyu 6:9-13) Mavekelo ahu hamphwanela okhala anrima. Nnaphwanela oveka itchu hiho pahi simpharihana ni yokhwela ya Muluku.—1 Yohane 5:14.
5. Nyuwano munnaphwanela ovekela elukuluku yothene vava murimanyu onothonyeryayani omuthamala akhweya omuchichimiha Muluku. (1 Kronika 29:10-13) Munnaphwanela ovekela mwakhala ni sokachamiha ni vava nroromelo nanyu nnehiwaya. (Masalmo 55:22; 120:1) Tiwophwanelela ovekela muhakumve olya. (Mateyu 14:19) Yehova onnaniveka wii nivekeleke “mahiku othene”.—Aefeso 6:18.
6. Onnatchuneya vatokovene ovekela nerano yotcheka etokwene. Mu ilukuluku sawihiha, nnaphwanela onvekela Yehova wii animorele ikharari ni wii anikhurumuwele. Namulela sotcheka sahu ni wera yophwanelela wii nihikokele, Muluku onahala okhala “onlevelela”.—Masalmo 86:5; Proverpio 28:13.
7. Yehova onaiwa pahi mavekelo atchu ekhaikhai. Wii mavekelo anyu ekhale awiweya wa Muluku, onaphwanelela wii nyuwano mwasyasyesha okhala movarihana ni malamulo awe. (Proverpio 15:29; 28:9) Mumphwanela okhala awiyeviha mwavekelaka. (Luka 18:9-14) Mumphwanela olipisherya mu yeyo nyuwo munvekanyu. Hiha munahala ovaha onamona wii mokhala ni nroromelo ni wii tchiri munnalocha sevelevelo. Hiharu mavekelo anyu anahala okhala awakhuliwa ni Yehova.—Ahebri 11:6.