Wiiyeviha

Nlakiheryo: “Mwawiiyeviha, nwooneke akina okhala atokweene woopwahaani nyuwo.”—Afi. 2:3.

Tiheeni Paulo Opankeiye?

Murummwa Paulo, amakiwe nave alipeleliwaka, alocaka mwa ncicimiho ni Mwene Akripa, Mulamuleli Festu ni Perenise.

EXILEMA: Paulo Onnamulaleerya Mwene Akripa

1. Moone EXILEMA, naari mwaalakhanye Saweeriwa ti Arummwa 26:2, 3. Voocharela, mwaakhule makoho anacharela:

Ti mwawiihai Paulo oonihenryeiye wiiyeviha mmukhalelo aaloceiye ni Mwene Akripa?
Ti mwawiihai Paulo anvanheiye Yehova ncicimiho ni mu Soorempwa ohiya wa owo mwaneene?—Mmoone Saweeriwa ti Arummwa 26:22.

Tiheeni Nnahuseryaahu Orweela wa Paulo?

2. Michaka sahu sinnakhala sootannya murima vaavaa nnalocaahu mwawiiyeviha ni mwa ncicimiho.

Mmutakiherye Paulo

3. Muhiloceke ntoko muchu oosuwelaxa. Musepe wiisooneiha wi moosuwela ichu soothene, nave wi muchu owo hasuwenleru echu. Muloceke ni yoowo mmukhalelo wa ncicimiho.

4. Mooniherye mookwakwaleya wi yeeyo munahusihaanyu enarweela Mpiipiliyani. Masu a Muluku annaruuha muupuwelo anawerya otannya mirima sa achu. Vaavaa nnampharihelaahu Piipiliya ninnaakhaviherya achu okhalano mathipelo eeparipari wi yinnuwihe nroromelo naya.

5. Mutitelele okhala oomaaleleya. Muhaakeelele wi mooneelo anyu tori weeparipari. Hannachuna waakhulana ni achu. Mooniherye wiiyeviha, mutitelele okhala oomaaleleya nave musuwele elukuluku ya opwahavo. (Mas. 17:14; Titu 3:2) Wakhala wi mooloca mwaphaama, eyo enahaala weeriha wi okhale woowereya ovaanela tho mu ekwaha ekina.

MOONE THO

Aro. 12:16-18; 1 Ako. 8:1; 2 Ako. 3:5