MWAHA WA EKAAPA | MULUKU ONNAWUUPUWELAANI NYUWO?

Muluku Onnawuupuwelaani Nyuwo?

“Miyo ka óhoshiwa ni óhasuwa; Nyenya [Yehova] tanakupuweliye.”a​—TAVITE A ISARAYELI, NSANA 11 E.E.K.

Apwanne Tavite aanaphwanelela oweherya wi Muluku aahaala omuupuwela? Muluku onnawuupuwelaani nyuwo? Achu ancipale annaviliwa weemererya wi Muluku aikuru soothene onnawuupuwela. Ntakhara heeni?

Nthowa nimoha ti nawi Muluku mukhalelo wa okumi wa vasuluxa waapwaha achu. Owo aavareryaka orweela wirimu, maloko oothene “ari ntoko ntxoitxoi na mahi mmunoni, ari ntoko ntxhupi nnavavihiwa t’etxheku.” (Isaiya 40:15, Bibiliya Nsu na Muluku, BNM.) Namarepa mmoha awaakaaha amutano aayano vahoolo alocaka wi ti “moonelo wa vasulu weemererya wi ookhalavo Muluku yoowo onapwacha nave onuupuwela saweera sanyu.”

Mmakupa makina, achu akina anoona wi meecelo aya annaweeriha okhala oohiphwanelela wuupuweleliwa ti Muluku. Ntoko yootakiherya, mulopwana mmoha oniichaniwa Yimi onnaloca: “Kaanavekela moohihiyererya kivekaka murecele ni wiihiiha, nyenya moohilekela, esara aka wiiliwiili yaanakikookela. Wookuchulani, kaaphiyerya makuchuwelo wi kaari muchu oonanara nave Muluku harwa akikhaviherya.”

Mano Muluku ori ocai wa achu ophiyerya ohiwerya onoona? Muluku onoona hai chiryene vooloca sa soopatuxiwa sawe soohiphaameya? Ohirivo wuupulula wa wirimu, haavo muchu onawerya oloca sa Muluku ni waakhula makoho yaala. Nyenya, muchaka wooveereliwa wa Muluku ntakhara achu​—Piipiliya—​onnaniroromeliha wi Muluku tahi mulamuleli oorakamela ohinapwacha sawuukhula sa muchu ti muchu. Chiryene, Piipiliya onii, Muluku hari “ochiwene ni othene yehu.” (Saweriwa Tarummwa 17:27) Mmiyaha mixexe inacharela, inahaala othokororya yeeyo Muluku onanleeleiye vooloca sa omuupuwela wawe muchu ti muchu ni mukhalelo oonihenryeiye waapwacha achu akhalai ntoko nyuwaano.

[Nsu na vathi]