MWAHA WA EKAAPA | MULUKU ONNAWUUPUWELAANI NYUWO?

Muluku Onnawaavyaani

“Havovo mmoha anawerya orwa wa miyo nyenya Atithaka ókiruma miyo yampurula yowo.”​—YOHANE 6:44.

NTAKHARA HEENI AKINA ANNAKHWA MINIKWA: Ancipale a yaawo anamweemererya Muluku anniisoona okhala ocai ni yoowo. Kristina, muthiyana mmoha a Irlanta yoowo aaya okerexa esumana ni esumana onnaloca: “Miyaano koona wi Muluku pahiru mpatuxa a soothene. Nyenya nkaamusuwela yoowo. Nkintonko wiisoona omwaacamela yoowo.”

MASU A MULUKU ANAHUSIHA EHEENI: Vaavaa nniisoonaahu okhala oorimeela, Yehova hanannyanyala. Yesu aaphwanaphwaniha othokororya wa Muluku mmukhalelo ola: “Mutchu akhalano ipuchepuche makhumi khumi, nave enariméla emoha ya iho, hahiya ihe makhumi mathanu na masheshe ni sowapula saya thanu na sheshe, arowa o miakoni, ni wavya yoriméla eyo?” Tiheeni nnahuseryaahu? “Hihá heri yokhwela ya Atithinyu a wirimu wi mmoha a akhani ala ariméle.”​—Mateyu 18:12-14.

“Mmoha a akhani” ala oothene toochuneya wa Muluku. Muluku onaavya hai “yoriméla eyo”? Mwawiiwanana ni yoorepa eromoliwe omapacereryo, Yehova onnaapurula achu wa yoowo.

Muthokororye mukhalelo Muluku opacenryeiye waapurula achu eevelevelo. Mu nsana noopacerya E.K, Muluku aamurumiha oohuserya Mukiristu Filipo wi akumane ni nahota o Etiopiya wi amukhaviherye wiiwexexa phaama yootaphulela ya sooloherya sa Mpiipiliyani seiho nahota aalakhanyeiye. (Saweriwa Tarummwa 8:26-39) Vahoolo vaya, Muluku aamuhoolela murummwa Petro wi aphiye vaate va muhooleli Muroma awiichaniwa Korneliyo, yoowo aatitelela ovekela ni wiilipixerya omulapela Muluku. (Saweriwa Tarummwa 10:1-48) Muluku tho aamuhoolela murummwa Paulo vamoha ni asinthamwene awe wi ephiye va muhice vaate va epooma ya Filipi. Weiwo, awo yaamphwanya muthiyana “ámuthamala Muluku” awiichaniwa Lidiya, nave “murima awe Aphwiya áhahula, wi awiriane.”​—Saweriwa Tarummwa 16:9-15.

Mu yaweereya eri yoothene, Yehova aaheeriha wi yaale anamwaavya yoowo ekhaleno ekari ya omusuwela. Taani olelo anawaavya achu mmavaate mwaya ni mmakhwaalani wi yuuke ni yaawo michaka sa Mpiipiliyani vooloca sa Muluku? Ancipale yaahaala waakhula, ‘Anamoona a Yehova.’ Mwiikohe, ‘Apwanne Muluku onaapharihela yaawo wi akaavye?’ Ninnoovekaani wi mvekele wa Muluku wi ookhaviheryeeni wi mwaakhulele wiilipixerya wawe wi oopuruleeni wa yene.a

[Nsu na vathi]