MWAHA WA EKAAPA | OMWENE WA MULUKU​—ONATAPHULELA EHEENI WA NYUWO?

Ntakhara Heeni Othokororya Omwene wa Muluku?

Macikhwi orukurerya elapo annakuha ewehereryo aya mu Omwene wa Muluku. Awo anachara yootakiherya ya Yesu yoowo aahusinhe oomuchara awe ovekela: “Omwene anyu orwe. Okhwela wanyu wereye . . . vathi vano.”​—Mateyu 6:10.

Moothananiha, vaavaa achu ancipale anathokororyaaya Omwene wa Muluku, malapelo mancipale hanathokororya. Mmukhalelo yoowo, mulipa a miyaha H.G.Wells aahoona esisapo yeeyo Yesu aavanheiye “ovuwa otokotoko . . . wa nihusiheryo nenlo iichanneiye Omwene wa Wirimu” naamwi hiiha H.G.Wells aaloca wi nihusiho nenla “ti noohiyana ni . . . mahusiho a malapelo mancipale Eekiristu.”

Moohiyana ni ikerexa seiyo, Anamoona a Yehova annacicimiherya vancipale Omwene wa Muluku. Muthokororye: Eyornali ahu yoochuneya munaalakhanyaanyu hiihaano, ennalaleeryiwa mu ilocelo 220. Waacamela macikhwi 46 sa irevista sinnakumihiwa, yeerihaka wi ekhale erevista yookaiwaxa veelaponi yavathi. Nave tuuvi ori muchaka mutokweene wa eyornali yeela? Moone muru aya: Mulipeleli Alaleyaka Omwene wa Yehova.a

Ntakhara heeni Anamoona a Yehova anniilipixerya olokoha, naari olaleya, Omwene wa Muluku? Mu nthowa nimoha, hiyaano ninneemererya wi Omwene wa Muluku muchaka mutokweene wa liivuru ookhweleya veelaponi yoothene​—Piipiliya. Opwaha yeeyo, noolekecheya wi Omwene wa Muluku pahiru tonahaala omaliha makacamiho anaahooxa achu olelo.

Moorweela wa othokororya Omwene wa Muluku, Anamoona a Yehova anniilipixerya ochara yootakiherya ya Yesu. Ari veelaponi yavathi, owo aapaka Omwene wa Muluku echu yookhweleyaxa mu okumi ni orummwa wawe. (Luka 4:43) Ntakhara heeni Omwene waakhalano yootaphulela etokweene wa Yesu? Nave onataphulela eheeni wa nyuwo? Ninnoowopani wi muthokororye maakhulo a Piipiliya, ntoko anathokororyiwaaya mmiyaha inacharela.

[Nsu na vathi]