MWAHA WA EKAAPA | OMWENE WA MULUKU​—ONATAPHULELA EHEENI WA NYUWO?

Omwene Wa Muluku​—Onataphulela Eheeni wa Nyuwo?

Ntoko monnaanyu mu miyaha ivinre wi Omwene wa Muluku onataphulela sincipale wa Anamoona a Yehova. Akhweya mootikhina mareeliho oomwaahiyu vooloca sa Omwene wa Muluku, yaawo athokororyiwe. Mu elukuluku emohamoha, munamuchuna osuwela wakhala wi soororomeliha seiyo ti seeparipari.

Ti wamiruku okhalano ephoole opwaha weemererya echu eri yoothene munawiriyanaanyu. (Masiposipo 14:15) Mmakhalelo makina, ephoole anyu enanwerya olikanyihiwa ni a Pereya akhalai.a Vaavaa yaahusihiwaaya ekwaha yoopacerya vooloca sa michaka yaphaama ya Omwene, a Pereya yaaheemererya yeeyo yiiwalaaya, nyenya ohiya pahiru nthowa nawi yaachuna ekhanle yeeparipari. Opwaha yeeyo, yaanaalikhela Soorempwa wi yoone “khwino itchu sári sawihiha.” (Saweriwa Tarummwa 17:11) Mmasu makina, a Pereya yaanalikanyiha michaka yaphaama yaawiriyannaaya ni yeeyo Soorempwa salocaaya. Yaaphiyerya olekecheya wi michaka yaphaama mweeparipari sarweela mu Masu a Muluku.

Anamoona a Yehova annoowopaani wi mweere emohamoha. Moorweela wa marehereryo ahu oomuhuserya Piipiliya mahaleene, ninnoovahaani ekari wi mulikanyihe yeeyo Anamoona a Yehova aneemereryaaya vooloca sa Omwene wa Muluku ni yeeyo Piipiliya onahusiheiye.

Mu waaceererya ohuserya wanyu vooloca sa Omwene wa Muluku, yoohuserya ya Piipiliya enahaala wookhaviheryaani ophwanya maakhulo a makoho makina matokotoko ookumi:

• Nrwenle woowi?

• Tiivi eri yookhwela ya okumi?

• Ntakhara heeni Muluku onneemererya masooso?

• Tiheeni eneereya ni hiyaano nakhwa?

• Elapo enahaala opahuliwa?

• Tiivi eri yoohulela ya okumi wa echoko woohakalala?

Opwaha soothene, omuhuserya Piipiliya onahaala wookhaviheryaani ‘omwachamela Muluku.’ (Yakobo 4:8) Ntoko yookhumelela, vaavaa munamwaacamelaanyu Muluku, munahaala woona wi Omwene onamutaphulela ichu sincipale saphaama wa nyuwo​—ohiya pahiru hiihaano nyenya okhala wookhala. Yesu aaloca mu nivekeloni wa Tiithi awe: “Nyenya okumi wohimala ti ola, wi yasuwele Nyuwo Mulukuru éparipari ni Yesu Kiristu yowo mwámurummanyu.”​—Yohane 17:3.

Anamoona a Yehova anampharihela yoolaleeryiwa yeela wi emuhuserye Piipiliya ni nyuwo.

Wi mveke yoohuserya ya Piipiliya, mumveke mmoha a Anamoona a Yehova naari murepele yoorepela mu www.jw.org. (Moone MVEKE YOOHUSERYA YA PIIPILIYA va epotau ya empa)

[Nsu na vathi]

[Ekaaxa va epaaxina 9]

Omwene wa Muluku Onataphulela Eheeni wa Nahano

Hiihaanoru, nahano a iyaakha khumi sa oyariwa oniichaniwa Folake aathanliwa oxikola wi arepe mwaha orino muru: “Yeeyo Enakisivela Vancipale mu Elapo Yeela.” Owo aathanla orepa ntakhara heeni onnasiveliwa waaleela akina sa Omwene wa Muluku.

Folake aathariha: “Omwene wa Muluku olamulelo weeparipari, nyenya owo ti woohooneya​—naamwi ni iyookulu!”

Folake aapwahiherya arepaka mareeliho a Omwene yaawo onaweheryeiye. Alocaka sa makacamiho yaawo Omwene onahaalaaya omaliha, owo aarepa: “Kinnathanana vaavaa kinawoonaaka achu ehirino ipa, ekhalaka mu iphiro” nave tho “anamwane ekhwaaka mmapuro oothene a elapo.” Owo onnaacererya: “Kinnahakalala vaavaa kinamwaalakhanyaaka Yesaya 65:21.” Elocaka sa achu anahaala okhalaka vathi va olamulelo wa Omwene wa Muluku, yoorepa ennaroromeliha: “Atxhu aka anamuteka ipa ni anamukhalaka mwemmo, anamwála miri nave anamulya sawima saya sene.”

Folake aaloca tho wi onnawehererya elukuluku yeeyo Muluku moorweela wa Omwene awe, onahaaleiye omaliha ireca soothene. Mmwaha awe, aamuromola Yawupulula 21:4, onaloca wi Muluku “anarwa-avuta mithori yothene oviha’mo m’mithoni mwaya;nave hevarwa-vakhalatho okhwa; nave hevarwa-vakhalatho iyinlo, nari wunla, nari sawichela.” Aakuchula uuluulelaka wi oloca sa Yehova ni Omwene awe echu enamusivela vancipale mu elapo yeela. Chiryene, Omwene wa Muluku wookhalano nipuro mmurimani wa nahano yoola!